Aıyptaý aktisine sáıkes, aıyptalýshylardyń úsheýi – Berik Ahmetov, Qaırat Aqshanov jáne Nurlan Shúkildikov «Ohotzooprom» ınspektory Erlan Nurǵalıevti óltirdi jáne onyń áriptesi Petr Nısykqa qastandyq jasady, aqbókenderdi zańsyz aýlady dep aıyptalýda. Al olardyń seriktesteri – Berden Bazarov, Batyrbek Qaıyrbekov, Jarashan Myrzabaev jáne Aıdos Ákimovke tek zańsyz ań aýlaǵany úshin aıyp taǵylyp otyr.
Aldyn ala tyńdalym barysynda jábirlenýshiler men sottalýshylardyń ókilderi sotqa deıingi tergeý ústirt júrgizildi dep sanaıtyndaryn aıtyp, qylmystyq isti prokýrorǵa qaıtarýdy surady.
Sotta marqum qoryqshynyń uly Medet Nurǵalıevtiń jáne ınspektor Petr Nısyktyń sózin sóılegen advokat Almat Qasqyrbaı qastandyq jasaǵandardyń qataryna kirmegen tórt aıyptalýshynyń isin qaıta qaraýdy surady. Advokattyń aıtýynsha, bul tórteý Qylmystyq kodekstiń 432, 434-baptary boıynsha asa aýyr qylmysty jasyrǵany úshin jáne der kezinde qylmysty jarııa etpegeni úshin aıyptalýy kerek. Olardyń bul kinálary bultartpas faktilermen aıǵaqtalǵan. Birinshiden, olar qylmys ornynda oqıǵaǵa kýá. Odan keıin bári birge bir úıde túnegen jáne polısııaǵa jaǵdaı týraly habarlaýǵa múmkindikteri boldy.
Qorǵaýshynyń sózin marqumnyń dosy jáne onyń ulynyń zańdy ókili Ǵalymjan Táýekelov te quptady. Ol eger álgi tórteý der kezinde polısııaǵa júgingende, qoryqshy Erlan Nurǵalıevtiń ómirin saqtap qalýǵa bolatyn edi degen ókinishin bildirdi. Jábirlenýshi tarap bul adamdardyń áreketterine de aýyr jaza qarastyrylý kerek ekendigin málimdedi.
Sonymen qatar sottalýshy taraptyń avdokattary da qylmystyq isti prokýrorǵa qaıtaryp, tergeýdi qaıta júrgizýdi surady. Adam ólimimen aıyptalýshylardyń biri Q.Aqshanovtyń qorǵaýshysy tergeý organynyń aıyptaý aktisinde qylmys ornynyń tolyq málimetterin kórsetpegenin jáne zańsyz ań aýlaý saldarynan keltirilgen zalaldyń mólsherimen kelispeıtinin aıtty.
«Bir top adam qasaqana adam óltirdi» dep aıyptalǵan sottalýshylardyń qorǵaýshylary qylmystyq bapty qaıta kvalıfıkasııalaýdy talap etti. Olardyń aıtýynsha, kúdiktiler abaısyzda ólimge ákep soqtyrǵan dene jaraqatyn keltirgen. Sebebi qoryqshy Erlan Nurǵalıev oqıǵa ornynda qaza tappaǵan, aýrýhanaǵa jetkizgende tiri bolǵan.
Buǵan qosa advokattar polıseılerdiń ańshylardyń kıikti atqandaryn dáleldeı almaǵanyn aıtty. «Ohotzooprom» ınspektorlary daladan atylǵan 17 janýardy taýyp, olardyń zalalyn 45 mln teńge dep eseptedi. Biraq qorǵaýshylar bul soma asyra siltelgen, zalaldyń shyn mánindegi somasy 17 mln teńgeden sál asady degen pikirlerin jetkizdi. Sottalýshy Q.Aqshanovtyń qorǵaýshysynyń ótinishin B.Ahmetov pen N.Shúkildikovtiń advokattary qoldap otyr.
Aldyn ala tyńdalymnan soń Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń sýdıasy Bekzat Shalǵymbaev isti prokýrorǵa qaıtarý týraly úkim shyǵardy. Onyń paıymdaýynsha, is egjeı-tegjeıli zerttelmegen, qylmystyq is baptary durys qoldanylmaǵan, tergeýshiler qylmystyń qaı jerde, qalaı jasalǵanyn dáleldeıtin materıaldardy aıyptaý aktisine engizbegen. Aıyptaýlar tek eki taraptyń aýyzsha túsiniktemelerine negizdelip jasalǵan. Sondyqtan aıyptaý aktisinde kereǵar jaýaptar jıi kezdesedi. Kúdiktilerdiń áreketterin saralaý týraly sheshimde qylmystardyń obektıvti jaǵy sıpattalmaǵan. Sondaı-aq atalǵan qylmystyq is boıynsha sot óndirisiniń tili qazaq tili dep tańdalǵan, alaıda qujattardyń bir bóligi zardap shegýshi Petr Nısyk úshin orys tiline aýdarylmaǵan.
Bul oqıǵa jyl basynda tirkelip, Qaraǵandy oblysy Nura aýdanynda kıik atqan brakonerler eki ınspektordy jaraqattaǵan edi. Aýyr jaraqattan es jımaǵan Erlan Nurǵalıev 15 qańtarda Nur-Sultan qalasynyń №1 aýrýhanasynda kóz jumdy. Qazir qylmystyq is boıynsha jeti adam aıyptalyp otyr. Olardyń úsheýi – qamaýda.
