Vıse-mınıstrdiń deregine sensek, kúzgi jıyn-terim jumystary 81% oryndaldy. Astyqtyń jyldaǵyǵa qaraǵanda az shyǵýyna jazdaǵy aptap ystyq sebep boldy. 2018 jyly jınalǵan astyqtyń jalpy kólemi 20,3 mln tonna bolsa, bıyl 17 mln tonna astyq jınaý josparlanyp otyr.
– Elimizde 1 shildeden bastap aptap ystyq boldy. Ásirese eń astyqty óńirlerdiń biri sanalatyn Qostanaı óńirindegi 8 aýdanda egin kúıip ketti. Bul aımaqta qazir gektaryna 3,4 sentner astyq jınalyp jatyr. Sol sebepti ónim tómen. Úkimet tarapynan fermerlerge barlyq qoldaý kórsetildi. Janar-jaǵarmaı 100 paıyz berildi. Tehnıka jetkilikti, barlyǵy jóndeýden ótken. Sharýashylyq basshylary jumysty barynsha joǵary deńgeıde júrgizip jatyr. Aýa raıy ashylsa, 10-12 kúnniń ishinde egin jınaý naýqanyn aıaqtaımyz, – dedi A.Saparov.
Vedomstvo basshysynyń orynbasary bul jaǵdaı nannyń baǵasyna áser etýi múmkin ekenin aıtty, dese de áleýmettik nannyń baǵasy qymbattamaıdy dep ýáde berdi.
– Bul máselede boljam aıtý áli erterek. Nan baǵasy sál qymbattaýy múmkin. Alaıda áleýmettik nan baǵasy qymbattamaıdy. Bir bólke 78-85 teńge aralyǵynda satylady. Astyq baǵasy kóterilgen jaǵdaıda áleýmettik kásipkerlik korporasııalary shara qabyldaıdy. Tipti oǵan ákimdikter men azyq-túlik korporasııasynyń turaqtandyrý qorlary tartylady. Ázirge astyq jınaý naýqany júrip jatyr. Bizge áli egistiktiń shamamen 20%-yn jınaý qajet. Jaǵdaıdy baqylaýda ustap otyrmyz, – dedi vıse-mınıstr. Spıker bıyl eksport kóleminiń de azaıý qaýpi bar ekenin aıtady.
– Eksportqa qansha mólsherde bıdaıdyń shyǵarylatynyn da ázirge aıtý qıyndaý. Meniń oıymsha, eksportqa 6-7 mln tonna astyq shyǵarylýǵa tıis. 17 mln tonna jınasaq, 2018 jylǵa qaraǵanda túsim azyraq bolady. Biraq ishki suranys tolyǵymen qanaǵattandyrylady, – dedi A.Saparov.
2019 jyly respýblıka boıynsha 22,2 mln gektar jerge astyq sebildi. Onyń 15,4 mln gektary dándi daqyldar bolsa, sonyń ishinde 11,4 mln gektary bıdaı alqaby. Qazir respýblıka boıynsha ortasha ónimdilik gektaryna 11,5 sentnerdi quraıdy.
