Semeıdegi Ortalyq saıabaqtyń jóndelýine 1 mlrd teńge qarjy bólinipti. Sóıtip, jóndeý bastalady degen jeleýmen saıabaq sáýir aıynda Semeı qalasy turǵyndary úshin jabylyp qalady. Al turǵyndar men qonaqtar áli kúnge deıin Saıabaq ashyla ma eken dep tosýmen keledi. Desek te, bul jóndeý qurylys jumystary qarasha aıyna deıin sozylmaqshy. Semeı qalasy ákiminiń janyndaǵy qalalyq qoǵamdyq keńes músheleri, TÚKSh bólimi jáne taǵy basqa da tıisti mekeme, uıym basshylary Saıabaqqa kelip, bastalsa da, aıaqtalmaı qalǵan jóndký jumystarynyń sebebin tekserip kórdi.
- Semeı qalasy turǵyndarynyń súıikti demalys orny,-dedi qalalyq máslıhat hatshysy Beısenbek Aqjalov,-shirkin, Ortalyq saıabaq jóndelse degen arman 30 jyldan beri barlyǵynyń kókeıinde júr. Shyǵys Qazaqstan oblysy bıýdjetinen qalanyń kóriktendirilýine 1 mlrd teńge bólindi, bul qarjynyń barlyǵy osy saıaqbaqtyń kúrdeli jóndeýine berildi. Mine, eki aı boldy, jumystar toqtap tur. Merdiger kompanııalar bundaı jónsizdikke nege jol berip otyr?
Qalalyq máslıhat hatshysynyń saýalyna Turǵyn úı ınspeksııasy jáne TÚKSh bóliminiń bastyǵy Amantaı О́telbaev jýap berdi. Onyń aıtýynsha, Ortalyq Saıabaqtyń jumysy turalap qalýynyń sebebi, joba memlekettik ekspertızadan ótpeı qalǵan. Jobany Semeı qalalyq qala qurlysy jáne sáýlet bólimi uynǵan eken. Jobada tehnıkalyq aqaýlar bar, ıaǵnı kógaldar men toǵaılardy sýǵarý júıesi jetildirilmegendikten qujat bóligi retinde keri qaıtarylǵan. Amantaı О́telbaevtyń aıtýynsha, endi osy Ortalyq saıabaqty jóndeımiz dep konkýrsty utyp alǵan merdigerler óz jumystaryn eki aýysymmen istep, jobalanǵan alty aıdyń emes, úsh aıdyń ishinde jumysty bitirýge tyrysqandary jón, sebebi qarjy mıllıard aqasha bólindi, al qys qyr astynda, kem degende qarasha aıyna deıin jumys aıaqtalýy tıis.
-Semeı qalasynyń turǵyndary Ortalyq saıabaqtyń jumysy aıaqtalǵanda sapaly aıaqtalýyn talap etip otyr,-dedi máslıhat hatshysy Beısenbek Aqjalov,-sondyqtan qalalyq qoǵamdyq keńes músheleri bukil qurylys, jóndeý jumystarynyń barysyn qadaǵalap qaraýmen aınalysatyn bolady. Jáne bul másele qala ákimi Ermak Sálimovtyń de nazarynda. Anyǵyn aıtaıyq, sońǵy jyldary Semeıde jaqsy dúnıe kóp jasaldy. Ertistiń oń jaq jaǵalaýy «Naberejka» kóriktendirildi. Joldar jóndelip, aýlalar qalypna keldi. Jumys júrip jatyr, biraq, myna saıabaqtyń kúrdeli jóndeýi turalap qalǵany qıyn boldy. Sondyqtan da, qalalyq qoǵamdyq keńestiń pikiri bir jerden shyǵady. Barlyǵymyz qala basshylyǵyna bul máselege erekshe kóńil bólýin suraıyq. Shildeniń sońynda qorytyndy ekspertıza shyqqanmen, alda áli memlekettik satyp alýdyń uzaq jumystary bar ekendigin de umytpaǵan jón.
Qoǵamdyq keńestiń Ortalyq saıabaqqa alańdaýshylyq tanytyp shyqqany qala turǵyndarynyń jaz aıynda kelip, bir sát sergıtin saıabaqtarynyń ýaqytynda aıaqtalmaı jatqany edi. Iá, saıabaq «jóndeledi» dep jabylyp turǵanmen, jóndelip jatqan eshteńe joq, sol kúıi turalap qalǵan.
Aıta ketý kerek, saıabaqtyń kúrdeli jóndeýden ótedi degen jobasy 2019 jyldyń naýryz aıynda bastalǵan edi. Bul jobanyń tusaýy kesilgen soń, jumysshylar kelip, birden qyzý jumys bastalýy tıis bolatyn. Rasymen de, «Semeı» KMK kelip, bul jerde birshama alǵy jumystar atqarady. Eski aǵashtardy qıyp, eski dárethanany alyp tastaıdy. Trotýar plıtany qoparǵan. Sóıtip, osymen jumys toqtap qalǵan. Saıabaq qalanyń ortasynda ornalasqan, ári-beri turǵyndar ortasynan ótip, qalanyń ekinshi jaǵyna shyǵa alatyn. Sóıtip týra jol da jabylyp, el áýre-sarsańǵa túsedi.
- Men osy okrýgtiń depýtaty retinde aıtarym, 2017-2018 jyldary osy saıabaqty qalaı kórkeıtemiz degen máseleni qarastyrdyq,-dedi qoǵamdyq keńes múshesi Zýlfııa Jamaltdınova,-biz Semeıde zamanaýı tamasha saıabaq bolsa degendi alǵa qoıdyq. Qarjy bólindi, desek te, jumys júrmeı jatqany ókinishti. Buny qalaı túsinemiz?
-Bizge qarjy bólindi, sodan keıin birden joba-smetalyq qujat daıyndaldy,-dep jaýap berdi Turǵyn úı ınspeksııasy jáne TÚKSh bóliminiń bastyǵy Amantaı О́telbaev,-jáne merdiger uıym da anyqtalyp, ol joba-smetalyq qujatty ekspertızaǵa jiberdi. Ekspertıza kóptegen talaptarǵa oraı uzaqqa sozylyp ketti. Biz merdiger uıymmen barlyq aıtqan eskertýlerin jóndedik.
Dese de, buǵan deıin saıabaqtyń damý konsepsııasy jasalmaǵan eken. Joba boıynsha saıabaqta qurǵaq sýburqaqtar jumys isteýi tıis. Joba boıynsha, Ortalyq saıabaqty jóndeýmen qatar, Máńgilik el kóshesindegi jaıaý júrginshiler alańy da jóndelýi qajet deıdi depýtattar. Balalar alańqaıy, sporttyq alańdar barlyǵy jasalýy tıis. Eski oryndyqtar alynyp tastalady. Buryndary Ortalyq saıabaqtyń jaryqtandyrýy aqsap jatatyn. Endi jaryq dıodty shamdar ornatylatyn bolmaq.
Jobalaýshy mekeme ókilderiniń aıtýynsha, saıabaq 4 aımaqqa bólinbek. Balalar jáne sport alańdary, amfıteatr paıda bolmaq. Saıabaqtyń aýmaǵynda zamanaýı sýburqaqtar men oryndyqtar qoıylmaq.Saıabaqta fýtbol, basketbol, voleıbol alańdary men skeıt alańdar ornatylady. Balalar oınaıtyn alańdaǵy álpenshekter ataýly tabıǵı materıaldan jasalady. Eresekteý balalar úshin bı alańy men shahmat taqtaılaryn ornatylýy tıis eken.
Jospar boıynsha, buryndary kóringen jerde beı-bereket satylyp turatyn táttiler men balmuzdaq dúńgirshekteri jóndi qalypqa keltiriletin bolmaq. Dese de, kafe, meıramhana sııaqty barlyq kóńil kóterý oryndary óz oryndarynda qalatyn boldy. Biraq, olar saıabaqqa qatyssyz túrde, jeke qorshaýmen qorshalyp, esigi jeke basqa jaqtan shyǵarylatyn boldy. Ortalyq saıabaqtaǵy jınalys barysynda qalalyq máslıhat hatshysy Beısenbek Aqjalov jumystyń merziminde aıaqtalýyn jáne eń bastysy sapasy durys bolyp shyǵýyn tapsyrdy.
SEMEI
