«Han Shatyr» saýda, oıyn-saýyq ortalyǵyna jaqyn mańda uıymdastyrylǵan jármeńkeniń barlyq qataryn ákimder tolyq aralap shyqty. Ár saýda ornyndaǵy baǵalardy surady. Sharýalarmen áńgimelesip, sońynda Ordabasy, Jetisaı aýdandary ónerpazdarynyń konsertin tamashalady.
Aıta ketsek, dál qazir Nur-Sultanda Túrkistan óńiri sharýalarynyń jármeńkesi ótip jatyr. Túrkistan oblystyq Aýyl sharýashylyǵy basqarmasynyń basshysy Nurbek Badyraqovtyń aıtýynsha, barlyǵy 275 tonna ónim ákelindi.
«Bul jerde sharýa tikeleı satyp alýshymen jumys júrgizedi. Iаǵnı, ortada eshqandaı alypsatar joq. Ortada alypsatarlar bolmaǵandyqtan, baǵa arzan ári bizdiń sharýalar da qaıda ótkizemin basyn qatyrmaıdy. Tikeleı jármeńkege kelip, ónimin sata alady. Nur-Sultan qalasynyń turǵyndarynyń túrkistandyq ónimderge suranysy joǵary. Jármeńkeniń ótetini jaıly aldyn ala elordalyqtarǵa habarlaımyz. Sonyń nátıjesinde ónimderimiz 90-95 paıyzdyq deńgeıde ótip ketip jatyr», - deıdi Nurbek Badyraqov.
