Kıno • 24 Qyrkúıek, 2019

Álmıra Tursyn: Meniń ishimde óz Tomırısim ómir súredi

789 ret kórsetildi

Túbi bir túrki jurtynyń tutastyǵy jolyna ǵumyryn arnap, taǵdyryn qıǵan dańqty qolbasshylar, jaýjúrek batyrlar tulǵasy tarıh úshin qashanda qasterli. Ýaqyt-aǵzam alaqanynda áldeqashan jazylyp qalǵan aqıqat keıingi urpaqqa ǵumyrlyq taǵylym desek te, sol dala danyshpandaryn laıyqty deńgeıde ulyqtaı alyp jatyrmyz ba?!  Buǵan Elbasy Nursultan Nazarbaev ta «Uly dalanyń jeti qyry» baǵdarlamalyq maqalasynda erekshe toqtalyp: «Bizdiń dańqty batyrlarymyz, oıshyldarymyz ben el bıleýshilerimiz – tek Qazaqstan ǵana emes, sondaı-aq búkil álem boıynsha elikteýge laıyqty tulǵalar» – dep, óskeleń urpaqtyń tanymyn taǵylymdy tarıhpen sýaryp, patrıottyq rýhta tárbıe alýyna, jas óskinder sanasyna ult qaharmandaryn úlgi tutý úrdisin qalyptastyrýǵa jol ashatyn sapaly fılmder men sahnalyq qoıylymdardy jaryqqa shyǵarý jumystaryna barynsha nazar aýdarý kerektigin aıryqsha atap ótken bolatyn. Usynys baıandy bastamalarǵa arqaý bolyp, ulttyq kınematografııa birneshe sapaly kórkem týyndymen tolyǵyp úlgerdi. Sonyń biri –  «Tomırıs» fılmi.       

«Tomırıs» kıno tilinde sóıleıdi» degen aqjoltaı habardy estigennen bastap-aq premera kúnin kópshilik qaýym asyǵa kútti. Ásirese basty róldi somdaıtyn aktrısanyń tańdalýy qyzý talqyǵa túskeni de umytyla qoıǵan joq. Qazaqstandy bylaı qoıǵanda, ataǵy kúlli túrkini sharlap ketken týyndy halyqtyń tól tarıhyn tanýǵa degen ynta-yqylasyn áıgilep berdi. Sanaýly kúnnen keıin otandyq rejısser Aqan Sataevtyń kórkem saraptaýynda kópshilikpen qaýyshqaly otyrǵan kartınada basty róldi kıno álemindegi jańa esim – Álmıra TURSYN somdaıdy. Aty ańyzǵa aınalǵan áıgili Saq patshaıymyn óz bıiginde beıneleý jolynda ter tókken aktrısamen fılm tusaýkeseri aldynda jolyǵyp, az-kem oı bólisýdiń sáti túsken edi.

 

– Álmıra, alda ulttyq kıno ónerin­degi aıtýly oqıǵa – kópten kútken «To­mırıs» fılminiń tusaýkeseri kele jatyr. Qandaı sezimdesiz?

– Senesiz be, sózben aıtyp jetkizgisiz qyzyq bir kúıde júrmin.  Qorqynysh ta, tolqý da bar. Ony áli ózim de tolyq túısinip, sezip úlgergen joqpyn. О́ıt­­keni «Tomırıs» meniń úlken kıno­daǵy debıýtim. Alǵashqy tájirıbe bolǵan­dyq­tan, aldyn ala boljamaı, barlyq emosııany sol tusaýkeser kúnine qaldyrǵym keledi. Fılmniń qalaı bolatyny maǵan da qyzyq. О́ıtkeni sizder sekildi men de «Tomırıstiń» tolyq nusqasyn áli kórmedim. Alla jazsa, premera kúni kó­rermen bolyp baramyn (jymıdy).

– Qazaq qyzdarynyń ishinde Tomı­rıs, Zarına patshaıym bolýdy armandamaıtyn arý joq shyǵar. Shynyńyzdy aıtyńyzshy, qııalyńyzda bol­syn bul róldi armandap pa edińiz?

– Joq, naqty Tomırıs bolýdy arman­daǵan emespin. Biraq men úshin kıno keńistigi qashanda qyzyq bolatyn. О́zimdi kameranyń aldynda synap kórsem degen ishteı bir tilegimniń bolǵanyn jasyrmaımyn.

Kásibı aktrısa bolmasam da, foto­sýret­terimdi kórip, stýdent kezimnen-aq prodıýserler kastıngke jıi shaqyryp turatyn. Alaıda meni qyzyqtyratyn laıyqty joba kezdespedi. Sondyqtan kınoaktrısa bolsam degen tilegim tek arman kúıinde qalyp qoıdy. О́zimniń kúndelikti jumystarymmen aınalysyp júrip, tipti ol armanymdy umytyp ta ketippin. Sodan bir kúni kútpegen jerden «Tomırıs» fılminiń kastıng dırektory Jaına Ábdıevadan shaqyrý kelip tústi. Onyń ózinde naqty eshqandaı ýáde bermedi, tek irikteýge qatysyp kór­seńiz dedi. Ishteı biraz oılandym. Jol­dasymmen, anammen aqyldastym. Barlyǵy birden qoldap, irikteýden óte­tindigime sendirdi. Sol senim qanat biti­rip, kastıngke qatysýǵa bel býdym. Alla qoldap, sátin salyp, birneshe ke­zeńnen súrinbeı óttim. Sońynda, mine, ózderińizge málim bolǵandaı, Tomırıs róli buıyrdy. Alla jazsa, qyrkúıektiń 27-sinde fılmniń premerasy ótpek. Bizdiń jumys aıaqtaldy, endigi baǵany kórermen ózi beredi. Kópshiliktiń kóńi­linen shyǵady dep senemin.

– Irikteý qanshalyqty tartysty ótti? «О́tpeı qalam-aý» degen ishteı bir qorqynysh bolmady ma?

– Kastıng kezinde úmitkerdiń árqaı­sysyna jekeleı qarym-qatynas jasaldy. Sondyqtan bolar, barlyǵymyz ózimizdi Tomırıs sezindik. Al fılmge naqty kimniń bekitilgendigi jaıly sońǵy kúnge deıin aıtylmady. Aqparat qupııa bolǵan saıyn márege jetý qyzyqty boldy. Árıne alǵash kastıngke kelgen kezde syrtqy kel­betimdi kórip, minezimdi saralaı, áń­gimelese kele atalǵan rólge salystyrmaly túrde kóp múmkindik men­de ekendigi aıtyldy. Biraq resmı túrde naqty sheshim shyqpaǵannan keıin sońyna deıin senimsiz júrdim. Onyń ústine «Eger bekitile qal­sam, ataǵy álem­ge jaıylǵan patshaıymdy qalaı saraptaımyn?» degen myń san suraq taǵy mazalady. Júreksingenimdi de jasyrmaımyn. О́ıtkeni Tomırıs róli men úshin úlken jaýapkershilik boldy. Halyq meni qalaı qabyldaıdy dep oılaı berdim. Biraq keıin tańdaý jasalyp, fotosýretim kópshilik nazaryna usynylǵan kezde, áleýmettik jelide jazylǵan jyly le­biz­derdi kórip qanattanǵandaı boldym. Pikir qaldyrǵandardyń jazbasynan: «Na­ǵyz Tomırıs osyndaı-aq bolsa kerek!», «Fılm­di asyǵa kútemiz!» degen syndy oń pikirler jańasha bir shyǵar­mashylyq tynys syılady. О́zime degen senimim qaı­ta oralyp, silkinip aldym desem artyq emes. Osyndaı tamasha sezimde túsirilim jumysyna kirisip kettik.

– Rasymen de túr-álpetińiz erekshe. Tipti ǵalamtorda sýretińiz alǵash jarııalanyp, halyq arasyna tarala bastaǵan kezde de «Tomırıs róline tań­dalǵan aktrısa qazaq emes eken» degen pikirler kóp aıtylyp jatty...

– Iə, solaı boldy. Jáne kópshiliktiń ol pikiri negizsiz emes. О́ıtkeni meniń bo­ıymda birneshe ulttyń qany bar. Iаǵnı, metıspin. Biraq ózimdi tolyqtaı qazaqpyn dep esepteımin. О́ıtkeni eki ájem de qa­zaq. Almaty qalasynda týyp-óstim. Mek­tepti de sonda bitirdim. Bizdiń áýlet ult­tyq qalyp pen salt-dástúrdi berik us­tanǵan naǵyz qazaqy otbasy boldy. Je­ti jasyma deıin ájemniń qolynda ós­tim. Al tek, tárbıe degenimiz negizinen áıel, anaǵa da tikeleı baılanysty ǵoı. Əkem de, anam da qazaq otbasynda ósip, qa­zaqsha tərbıelengen. Biraq atalarym bas­qa ulttan. Əkemniń əkesi, ıaǵnı óz atam ta­tar ultynan bolsa, anamnyń ákesi evreı qanynan. Eger bıologııalyq turǵydan tar­qatar bolsaq, onda árıne, boıymda úsh ult­tyń – qazaq, tatar jáne evreı qany bar. Bi­raq men ózimdi es bilip, aqyl toqtatqaly be­ri qazaqpyn dep tanydym. Sondyqtan «Ultyń kim?» dese, berer jaýabym jalǵyz – qazaq.

– Sizdiń saraptaýda Tomırıske qaı qyrynan basymdyq berildi:  jaýyn­ger Tomırıske me, álde əıel, ana Tomı­rıske me?

– Meniń áý bastaǵy maqsatym – keıip­kerimdi jan-jaqty kórsetý bolatyn. Árı­ne shamamnyń, tanym-túısigimniń jet­keninshe Tomırıske san qyrynan ke­lýge tyrystym da. Tórtkúl dúnıege tań­­daı qaqqyzǵan patshaıymnyń ańyzǵa ber­gisiz tańǵajaıyp erligin ǵana emes, ana retindegi meıirimi men áıeldik názik tabıǵatyn da keıipkerimniń ón boıyna birdeı toǵystyrýǵa talpyndym. Sebebi Tomırıs jaýjúrek batyrdan buryn, eń áýeli júregi jumsaq, jany názik áıel, meıirimdi ana ǵoı. Barlyq áıel zaty sekildi ol da rııasyz súıispenshilikti, myzǵymas otbasylyq mahabbatty armandady. Biraq ol kezdegi jaǵdaı, zamana zańy taldyrmash talaı Tomırısti erkinen tys atqa qondyryp, el tutastyǵy jolynda qaıratty bolýǵa qaırady. Erlermen ıyq tirestire júrip, shaıqasýdan ózge tańdaý qaldyrmady. Eger beıbit zaman bolsa, Tomırıs te kóp áıeldiń biri bolyp, otbasy baqytyn bárinen bıik qoıatyndyǵyna senemin. О́ıtkeni onyń oıy emes, ómiri osyndaı sheshimderge alyp keldi. Fılmde sony kórsetýge tyrystym. Jetkize aldym ba, joq pa – ol jaǵyna endi kórermen tó­reshi. Semiz aıtyp, aryq shyǵýdan qor­qamyn. Son­dyqtan barlyǵyn premera kúni ózderińiz kórip, baǵasyn berersizder.

– Al ózińizdiń ón boıyńyzda Tomı­rıspen qandaı uqsastyqtar bar dep oılaısyz? Jalpy, qazir Tomırıs sııaq­ty qyzdar bar ma?

– Búgingi beıbit ómirimiz úshin Ja­rat­qanǵa myń da bir shúkir deımin. Er­ke­lep, naǵyz áıeldershe ádemi ǵu­myr ke­ship jatsaq, ol osy myzǵymas tynysh­tyǵymyzdyń arqasy dep bilemin. Osy beıbitshiligimiz laıym uzaǵynan bolǵaı. Qudaı betin aýlaq qylsyn, biraq el úshin qandaı da bir qıyn jaǵdaı bola qalsa, kez kelgen qazaq qyzy Tomırıstiń erligin qaıtalaıdy dep senemin. Desek te ár za­mannyń óz talaby bar ǵoı. Ot­ba­syn asyraý jolynda qoǵamdyq ju­mys­tarǵa belsene aralasyp, erlermen teń dárejede eńbek etip, úıdegi bala tárbıesine de, túzdegi qyz­metine de birdeı úlgerip júrgen qyz­dardyń erligi búgingi zamanǵa saı tomı­rıstik tulǵany tanytýǵa tolyqtaı ólshem dep oılaımyn. Tipti keıbir kezde ózim de Tomırıs sııaqty bolyp ketemin (kúldi). Oǵan fılmniń de áseri bolýy múmkin.

– Qalaısha?

– Negizi men ózimdi názik qyzdardyń qataryna jatqyzamyn. Biraq «Tomı­rıs» fılmine túskeli beri jańa qyr­la­rymnyń ashyla bastaǵanyn baıqa­dym. Ony jaqyndarym da aıtty. To­mırısti oınaǵaly minezimde myq­ty­­lyq, táýekelshildik paıda boldy. О́ıt­­keni birneshe aı boıy túsirilim ala­ńynda Tomırıs bolyp ómir súrgennen keıin, bar bolmysyń keıipkerińmen bir­tutas álemge aınalyp ketedi eken. Tomırısten kóp nárse úırendim. Sózben sýrettep jetkizgisiz ǵalamat áser aldym. Keıipkerimniń bolmysyn qabyldaǵanym sonshalyq, túsirilim jumystary bitken soń biraz ýaqyt óz-ózime kele almaı júr­dim. Bilesiz be, áli fılm jaryqqa shyǵyp úlgergen joq, al men túsirilim alańyn saǵynyp úlgerdim. Keıipkerim de, ondaǵy atmosfera da, kınodaǵy seriktesterim de, shyǵarmashylyq túsirý toby da maǵan kóp nárse úıretti.

– Rólge qalaı daıyndaldyńyz? Ta­rı­hı kitaptar oqyp, arnaıy mamandarmen, keńesshilermen jumys isteýge múmkindik boldy ma?

– Tarıhı fılm bolǵandyqtan, at­qa otyrý, qarý ustaý syndy shaı­qas qımyl­daryn úırený, sekirý jattyǵý­larymen aınalysýǵa basymdyq berip jiberdim be, alǵashqy kezderde arna­ıy arhıv aqtaryp, tarıhty tereń tanýǵa múmkindik bolmady. Álbette nıet bol­ǵanymen, ýaqyt mursat bermedi. Con­daı bir qyzý daıyndyq ústinde taıyp qulap, aıaǵymdy syndyryp aldym. Bir aıdan asa ýaqyt tapjylmastan tósek tartyp jatýǵa týra keldi. Sol kezde Ge­rodottan bastap tarıhty jazǵan talaı avtordyń eńbekterimen tanysyp shyq­tym. Ásirese Bolat Jandarbekovtiń «Saqtar» dılogııasynyń «Tomırıs» ata­latyn birinshi kitaby arqyly kóp máli­metke qanyqtym. Bul synaqty Ja­rat­qannyń maǵan izdenis úshin bergen bir múmkindigi dep qabyldap, osy ýaqyt ishin­de obrazymdy oısha júıelep, minez erekshelikterin ekshep úlgerdim. Árıne meniń bulaısha aıaqasty jaraqattanyp qalýym túsirilim tobyn biraz sarsańǵa da saldy. О́ıtkeni jattyǵý jumystary aıaqtalyp, túsirilim prosesiniń bastalýyna sanaýly kún qalǵan bolatyn. Al meniń tósekke tańylýym sol jospardyń kúl-talqanyn shyǵardy. Tipti túsirilimge jaramaıtyndaı jaǵdaıda basqa aktrısa tabýǵa ýaqyt tym tapshy edi. Eger tabyla qalsa, rejısser she­shimine túsinistikpen qaraýǵa da daıyn boldym. О́zimdi ishteı soǵan da­ıyndadym. Tipti aýyryp jatyp: «Múmkin bul meniń jolym emes shyǵar. Kınoǵa adasyp kelgenimdi Jaratqan osylaı aýyrtyp kórsetip jatqan bolar» degen oılar da bir sát maza bermedi. Sondaı san túrli sezim ústinde: «Meniń jaǵdaıymda Tomırıs ne ister edi?» degen oı keldi. Dál sol kezde ishimdegi qalǵyp ketken Tomırıs oıandy. Dereý ózimdi jınap aldym. «Tomırıs jeńilmes edi!» dedim ishteı nyq bekip. Keıipkerimnen berilgen tegeýrin sóıtip meni túsirilim alańyna qaıta alyp keldi.

– Al túsirilim barysynda qandaı qıyndyqtarmen betpe-bet keldińiz?

– Shyǵarmashylyq jumys bolǵannan keıin túsirilim bastalǵannan aıaqtalǵanǵa deıingi kez kelgen áreketiń jaýapker­shi­lik. Túrli qıyndyqtar kezdesip jatty. So­nyń ishinde soǵys qımyldaryna úıre­ný qajyrly kúsh-jigerdi talap etti. Bi­raz ýaqyt áskerı jattyǵý lagerinde turyp, arnaıy tájirıbeden óttik. Dál áskerdegideı boldy. О́zimdi solaı se­zindim. Odan keıingi meni túbegeıli iz­de­niske ıtermelegen taǵy bir jaıt – kóne túrik tiliniń erekshelikterin ıge­rý boldy. Qoldanysymyzda bolma­ǵan­nan keıin biraz qıyndyqtar kezdesti. Arnaıy til mamandarymen, tarıhshy­larmen jumys isteýge týra keldi. Bas­tapqyda qınalǵanymmen, keıin sóılep jattyqqannan soń til áýezinen keremet lázzat aldym. Beıne bir saq dáýirinde júrgendeı ózime degen senim paıda boldy. Sebebi kóne túrik tilinde sóılep júrip sol dáýirdiń sol kóńil kúıin qatar ustaısyń. Til úırenýdegi jańa tájirıbe ózime qatty unady. 

 – Sonda fılm tek kóne túrik tilin­de túsirildi me?

 – Iá, kóne túrik jáne kóne parsy tilderinde túsirildi. Bul da jumysqa tamasha atmosfera beredi eken. Buǵan deıingi qazaq fılmderine uqsamaıdy. Túsirilim bitkennen keıin taspada ja­zylǵan úzin­dilerdi kórip shyqtym. Keremet áser etti. Keıipkerlerdi kóne túrik jáne parsy tilderinde sóıletý kartınanyń aıtýly erekshelikteriniń biri dep oılaımyn. Oqıǵa erte ǵasyrlarda ótip jatyr eken dep senip qalasyń. Bul – rejısser tarapynan tabylǵan oń sheshimderdiń biri ekeni sózsiz.

– Tarıhı fılmniń sátti shyǵýynyń taǵy bir syry – sýretshilerdiń sheber­ligi hám sezimtaldyǵy ekeni talassyz. Osy oraıda Saq patshaıymy kıimde­riniń ereksheligi jaıly bilgimiz keledi. Kostıýmderdi kim tikti?

– Fılmdegi barlyq kostıým Əsel Shalabaeva bastaǵan talantty kásibı sýretshilerdiń qolynan shyqty. Tarıhty jiti zerttep, sol dáýirdiń stılin barynsha ustanýǵa tyrysty. Kostıýmderdiń barlyǵy taza tabıǵı materıaldan tigildi. О́rnekteri de ár detaline deıin oılas­tyrylyp, qoldan jasalyp shyqty. Son­dyqtan bolar ol kostıýmder kórer kózge ǵana ásem emes, denege kıgen kezde de qonymdy, júris-turysqa yńǵaıly boldy. Beıne bir tarıhtan, sol dáýirden kelgen kıimder sııaqty áser etti. Bul da fılmde óte úlken ról oınady. О́zimdi naǵyz Saq patshaıymyndaı sezindim.

– Álmıra, sizdi joly bolǵysh adam deýge bolatyn shyǵar. Kásibı akter­lerdiń ózi kınodaǵy rólin shaǵyn epı­­zodtardan bastap jatady. Al siz bir­­den tarıhı fılmdegi basty rólge tań­­­daldyńyz. Onyń ústine búginde kıno keńistiginde esimi jıi atalyp, kó­­rer­men yqylasyna bólenip júrgen trendtegi rejısserlerdiń biri Aqan Sataevpen tandemde jumys isteý múm­kin­digi buıyrdy...

 ­– Onyńyz ras. Allaǵa myń márte shúkir deımin. Aqan aǵa eń áýeli tamasha adam, sodan keıin jaqsy maman. Adamgershiligi zor, maqsaty bıik. Muny rejıssermen sóılesken kez kelgen adam sezedi. О́zinen de, sózinen de jyly lep esip turady. Kıno alańynda júrip kóp nárse úırendim. Bilmegen, olqy túsip jatqan tustarda túsinistik tanytyp, qoldaý bildirdi. Kásibı aqylyn aıtty. Aqan aǵa eshqashan «myna kórinisti durys shyǵarmadyń» dep uryspaıdy, kerisinshe «barlyǵy jaqsy, tek endi bylaı kórsek qalaı bolady» dep jum­saq aıtyp otyryp túsindiredi, keıip­kerińniń maqsatyn uǵyndyrady. Bastap­qyda tek rejısserdiń aıtqanyn ǵana oryndap júrsem, keıin ýaqyt óte kele, túsirilim aıaqtalar shaqta tipti óz usy­nys­tarymdy aıtyp, shyǵarmashylyq ımprovızasııalarǵa barýǵa jarap qaldym. Bul da Aqan aǵanyń janynda júrgen áriptesterine, akterlerge senim syılaı alatyndyǵynyń arqasy. «Akterlerge aýyr sóz aıtsań oıy bólinedi. Sebebi ártis – bárin sezimmen, júrekpen jasaıtyn adam. Sol kóńildi aıalaý kerek» dep únemi aıtyp otyrady. Minezi jumsaq bola tura ishki tegeýrini myqty, tártipke qatal. Túsirilimdegi ár detalǵa mán be­rip, jumysyna úlken jaýapkershilik, yj­daǵatpen keledi. Rejısserdiń osyndaı bıik adamgershilik minezderin kórip, óziń de ishteı jınalasyń, shıryǵasyń, shı­raısyń. Men úshin Aqan aǵanyń qasynda jumys isteý úlken mektep boldy.

– «Tomırıs» fılmine túsý akter­lik təjirıbeden bólek taǵy ne berdi dep oılaısyz?

– Kınony kórý basqa da, onyń ishinde júrip, ishki prosesterine aralasý bólek álem. Jeke óz basyma «Tomırıs» kıno atalatyn ǵalamat keńistiktiń esigin ashyp berdi. Kásibı bilikti mamandarmen, tamasha akterlermen birge jumys is­teý baqyty buıyrdy. Qazaqy ádebı sóz saptaýdan bastap, adamgershilik, kásibı biliktilik turǵysynan árqaısysynan úırengenim kóp. Alǵash túsirilim ju­mystaryna kiri­ser kezde qatty júrek­sindim. О́ıtkeni arnaıy akterlik bilimim bolmaǵannan keıin, olqy túsip jatqan tustarda kásibı mamandar túsinistik ta­nyta qoıar ma eken dep tolqydym. Bi­raq alańdaýym beker eken. Kelgennen bar­lyǵy qushaq jaıa qarsy alyp, bilgenderin úıretti. Baqytyma oraı maǵan kil myqty seriktester jolyqty. Tamasha dostar taptym. Solarǵa qarap boı túzedim, bilmegenimdi úırendim. Barlyq túsirilim tobyna alǵysym sheksiz.

– Bilýimizshe, negizgi mamandyǵyńyz ekonomıst eken. Shyǵarmashylyq sa­la­ǵa qaı kezden bastap qyzyǵa bas­ta­dy­ńyz?

– Iá, áýelgi mamandyǵym – bıznes pen koýchıng. Ál-Farabı atyndaǵy Qa­zaq ulttyq ýnıversıtetiniń ekonomıka fakýltetinde oqydym. Keıin Máskeý memlekettik ýnıversıtetiniń magıstratýrasyn «Menedjment pen koýchıng» salasy boıynsha támamdadym. Úshinshi mamandyǵym – psıholog. Qaı salanyń da óz ereksheligi, qyzyǵy bar jáne bar­lyǵy bir-birimen óte tyǵyz baılanysty. Máselen, psıhologııa baǵytynda alǵan bilimim Tomırıs rólin shyǵarýǵa kóp kó­mektesti. Sondyqtan da men jalpy adam, maman retinde bir orynda qalyp qoıýdy qup kórmeımin. Men úshin ózimdi jetildirip, damytyp, beımálim, beıtanys salada synap kórý – jańa emosııalarǵa, ózińniń jańa múmkindikterińdi ashýyńa taptyrmas tájirıbe. Baǵytymdy túbe­geıli ózgertip, kıno salasyna kelýimniń basty sebebi osy adamı, rýhanı ishki suranystarymnyń arqasynda dep oılaımyn. Sondyqtan keleshekte múldem basqa qyrymnan tanyp jatsańyzdar, tańǵalmańyzdar (kúldi). О́ıtkeni meniń ómir súrý qalybym osyndaı.

 – Sózińizden túsingenimiz – óte táýe­kelshil, jańalyqqumar jan ekensiz. Basqa qandaı erekshe qyrlaryńyz bar? Tomırıs – Álmıra taǵy nege qyzyǵady?  

– Eń áýeli maǵan ómir súrýdiń ózi óte qyzyq. Sondyqtan ózimdi, ár kúnimdi únemi jańa emosııalarmen baıytyp otyrýǵa tyrysamyn. Bı bıleımin. О́leń jazyp, sportpen shuǵyldanǵan qatty unaıdy. Psıhologııalyq kitaptardy kóp oqımyn. Murajaı, sýret kórmelerine jıi baryp, ózimdi rýhanı turǵydan damytyp, ishki úndestikke umtylý da janyma rahat syılaıdy. Jalpy, maǵan qandaı da bir nárse qyzyq bolsa, ony sońyna deıin zerttep, tanyp-bilmeıinshe tynym tappaımyn. Al kerisinshe jaǵdaıda tipti kóńil bólip te qaramaımyn. Sondaı bir qyńyrlaý minezim bar (kúldi). Al jalpy adamdy damytatyn, ishki álemin baıytatyn shyǵarmashylyq jumystardyń barlyǵymen aınalysqan unaıdy.

 – О́leńdi qaı tilde jáne qandaı taqy­rypta jazasyz? 

– Ázirge orys tilinde jazyp júrmin. Aldaǵy maqsattarymnyń biri  – qazaq tilin ádebı deńgeıde erkin ıgerip, óleńdi qazaqsha jazý. Árıne oǵan biraz ýaqyt kerek. Biraq ózim qatty qyzyǵamyn. Demek, baǵyndyrýǵa bolatyn beles dep oılaımyn. Al óleńderimniń taqyryby negizinen Haq jolyn tabý, armanǵa sený, ómirdi súıý, jalpy áıel baqyty týraly. Aqıqatyna kelgende óleń degen belgili bir taqyryp pen qaǵıdaǵa tańylmaıdy ǵoı. Adam neni sezinedi, qandaı kóńil kúıde – sol aq qaǵaz betine túsedi. Ázirge meni tolǵandyryp júrgen taqyryp osylar.

– Al ózińiz armanǵa senesiz be?

– Árıne! Sirá da adam balasynyń armansyz kúni bolmas. Bala kúnimnen ertegi oqyp, ǵajaıyptarǵa senip óskenmin. Áli de sol qalpymdamyn. Tek qazir armandarymdy qııal kúıinde qaldyrmaı, maqsatqa aınaldyrýǵa tyrysamyn. Eń áýeli adam Allaǵa, sodan soń ózine, ishki túısigine sener bolsa, oryndalmaıtyn arman bolmaıdy. Qudaı ózi berekesin beredi.

– Bolashaqtaǵy armandaryńyz ne­men baılanysty: kıno salasymen be, álde bastapqy mamandyǵyńyz qyzy­ǵy­raq pa?

 – Ony endi ýaqyt kórsetedi. Jal­py men júregimniń qalaýymen ju­mys isteıtin adammyn. Sondyqtan ázir­ge maǵan kıno qyzyq. Alda jaqsy joba­larǵa usynys túsip jatsa, nege synap kórmeske?! Biraq óz mamandyǵym da unaıdy. Kim biledi, alda qos salany biriktirip, jańa bir óner oılap tabarmyn (kúldi). О́ıtkeni barlyǵy bir-birimen óte tyǵyz baılanysty. Durysy, muny ýaqyttyń enshisine qaldyraıyq.

 – Jaqsy jobalar dep qaldyńyz, bas­qa rejısserler tarapynan kelip tú­­sip jatqan qandaı da bir usynystar bar ma?

 – Árıne ondaı usynystar kóp. Kas­tıngke de jıi shaqyryp turady. Biraq «Tomırıstiń» jaryqqa sátimen shyǵyp, kórermenniń qabyldaýyn kórmeıinshe, basqa jobalarǵa ázirge shekteý qoıdym. О́ıtkeni alǵashqy jumysymnyń jemisin, halyq tarapynan baǵasyn kórip-bilip, qajetinshe nátıje shyǵarǵym keledi. Kóńilim qalaıtyn, janymmen úndesetin jaqsy joba kezdespeıinshe, asyǵys sheshimderge barǵym kelmeıdi. Ázirge ondaı ssenarıı kezdespedi. Bolashaqta jaqsy rejısserler tarapynan sátti jobalar bolyp jatsa, ózimdi nege taǵy da synap kórmeske?!

 – Áńgimeńizge rahmet.

 

Áńgimelesken

Nazerke JUMABAI,

«Egemen Qazaqstan»

Sońǵy jańalyqtar

Almatynyń 199 turǵyny koronavırýs juqtyrǵan

Koronavırýs • Búgin, 16:43

Úkimette KQK-daǵy jaǵdaı talqylandy

Úkimet • Búgin, 14:40

Nur-Sultan «sary» aımaqqa ótýi múmkin

Koronavırýs • Búgin, 14:10

OPEK-tiń bas hatshysy kóz jumdy

Álem • Búgin, 13:59

6 shildege arnalǵan aýa raıy boljamy

Aýa raıy • Búgin, 09:43

Shabyt shaqyratyn shahar

Elorda • Búgin, 08:23

Aqjaınaq astana

Elorda • Búgin, 08:22

Ozyq óndiris ornynda boldy

Aımaqtar • Búgin, 08:20

Ult saýlyǵyn ulyqtaǵan megapolıs

Elorda • Búgin, 08:18

Baǵdaryń qalaı, bas qala?

Elorda • Búgin, 08:17

«Astana Operamen» dos bolaıyq

Teatr • Búgin, 08:15

Dımash pen Djekson

О́ner • Búgin, 08:10

Utqanymyz shamaly bolyp tur

Qoǵam • Búgin, 08:05

Irikteýdiń ekinshi kezeńine ótti

Sport • Búgin, 08:02

Egizder festıvali

Qoǵam • Búgin, 08:00

Elordanyń damý dańǵyly

Elorda • Keshe

Uqsas jańalyqtar