Oǵan bolashaq bilim úıine barar joldaǵy eki qabat baspanadan kóshýge úzildi-kesildi qarsylyq bildirip, jurtta jalǵyz shoshaıyp qalǵandaı tirlik keship otyrǵan Romahınder otbasy sebep bolyp otyr. Kórshileri túgel kóship ketken. Búırekten sıraq shyǵaryp otyrǵan osylar ǵana. Daýdyń basy otbasynyń qalalyq ákimdik usynǵan ótemaqyǵa kelispeýshiliginen týyndaǵan. Bir qyzyǵy, baspana ıeleri bastapqyda úıdiń súrilýine kelisimin berip, másele zań talaptary aıasynda tolyq sheshilipti. Sóıtip úsh bólmeli eki páterdiń kilti qoldaryna ustatylypty. Endi resmı qujattar Ádilet basqarmasynda tirkeýden, al jer telimderi memleket menshigine ótkenine qaramastan, anttasqan qudaıy ýádelerinen aınyp qalsa kerek. 4 páter berilmese, shańyraqty bosatpaımyz, taǵy da sottasamyz desip, tistesip qalǵan. Otbasynyń advokaty Amangeldi Ábikeev úıdiń jalpy kólemi 247 sharshy metr bola tura, bar-joǵy 120 sharshy metrlik úsh bólmeli eki páter usynylǵanyn, ótemaqy durys eseptelmegenin alǵa tartady.
BAQ ókilderine bergen suhbatynda qala ákiminiń orynbasary Asqar Habıbýllın daýly máseleniń neden ýshyqqanyn túsindirip berdi. Onyń aıtýynsha, eki qabatty úı 16 mıllıon 800 myń teńgege baǵalanyp, tıisti qujattarǵa qol qoıylǵan. Otbasy úshin satyp alynǵan qos páterdiń quny 26 mıllıon teńgeni quraıdy. Romahınder ústińgi qabatta turǵan, ıaǵnı 88 sharshy metr alańdy ǵana paıdalanǵan. Astyńǵy qabatta garaj, basqa da sharýashylyq zattaryn saqtaıtyn oryndar ornalasqan. Olar úshin ótemaqy tólenbeıtinin eskergileri kelmeıdi. Munyń aldynda sot bul otbasynyń talap-aryzyn qaraýdan bas tartqan bolatyn. «Jyǵylǵan kúreske toımaıdynyń» kerimen taǵy da shaǵym túsirgen.
Asaı-múseıin asynyp, baspanany buzýǵa kelgen merdigerlik kompanııa mamandaryn ulardaı shýlap, qarsy alǵan otbasy músheleri keri ketýge májbúr etti. Úıdi súrýge kelgenderdiń elektr togyn ajyratýǵa ǵana shamasy jetti.
«Qyryq kisi – bir jaq, qyńyr kisi – bir jaq» demekshi, el ishin alataıdaı búldirgen bir otbasynyń kesirinen oqýshylar asyǵa kútip otyrǵan bilim oshaǵynyń qurylysy sozylyp ketetin tárizdi.
Petropavl
