«Jalpy, energııa kózderiniń qoımalarynda qazirgi tańda 3,7 mln tonna kómir qory jınaqtalǵan. Bul kómir qory ótken jylmen salystyrǵanda 21%-ǵa artyq. 103 myń tonna mazýt qory bar, bul ótken jylmen salystyrǵanda 24%-ǵa artyq. Búgingi kúngi jınaqtalǵan otyn qory jylý kezeńin bastaý úshin jetkilikti», — dedi S. Súleımenov.
Onyń aıtýynsha, energetıkalyq kásiporyndar otyndy kelisimshart boıynsha bekitilgen kestege sáıkes satyp alady.
Sonymen qatar S. Súleımenov tótenshe jaǵdaı saldarynan adamdardyń elektr togynan zardap shegý qaýpin boldyrmaý jáne órttiń shyǵýynyń aldyn alý maqsatynda Arys qalasynyń jaryq taratý jelileri basty shaǵyn stansııadan kesilgenin aıtty. Arys qalasyna qyzmetkerler kirgizilgen soń apat saldaryn qalpyna keltirý jumystary júrgizildi. Bıyl 26 maýsymda qalany jaryqtandyrý tolyq qalpyna keltirildi.
«28 maýsymda Arys qalasyn jáne Arys aýdanyn elektrmen jabdyqtaýdyń taratylýyn qalpyna keltirý boıynsha jóndeý jumystary aıaqtaldy, qazir Arys qalasyndaǵy energııa nysandary jylý maýsymyna ázir», — dep sendirdi ol.
Qaladaǵy jylýmen qamtý tehnologııalyq jelisinde zaqymdanýlar baıqalmady. Búgingi tańda qazandyqtarda otynnyń 75%-y daıyndalǵan.
Arys qalasy boıynsha tutynýshylar sany 9 765 abonent, onyń ishinde 92 áleýmettik nysan bar: mektepter sany — 28, aýrýhanalar — 20, balabaqshalar — 28, meshitter — 10, ákimshilik ǵımarattar — 6.
