Qorǵanys mınıstriniń basshylyǵymen ótken saltanatty sharaǵa Qorǵanys mınıstrligi men Bas shtabtyń basqarý quramy, Qarýly Kúshterdiń ásker tekteri qolbasshylary men túrleriniń bas qolbasshylary, bólimsheler qurylymynyń basshylary qatysty.
Qorǵanys vedomstvosynyń basshysy marapattaý júldelerin áskerı salada jeke jáne komandalyq esepte úzdik óner kórsetken, kásibıligin dáleldegen 13 áskerı qyzmetshige tabystady.
«I dárejeli El qorǵany» vedomstvo medali «Avıadarts» halyqaralyq saıysynyń maıdandyq avıasııasynyń ushqyshtary maıor M.Dáýletbaev pen D.Korobkınge, «Áskerı-medısınalyq estafeta» qatysýshysy dáriger-hırýrg medısınalyq qyzmetiniń kapıtany A.Tańatarovaǵa, «Suńqar ańshylyǵy» ushqyshsyz ushatyn apparaty shtýrman bóliminiń aǵa leıtenanty M.Bespaevqa tabys etildi.
Al «II dárejeli El qorǵany» vedomstvo medali «Tank bıatlony» konkýrsynyń qatysýshylary aǵa serjant A.Alpamysov pen A.Shoınbaevqa, «Qarý sheberi» saıysynan aǵa serjant E.Bektasovqa, «Artıllerııalyq oq atý sheberlerin» saıysynan serjant G.Dáýletov pen efreıtor G.Ábdirahmanovqa, «Mergen shebi» jarysynda kishi serjant A.Ádilov pen efreıtor D.Ilınovke, «Senimdi qabyldaý» boıynsha kishi serjant D.Seısebaev jáne «Álem jaýyngeri» saıysynyń qatysýshysy efreıtor M.Safakovaǵa buıyrdy.
«Halyqaralyq armııa oıyndaryna qatysý barlyq sanattaǵy áskerı qyzmetshilerdiń kásibı daıyndyǵynyń mańyzdy jáne praktıkalyq quramdas bóligi bolyp tabylady. Olardyń kásibı mansaptyq ósýine jáne oqý kezeńinde yntalandyrýǵa qosymsha jaǵdaı jasaıdy. Sondyqtan jarysqa jaqsy daıyndalǵan jeke quram qatysty», dedi óz sózinde Qorǵanys mınıstri Nurlan Ermekbaev.
Aıta keteıik, 2019 jyldyń 3 jáne 17 tamyzy aralyǵynda mereıtoılyq besinshi Armııalyq halyqaralyq oıyndary ótti. 32 konkýrstan turǵan jarys 10 eldiń 21 áskerı polıgonynda boldy.
Qazaqstan Qarýly Kúshteriniń quramasy 32 konkýrstyń ishinen 16-syna qatysyp, úzdik oıyn kórsetken qurama retinde tanyldy.
Bizdiń áskerı qyzmetshiler jarystyń alǵashqy kezeńinen-aq basa ozyp, úzdik úshtiktiń qatarynan kórindi. Nátıjesinde Armııalyq halyqaralyq oıyndardyń jalpy qorytyndysy boıynsha qazaqstandyq áskerı qyzmetshiler 39 memlekettiń arasynan komandalyq quramda úshinshi orynǵa turaqtady. Baıraqty básekede elimizdiń quramasy tek Reseı men Qytaı komandasyna basymdyq berdi.
