Sport • 07 Qazan, 2019

Oralda «Aqjaiyq marathon» ótti

87 ret kórsetildi

Oral qalasynda tuńǵysh ret «Aqjaiyq marathon-2019» tolyq marafon júgirisi ótti. Sporttyq sharaǵa áıgili sýpermarafonshy, halyqaralyq sport sheberi jáne Gınnes rekordtar kitabyna jeti ret engen Marat Jylanbaev, trıatlonnan jasóspirimder arasynda Azııa chempıonatynyń qola júldegeri, halyqaralyq dárejedegi sport sheberi Erjan Japparov qatysty.

- Oral qalasynyń tarıhynda tuńǵysh ret uıymdastyrylǵan tolyq marafonǵa qosh keldińizder! Batysqazaqstandyqtarmen birge marafonǵa elimizdiń 10 qalasynan, Reseıdiń 5 qalasynan 1000-nan astam adam tirkeldi. Bizdi qoldaýǵa kelgen sportshylar Marat Jylanbaev pen Erjan Japparovqa alǵysymyz sheksiz. Bárińizge sáttilik tileımin! - dedi marafonshylardy quttyqtaǵan Batys Qazaqstan oblysynyń ákimi Ǵalı Esqalıev.

Marafonǵa qatysýshylar jas ereksheligine jáne daıyndyǵyna baılanysty tolyq (42.2 shaqyrym), jartylaı (21.1 jáne 10.5 km), sondaı-aq kishkentaı jelaıaqtarǵa arnalǵan kids run (440 metr) saıysyna qatysty.

Kópshilik sporttyq sharaǵa óńir basshysy Ǵalı Esqalıev pen Oral qalasynyń ákimi Abat Shynybekov te qatysty. Sondaı-aq dál osy marafonǵa ózge qalalardan onlaın-rejımde 100-den asa jelaıaq júgiripti.

Oblys ákiminiń aıtýynsha, bolashaqta osyndaı saıystar Oralda kóktem men kúzde turaqty ótip turmaq.

Áıgili marafonshy Marat Jylanbaev atap ótkendeı, júgirý – eń demokratııashyl sport, óıtkeni buǵan arnaıy zal, ǵımarat, sporttyq quraldar kerek emes.

«Aqjaiyq marathon-2019» sharasynyń qorytyndysynda 42,2 kılometrlik tolyq marafon saıysynda erler arasynda qostanaılyq Aleksandr Savgýrov, áıelder arasynda almatylyq Dıana Aıdosova jeńimpaz atandy. 21,1 shaqyrymdyq jartylaı marafonda orynborlyq Alekseı Shırshov pen almatylyq Dana Gýsarova úzdik shyqty. Al 10,5 shaqyrymdyq saıysta Islam Amanǵos pen Ekaterına Gresaı (ekeýi de qostanaılyq) jeńiske jetti.

 Sýretti túsirgen Meıirbek Tájquranov

 Batys Qazaqstan

Sońǵy jańalyqtar

Qazaqstanda dollar qymbattady

Ekonomıka • Keshe

Uqsas jańalyqtar