Qarshadaıynan aýyr dertke shaldyqsa da tatar dámi taýsylmaı bilikti dárigerlerdiń arqasynda ómirge qaıtadan oralyp jatqan balalar az emes. Bul baǵa jetpes úlken qýanysh. Degenmen «batpandap kirip, mysqaldap shyǵar» aýrýdan aıyǵýda ómirge qushtarlyqpen birge tabandylyq, ata-ana, dárigerler men aınaladaǵy ortanyń túsinistigi men qoldaýy qajet-aq. Sondyqtan da konferensııa taqyrybynda kórsetilgendeı, onkologııalyq aýrýlarǵa shaldyqqan jáne aǵzalaryna transplantasııa jasalǵan balalarǵa, olardyń otbasylaryna kásibı jáne keshendi kómek kórsetýdi uıymdastyrý, uzaq ýaqyt aýrýmen kúresten keıin olardyń qalypty ómirge qaıta oralýyna jaǵdaı jasaý óte ózekti.
«University Medical Center» korporatıvtik qorynyń Ana men bala ulttyq ǵylymı ortalyǵynyń psıhoáleýmettik kómek kórsetý sektorynyń meńgerýshisi Láıla Túsipbaevanyń aıtýynsha, boılaryndaǵy dertpen kúresip, stasıonardan emdelip shyqqan balalardyń ońalyp ketýinde, áleýmetke beıimdelip qalypty tirshilikke enýinde durys psıhologııalyq ahýal bolmasa kóńildegideı túpkilikti oń nátıje shyqpaýy da múmkin. «Balalar ortalyqta uzaq ýaqyt emdeledi, jarty jyl, tipte birneshe jyl jatyp, klınıkadaǵy kútimge úırengen bala men ata-ana úılerine shyǵysymen abdyrap qalady. Aınaladan vırýs juqtyryp ala ma dep qorqyp, oqshaýlanyp, jandaryn qoıarǵa jer tappaıdy. Al konferensııada osy sanattaǵy balalarǵa emnen keıingi ómirde jasalar qadamdar jaıynda aıtylyp, áleýmettik-psıhologııalyq járdem berýde tájirıbe almasý qaı tarapqa da paıdasyn tıgizetini sóz boldy. Shynynda da konferensııanyń plenarlyq jáne seksııalyq otyrystarynda máseleler kótergen mamandar qaıta ońaltý jumystaryn júrgizýde arnaıy ortalyqtardyń qajettigine mán berdi. Iá, aýyr dertti jeńgen balalar sany tym kóp emes shyǵar, alaıda olardyń árqaısysynyń qalypty tirshilikke oralýy qoǵam úshin mańyzdy, sapaly ómir súrýine qol jetkizýi otandyq medısınanyń ǵana emes, qoǵamnyń da jeńisi. Izgilengen qoǵamda ortaǵa qaıta qosylǵan árbir bala – kapıtal, baǵa jetpes qundylyq deıdi. Sondyqtan da ońaltý ortalyqtary oblystarda da ashylyp, oǵan memleketpen qatar bıznes, jalpy qoǵam aralasyp jatsa ǵanıbet bolmaq.
