Daýys berý nátıjesi boıynsha Assambleıa músheleri elimizdegi bas olımpıadalyq vedomstvo basshysyn taǵy da tórt jylǵa saılady. Tımýr Asqaruly bul qyzmetke alǵash ret 2015 jyly taǵaıyndalǵan bolatyn.
«Artta qalǵan tórt jyl ishinde qazaqstandyq sporttyń damýynda úlken ózgerister baıqaldy. Ásirese, memlekettik qurylymdar, Ulttyq Olımpıadalyq komıtet jáne ulttyq sporttyq federasııalardyń birlesken jumysynyń arqasynda kóptegen is tyndyryldy. Barlyq deńgeıdegi tyǵyz qarym-qatynas ornatý progreske jeteledi, sondyqtan, árbirińizge – sporttyń olımpıada túri boıynsha komanda basshysynan sport dárigerine deıin, federasııanyń bas hatshysynan menedjerge deıin, sport kıimderin úlestirýge jaýapty adam, jalpy, barlyq sportshyǵa, ata-anasy men atletterdiń bapkerlerine alǵys aıtamyn. Barlyq jetistik bizdiń ortaq jeńisimiz. Búginde Qazaqstan UOK – rasymen de halyqaralyq sport qaýymdastyǵynyń mańyzdy múshesi jáne álemdiń sport uıymdarynyń senimdi seriktesi. Qazaqstan UOK tórt jylda úlken jumys tyndyrdy. Alaıda, otandyq sporttaǵy fýndamentaldy ózgeristerge qaramastan, bul is tek bastamasy ǵana. Alda jaýapty sharalar men jańa belester. Qazaqstandaǵy sportty damytý úshin eńbektene beremiz», dedi Qazaqstan UOK qaıta saılanǵan basshysy Tımýr Qulybaev.
Otyrys barysynda UOK-tyń otandyq sport júıesin túbegeıli ózgertken tórt jylǵy jumysy qorytyndylandy. Sport máseleleri boıynsha zańnamalarǵa túzetýler engizilip, olar 2018 jyly kúshine endi; UOK birinshi ret memlekettik tapsyrys oryndaýshysy boldy.
Bul ulttyq sport federasııalarynyń tıimdiligin arttyrdy. Sport túrlerin retteý múmkin boldy, nátıjesinde qarjylandyrý kólemi jetistikterge, buqaranyń jumyldyrylýyna, kadrlarmen, sporttyq bazalar qamtylý jáne ózge faktorlarǵa baılanysty boldy. Sybaılas jemqorlyq táýekeli tómendedi, olımpıadalyq sportta qarjy aǵyny aıqyn bola bastady, qolma-qolsyz eseptesýge aýysyp jatyr.
Qazaqstan UOK sybaılas jemqorlyq táýekeline saraptama jasaý jóninde bastama kóterdi, Sybaılas jemqorlyqqa qarsy yqpal etý agenttigi alǵash ret memlekettik emes uıymda osy baǵytta jumys istedi. Olımpıada komıtetiniń shynaıy jáne taza sportqa búırek burýy uıym jumysynyń barlyq salasynda kórinis taýyp keledi. UOK prezıdentiniń tikeleı tapsyrmasy boıynsha sporttyń olımpıada túrleri boıynsha qurama komandalardy oqý-jattyǵý jıyndary men jarystar kezinde sapaly medısınalyq qadaǵalaýmen qamtamasyz etýge baǵyttalǵan joba jasalyp, búginde júzege asyryla bastady. Keshendi ǵylymı toptarǵa dárigerler, manýaldy terapevter men dıetologtar, bıohımıkter, massaj jasaýshylar kiredi, búginde qurama komandalarmen 123 maman jumys isteıdi, eldegi jáne sheteldegi sharalarǵa sportshylardyń janynda bolady. UOK Qazaqstan ulttyq andıdopıng ortalyǵymen tyǵyz qarym-qatynas ornattty.
Kóptegen sporttyń olımpıada túrleri boıynsha komandalar jıyn ótkizetin Dúnıejúzilik boks akademııasy negizinde zamanaýı ProSport sport medısınasy, saýyqtyrý jáne daıyndyq ortalyǵy ashyldy. Jańa tehnıkalyq jabdyqtarmen qamtylǵan, qyzmet aıasy keń, ázirge Qazaqstanda balamasy joq ortalyq 27 qyrkúıekte ashylady dep josparlanyp otyr. Osy ýaqytta HOK álemge tanymal spıkerleriniń qatysýymen sport medısınasy boıynsha halyqaralyq konferensııa ótedi.
Búginde 10 ulttyq federasııanyń ókilderi óz sport túrleri boıynsha halyqaralyq federasııanyń atqarýshy komıtetiniń, sondaı-aq, túrli komıssııalardyń quramyna enedi. Sondaı-aq, azııalyq uıymdarda da qazaqstandyq ókilder kóp. 14 ulttyq federasııa ókili qurlyqtyq uıymǵa múshe. Halyqaralyq sporttyq federasııalarda jas mamandardyń tájirıbe jınaýyna da úlken múmkinshilikter qarastyrylǵan.
Budan bólek, Qazaqstan UOK prezıdenti sporttyq federasııalar men klýbtardyń, qaýymdastyqtar men Konfederasııanyń jáne Qazaqstan UOK qyzmetkerlerin halyqaralyq «Bolashaq» baǵdarlamasy boıynsha dene shynyqtyrý jáne sport salasynda bilim alýy týraly bastamany kóterdi. Munyń bári otandyq sportty bilikti mamandarmen tolyqtyrýǵa arnalǵan qadamdar bolatyn.
UOK-tyń Olımpıadalyq yntymaqtastyq baǵdarlamasymen áriptestigi aıasynda sporttyq menedjerler men bapkerler aldyńǵy qatarly elderde biliktiligin arttyryp, tájirıbe almasýda.
Tek qana 2018 jyly 85 sportshy men 27 sport túrinen 205 jattyqtyrýshy Olımpıadalyq yntymaqtastyq baǵdarlamasynyń qatysýshysy atandy. Sporttyq uıymdardyń 207 ókili óz mamandyqtary boıynsha kýrstan ótti.
2015-2016 jyldary Qazaqstan UOK-ta rebrendıng ótkizildip, uıymnyń marketıngtik jáne ınstıtýtsıonaldy logotıpteri bekitildi. UOK saıty Olympic.kz tolyǵymen jańartyldy. Búginde bul olımpıadalyq sport túrlerine arnalǵan, kún saıyn 24/7 formatynda óz kontentin jańartatyn tolyqqandy aqparattyq portalǵa aınaldy. Munda sportshylardyń nátıjesi týraly jedel aqparattar, suhbattar, pikirler, anonstar men saraptamalyq maqalalar, foto jáne vıdeomaterıaldar jarııalanady.
