«Astana» jeńis úshin oınaıdy

Elorda komandasy Eýro­kýbok oıyndarynda jetin­shi jyl qatarynan oınap jatsa da, bıyl birinshi ret serbııalyq komandamen kezdeskeli tur. «Partızan» klýbynyń tarıhy tereń bolǵanymen, ataq jaǵynan Eýropanyń ortanqol komandasy sanalady. 1945 jyly qurylǵan komanda qazirgi ýaqytta ÝEFA klýbtar reıtın­ginde 71-orynda tur. Al 10 jyldyq tarıhy bar «As­­tana» TOP-50 klýbtyń qa­ta­­rynda ekeni barshaǵa bel­gili.

 «Partızan» komandasy Nur-Sultanǵa seısenbiniń keshinde keldi. Bas bapker Savo Mıloshevıchtiń aıtýynsha, quramada jaraqat alǵan fýtbolshy joq. Shákirtteri bú­gingi oıynǵa saqa­daı-saı. Sondaı-aq koman­da­­nyń qorǵaýshysy  Boıan Os­­toıch Qazaqstan astanasy­na kem degende bir upaı alý­ǵa kelgendigin aıtady. «Qa­zaqstan chempıonyna qarsy oıyn – biz úshin ke­zekti bir emtıhan. О́ıtkeni osy oıyn arqyly biz óz deńgeıimizdi anyqtap alamyz. Bizdiń bas­ty maqsatymyz – jeńilmeý jáne upaı oljalaý bolyp tur. Sonymen qatar qaqpamyzǵa gol ótkizbeýge tyrysamyz. Qal­ǵanyn alań sheshedi. Qazir ko­mandadaǵy jigitterdiń kó­ńil kúıi óte jaqsy», deıdi ol.

Ras, «Partızan» fýtbolshylary elordaǵa óte kóterińki kóńil kúıde keldi. О́ıtkeni Serbııa birin­shiligindegi 9-týr oıynynda syrt alańda «Radnıchkı Nısh» klýbyn 4:1 esebimen tas-talqanyn shyǵardy. Budan bólek Belgrad komandasy 15 tamyzdan beri jeńilistiń ne ekenin bilmeı keledi. Sońǵy ret tamyzdyń ortasynda Eýropa lıgasynyń irikteý kezeńinde Túrkııanyń «Ienı Malatıaspor» komandasyna syrt alańda 1:0 esebimen ese jibergen. Sodan beri 9 oıyn ótkizip, altaýynda jeńiske jetse, úsh oıynynda teń túsken. Tipti ishki birinshiliktegi negizgi qarsylastary «Sr­vena Zvezda» komandasynan da basym túsken. Al Eýropa lıgasynyń toptyq kezeńindegi birinshi týr oıynynda Nıderlandynyń «AZ Alkmar» komandasymen teń tústi. «Partızan» klýbynyń qazirgi jaǵdaıy osyndaı.

«Astana» komandasy da  búgingi oıynda jeńiske jetýge tas-túıin daıyn. «Man­chester Iýnaıtedpen» ótken matchtan keıin ishki birin­shilikte «Jetisý» koman­dasynan jeńilip qalǵany bolmasa, keıingi eki oıynda qarsylastarynan basym tústi. Tipti elorda komandasy qosalqy quram fýtbolshylarymen oınasa da qarsylas komandanyń qaqpasyna jeti gol soqty. Bir ókinishtisi, «Partızanǵa» qarsy ótetin oıynda jaraqatyna baılanysty Iýrıı Logvınenko ko­mandaǵa kómektese almaı­dy. Bul týraly bas bap­ker Roman Grınorchýk «Qaı­sar­ǵa» qarsy ótken match­tan keıingi baspasóz más­lı­ha­tyn­­­da aıtty. Al qalǵan ji­git­ter oıynǵa tolyq daıyn deıdi.

Joǵaryda atap ótkeni­mizdeı, búgingi oıynda je­ńis «Partızanǵa» qara­ǵan­­­da «Astanaǵa» aýadaı qajet. Sebebi dál osy match «As­ta­nanyń» pleı-off kezeńine shyǵý-shyq­pa­ýyn anyqtap beredi. Al «Par­­­tızanǵa» teń oıyn da jetkilikti. Olar ótken týrda «AZ Alkmarmen» teń oınap, bir upaı oljalaǵan. Jerlesterimiz alǵashqy týrda MIý-den jeńilip, kósh so­ńynda qalyp qoıdy. Son­dyqtan búgingi oıynda «As­tana» qalaıda jeńiske jetip, úsh upaı oljalaýdy kózdeıdi. Sondaı-aq toptaǵy ekinshi oıynda «AZ Alkmar» óz alańynda «Manchester Iýnaıtedti» qa­byldaıdy. Bul oıynda bizge aǵylshyn komandasynyń je­ńiske jet­keni tıimdi. О́ıtkeni búgin «Astana» jeńiske jetip jatsa, úsh upaımen ekinshi orynǵa kóteriledi. Al jerl­esterimiz úshinshi týrda Nıder­landyǵa qonaqqa barady. «Alkmarǵa» qarsy oıynda da upaı alatyn bolsaq, ekinshi orynmen pleı-off kezeńine jol­dama alýǵa tolyq múmkindik bar.

Sonymen qos komanda arasyndaǵy kezdesý búgin «Astana Arena» stadıonynda ótedi. Match Nur-Sultan ýaqyty boıynsha 20:50-de bastalady.