«Astana» Eýropa lıgasynyń sońǵy tórt oıynynan beri ár matchta iri eseppen jeńiske jetip keledi. Bul joly da BATE qaqpasyna jaýapsyz úsh gol soqty. Roman Grıgorchýk pen onyń komandasy aqyryndap óz oıynyn taýyp, turaqtylyqqa úırenip kele jatqan sııaqty. Nege deseńiz, bas bapker atalǵan tórt oıynda da bir quramdy oınatyp júr jáne 4-5 fýtbolshy ár oıynda turaqty gol soǵýda.
Matchqa deıin birqatar fýtbol mamany boljaǵandaı kezdesý teń dárejede bastaldy. Degenmen alǵashqy qaýipti shabýyldy BATE fýtbolshylary jasaǵanyn aıta keteıik. Kezdesýdiń 20-mınýtyna deıin komandalar alma-kezek shabýyldap, qaqpa aldynda birneshe qarbalas sát uıymdastyrǵanymen, gol soǵa almady. 23-mınýtta oń qaptaldan Rýnar Sıgýronssonnan pas alǵan Tomasov qarsylastyń úsh birdeı qorǵaýshysyn aldap ótip, aıyp alańyna kirmeı shirene tepken doby qaqpanyń «toǵyzdyǵyna» top ete tústi. Mundaı soqqyny tek BATE-niń ǵana emes, álemniń eń úzdik degen qaqpashylary da qaıtara almas edi. Horvatııalyq fýtbolshynyń bul golyna fýtbol mamandary tańdanysyn bildirip, sheteldik basylymdar jarysa jazyp jatyr.
«Astana» esepte alǵa shyqqan soń basymdyqty údete túsip, ekinshi goldyń arasyn sýytpaıtyn shyǵar degen oıda bolǵanbyz. Alaıda BATE oıynshylary qarymta shabýylǵa ıek artyp, sát saıyn Erıchti mazalaýmen boldy. Deı turǵanymen qorǵaýshylarymyz da der kezinde oryndarynan tabylyp, qaýiptiń betin qaıtaryp otyrdy. Kezdesýdiń birinshi taımy aıaqtalar tusta Iýrıı Logvınenko ádettegideı baspen keremet oınap, komandasynyń ekinshi golyn soqty. Nátıjeli pastyń avtory – Marın Tomasov ekenin aıta ketken jón. Osylaısha, oıynnyń alǵashqy taımy «Astananyń» basymdyǵymen aıaqtaldy.
Matchyń ekinshi taımynda Roman Grıgorchýk shabýylshy Fırmın Mýbeleniń orynyna Roman Murtazaevty alańǵa shyǵaryp, taktıkaǵa azdaǵan ózgeris engizdi. Kezekti bir shabýyl sátinde qarsylas komandanyń qorǵaýshysy óz aıyp alańynda Sıgýronssondy shalyp qulatyp, tóreshi 11 metrlik aıyp dobyn belgiledi. Islandııadan kelgen fýtbolshy penaltıden múlt ketpeı, tablodaǵy kórsetkishti eseleı tústi. Esepte úsh golmen alǵa shyqqan «Astana» oıynshylary aqyryndap qorǵanysqa kóńil bólip, óz qaqpasyna gol ótkizip almaýdyń qamyn oılady. BATE oıynshylary esepti qysqartýǵa bar kúshin salǵanymen, osy oıynda «Astana» qaqpasyna gol soǵý olardyń mańdaıyna jazylmaǵan eken. Osylaısha eki komandanyń pleı-off kezeńindegi alǵashqy oıyny jerlesterimizdiń iri jeńisimen aıaqtaldy.
«Astananyń» bul jeńisi týraly birneshe sheteldik basylym da jazýda. Mysaly Bosnııanyń Klix.ba saıtynyń tilshisi Omar Tıpýra «Astanany» Chempıondar lıgasynyń deńgeıindegi komanda dep atady. «Bul keremet nátıje. Shyny kerek, men «Astananyń» qarsylastan basym bolatynyn bildim, biraq mundaı deńgeıde dep oılaǵan joqpyn. Belarýs komandasy qarymta oıynda kambek týraly oılamaı-aq qoısa da bolady. Menińshe «Astana» toptyq kezeńge shyǵyp tur. Jalpy qazir qazaqstandyq komanda BATE, «Lýdogores», «Saraevo» jáne taǵy basqa klýbtarynan bir bas joǵary. Bul komandany Chempıondar lıgasynyń deńgeıinde dep esepteımin. «Astana» Eýropa lıgasynyń toptyq kezeńinen sátti ótip, 1/16 fınalǵa shyǵatynyna senim bildiremin», deıdi bosnııalyq jýrnalıst.
Sondaı-aq Belarýstiń by.tribuna.com basylymy «BATE birneshe jyldan beri Eýrokýbokta sonshalyqty úmitsiz kórinbegen edi. Endi bir ǵajaıyp oryn almasa, «Astanadan» basym túsý óte qıyn» degen taqyrypta kólemdi materıal jarııalaǵan. Maqalanyń sońy bylaı aıaqtalady: «Úsh jyl buryn BATE Qazaqstanda «Astanadan» 0:2 esebimen jeńilgen edi. Al qarymta oıynnyń alǵashqy taımynda Ermakovıchtiń (sol kezdegi BATE-niń bas bapkeri – red) shákirtteri qalaı oınaǵany esterińizde me? Gordeıchýktiń goly barshaǵa úmit syılaǵanymen, ǵajaıyp oqıǵa bolmaǵan edi. Bir aptadan keıin sol ǵajaıyptyń bıyl qaıtalanatynyna senesiz be? Múmkin Alekseı Baganyń bapkerler quramy jańa taktıkalyq júıe oılap tabar nemese BATE-niń beıneoperatory kıinetin bólmede motıvasııalyq beıne kórseter? Sonda ǵana... Sonymen bir ǵajaıyptyń bolaryna senemiz be?».
Rasymen, fýtbol boljap bolmaıtyn oıyn. Qarymta matchta BATE oıynshylary toptyq kezeńge ótý úshin baryn salary anyq. «Astana» oıynshylary jeńistiń áserinen tez shyǵyp, qarymta matchta barynsha saýatty oınaý kerek. Áıtpese, by.tribuna.com basylymy jazǵandaı Belarýs komandasy bir ǵajaıyptyń arqasynda «Astanany» qapy qaldyrýy ábden múmkin.
Qos komanda arasyndaǵy jaýap kezdesýi 29 tamyz kúni Belarýstiń Borısov qalasyndaǵy «Borısov-Arenada» ótedi. Sondaı-aq osy joldardyń avtory da atalǵan stadıonnan aqparat taratyp, «Astananyń» toptyq kezeńge ótkeni týraly súıinshi suramaq nıette.
