Birlesken oqý-jattyǵýlaryna Qazaqstan Respýblıkasy Áskerı-teńiz kúshteriniń «Oral», «Saryarqa», «Mańǵystaý» jáne «Qazaqstan» raketalyq-artıllerııalyq kemeleri Reseı Federasııasy Áskerı-teńiz kúshteriniń Kaspıı flotılııasymen birge qatysýda.
Oqý-jattyǵýlar Kaspıı teńiziniń qazaqstandyq akvatorııasynda ótip, 22 qyrkúıekke deıin sozylady. Jýyrda Aqtaý qalasynyń portyna reseılik «Tatarstan» kemesi men «Stýpınes» kateri, sonymen qosa 2 gıdrografıkalyq keme, raketalyq jáne reıdtik traldar, qutqarý býksıri men kishi tanker kelgen bolatyn. Oqý-jattyǵýlarǵa Qazaqstan Áskerı-teńiz kúshteriniń bas qolbasshysy, kontr-admıral Sáken Bekjanov jeke basshylyq etýde.
– Jattyǵý barysynda Qazaqstan men Reseı Áskerı-teńiz kúshteri birikken toptarynyń jańa urys formalary men ádisterin zerdeleýge basty nazar aýdarylmaq. Eki eldiń teńizshileri arnaıy operasııalar men urysty júrgizý boıynsha birqatar máseleni pysyqtap, kemelerdiń birlesken is-qımyldaryn, tapsyrmany oryndaý ornyndaǵy manevrlerdi júzege asyratyn bolady. Osy jattyǵýlardyń nátıjesinde eki eldiń birikken shtabtarynyń úılesimdiligi baǵalanyp, ofıserlerdiń biliktilik deńgeıi synǵa alynady, – deıdi birlesken oqý-jattyǵý jóninde aqparat bergen kapıtan R.Igısınov.
Qazaqstandyq jáne reseılik áskerı teńizshiler birikken oqý-jattyǵýlardan bólek, Halyqaralyq armııalyq oıyndary barysynda ózara is-qımyldardy birlese ótkizip, mashyqtaný sheberlikterin jetildirip keledi.
Mańǵystaý oblysy
