Úsh qabatty eńseli úıdiń aldynda turyp alǵash bolyp sóz alǵan zańǵar jazýshynyń rýhanı aǵasy, qazaq ádebıetiniń klassıgi Ábdijámil Nurpeıisov tebirenterlik estelik aıtty. «Búgin biz qazaq halqynyń teńdesi joq súıikti uly Ábish Kekilbaıuly turǵan úıdiń aldynda bas qosyp turmyz. Bul úı barsha halqymyz úshin orny bólek tarıhı úı. Bul – Ábishtiń shańyraq kóterip, urpaǵy ósip, órisi keńigen úıi. Ol kezde Ábish jas, anasy Aı-apa tyń, osynda qan maıdanda qaza tapqan Kekilbaıdyń urpaǵy birinen keıin biri dúnıege keldi. Ábishtiń alǵashqy óleńder jınaǵy da, tuńǵysh prozalyq týyndylary toptasqan «Bir shókim bult» ta, «Shyńyraý», «Ańyzdyń aqyry» da osy úıde dúnıege keldi. Tanymy tereń, zerdesi bıik jas Ábishtiń qazaq ádebıetindegi qubylys bolyp qalyptasýyna da, uly jazýshy bolyp tanylýyna da osy úı kýá», dedi qart qalamger Á.Nurpeıisov tolqyp turyp.
Eskertkish taqtanyń betin búrkegen aq shymyldyqty Á.Nurpeıisov, jary Klara Jumabaeva, qalamdas dostary Tólek Ábdik, Qajyǵalı Muhametqalı túsirdi. Izdep kelgen joldastaryna, qurmettep shaqyrǵan aǵalaryna, izinen ergen inilerine qonaqjaı úı ıesi retinde esigin ózi ashyp, qushaǵyn jaıa qarsy alyp, kishipeıil minez ben kisiliktiń úlgisin kórsetken taý tulǵanyń esimi eshqashan kómeskilenbeıdi. Talantqa taǵzym etken zamandastary bólisken estelikter osylaı túıindeldi.
