Taıaýda patshalyq Reseıdiń otarlaý saıasatyna qarsy kúresken Kenesary hannyń qol bastaǵan batyry Aǵybaı Qońyrbaıulynyń kesenesine eskertkish belgi qoıyldy. Bıiktigi 2 metr, eni 70 sm bolatyn qara granıt tasqa «Qazaqstan Respýblıkasy. Aqjoltaı Aǵybaı batyr Qońyrbaıuly. 1802-1885. Hannyń barlyǵy Abylaı emes, Batyrdyń barlyǵy Aǵybaı emes. Halyq sózi. Eskertkish memleket qorǵaýynda» degen sózder latyn áripterimen qashap jazylǵan.
Shet aýdanynyń ákimi Marat Jandáýletovtiń aıtýynsha, batyrǵa belgitas oblys basshysy Erlan Qoshanovtyń tapsyrmasy boıynsha qoıylypty.
– Aýdanymyzda ulylar esimin ulyqtaý, tarıhı muralarymyzdy óskeleń urpaq sanasynda jańǵyrtý syndy taǵylymy mol isterge erekshe kóńil bólinedi. Mysaly, byltyr aýdan ortalyǵynda Derbisáli batyr Aıdabolulyna eskertkish bıýst ornatyldy. Al bıyl Shortanbaı jyraý Qanaıuly atyndaǵy saıabaq abattandyrylyp, aýdandyq murajaı ishinen zar zaman aqynyna arnalǵan arnaıy bólme ashylyp, mazarynyń basyna kúmbezdi belgi qoıyldy. Sondaı-aq ataqty batyr Jıdebaı Qojanazaruly atyndaǵy saıabaq ta retke keltirilip, mazarynyń aınalasyna halyqtyń suraýy boıynsha kún kózinen qýat alatyn kóshe shamdary ornatyldy, – deıdi aýdan ákimi.
Eske salsaq, Aǵybaı batyrdyń kesenesi Kıikti aýylynan 60 shaqyrym jerde, Taıatqan-Shunaq taýynyń mańynda ornalasqan. HIH ǵasyrdyń sáýlet óneri eskertkishteriniń birinen sanalatyn jalǵyz bólmeli, kúmbezdi keseneniń ishinde 12 adam jerlengen. Batyrdyń qabiri beıit túkpirindegi soltústik-batys jaqtaǵy buryshta ekinshi bolyp jatyr.
Qazirgi tańda Aǵybaı Qońyrbaıuly kesenesiniń basynda shyraqshy otyrady. Aqjoltaı batyrdy áýlıe tutyp, onyń rýhyna taǵzym etip, mazaryna baratyndardyń qarasy da jyldan-jylǵa molaıyp keledi.
Qaraǵandy oblysy
