Jyl saıyn dástúrli túrde ótkiziletin bıylǵy básekede 5-6 jas aralyǵyndaǵy 300-ge jýyq sportshy baq synady. Sporttyq sharanyń negizgi maqsaty – velosportty halyq arasynda keńinen nasıhattaý jáne damytý, óskeleń urpaqty salamatty ómir saltyn ustanýǵa shaqyrý.
Elimizdegi Olımpıadalyq daıarlaý ortalyǵy bóliminiń jetekshisi Dınara Áýbákirova «Olımpıada úmiti» týrnıri arqyly bolashaq chempıondardy qazirden bastap daıyndaǵymyz keledi deıdi. «Bizdiń negizgi maqsatymyz – velosportty keńinen nasıhattap, buqaralyq sıpatyn keńeıtý. Soǵan sáıkes, qabiletti balalardy iriktep, bólek daıyndyq júrgizý máselesin de qarastyrý ústindemiz. Osyǵan baılanysty aldaǵy ýaqytta Olımpıadalyq daıarlaý ortalyǵy janynan búldirshinderge arnalǵan seksııa ashylýy múmkin. Eger osy josparymyz oıdaǵydaı júzege assa, balalar sportynyń damýyna úlken dúmpý ákeler edi», deıdi ol.
Balalar arasyndaǵy Gran-prı jarysy osymen úshinshi jyl qatarynan uıymdastyrylyp otyr. Bastapqyda kópshilik asa mán bermegenimen, joba ómirsheń ekendigin dáleldedi. Ata-analar byltyrdan bastap jarystyń aýqymy, formaty, talaby jaǵynan kásipqoı jarystardan kem emestigine kóz jetkizgennen keıin balalaryn jarysqa ákele bastady. Jarys sońynda júldeli oryn ıelengen sportshylarǵa uıymastyrýshylar baǵaly syılyqtar tabystady.
