Syrtqy ister vedomstvosynyń ókili el aýmaǵyna 50-den asa zaýytty kóshirý jóninde másele múlde kóterilmegenin, buǵan qosa eski óndiris oryndaryn ashý jóninde baǵdarlama joq ekenin jetkizdi.
– 55 zaýyt salý týraly baǵdarlama joq. Bilýimshe, bul aqparatty keıbir blogerler What’sApp arqyly taratyp júr. Resmı túrde mundaı baǵdarlama joq ekenin habarlaımyz. Eski zaýyttardy eshkim ákelmeıdi. Qytaı elimen birlesken komıssııa jumys isteıdi, barlyq jobalar iriktelip tańdalady, tıisti memlekettik saraptamadan ótkiziledi. Atalǵan jobalar jeke kásipkerlerdiń qatysýymen júzege asady. Eski kásiporyndardy ákelýge komıssııa jol bermeıdi, – dedi E.Kósherbaev.
Indýstrııa jáne ınfraqurylymdyq damý vıse-mınıstri Amanııaz Erjanovtyń aıtýynsha, eki el arasyndaǵy ındýstrııalandyrý jáne ınvestısııa salasyndaǵy baılanysty shekti kelisim aıasynda damytý josparlanǵan. Sonyń negizinde quny 27,5 mlrd dollardy quraıtyn 55 birlesken joba iske asyrylmaq.
– Bul jobalar kólik qurastyrý, qurylys ındýstrııasy, agroónerkásip keshenin damytý, hımııa jáne farmasevtıkalyq ónerkásip, munaı-gaz sektory syndy birneshe baǵytpen baılanysty. Sonyń ishinde Indýstrııa jáne ınfraqurylymdyq damý mınıstrligine tikeleı 27 joba bekitilgen. Olardyń jalpy quny 19,6 mlrd dollardy quraıdy. Osynyń nátıjesinde shamamen 15 myń jańa jumys orny ashylady dep kútilýde, – dedi A.Erjanov.
Vıse-mınıstr 55 jobanyń ishindegi 7-ýi Aýyl sharýashylyǵy mınıstrligine, 20-sy Energetıka mınıstrligine, sondaı-aq taǵy 1 joba «Astana» halyqaralyq qarjy ortalyǵyna qarasty ekenin aıtty. Buǵan qosa spıkerler osy arqyly otandyq mamandardyń biliktiligin kóterip, sheteldik jumys kúshiniń sanyn azaıtý qarastyrylǵan dep sendirdi. Úkimet ókilderi atalǵan tizimnen perspektıvasy joq jobalar alynyp tastalǵanyn da atap ótti. Máselen, tamyzdyń sońynda 7 joba maquldanbaı qalǵan. Oǵan jumys qarqynynyń baıaýlyǵy sebep bolypty. Tıisinshe olardyń ornyn quny 763 mln dollardy quraıtyn jańa jobalar almastyrǵan.
Budan basqa otandyq basym ınvestısııalyq jobalar jaıly aqparattyń ashyqtyǵyn qamtý maqsatynda Syrtqy ister mınıstrliginiń alańynda aqparattyq kezdesýler ótkizý kózdelip otyrǵany aıtyldy. Osylaısha qoǵam ishindegi daqpyrt áńgimelerge tosqaýyl qoıylmaq.
Brıfıngte málim bolǵandaı, Qazaqstanǵa ınvestısııa tartý boıynsha aldyńǵy qatarda Nıderland memleketi jaıǵasqan. Qyzǵaldaqtar eli otandyq ekonomıkaǵa barlyǵy 87 mlrd dollar quıǵan. Ekinshi satyda 37 mlrd dollar salǵan AQSh ornalasqan. 27 mlrd dollar ınvestısııa quıǵan Shveısarııa úshtikti támamdasa, Qytaı 17 mlrd dollarmen 4-shi orynda ornalasqan.
