Qujat kásipkerlerdiń quqyqtaryn qorǵaý máselelerinde eki eldiń yntymaqtastyǵyn jáne iskerlik ahýaldy jaqsartý boıynsha birlesken, kelisilgen is-áreketterdi kózdeıdi. Memleketterdiń ulttyq zańnamasyn durys qoldaný úshin konsýltatıvtik-quqyqtyq kómek kórsetý, ǵylymı-tájirıbelik konferensııalarǵa, semınarlarǵa jáne ózge de is-sharalarǵa qatysý qarastyrylǵan.
Qazaqstan álemniń kóptegen elderimen yntymaqtastyqta. Qazaqstandyq kásipkerler kóptegen elde bıznes júrgizýde. Qazaqstandyq statıstıka málimetterine sáıkes, Qazaqstan men Grýzııa arasyndaǵy taýar aınalymynyń kólemi 2018 jyly 87 mln dollardy qurady, 2017 jylmen salystyrǵanda 34,6%-ǵa artyq (64,6 mln AQSh dollary).
«Biz ózara qarym-qatynastarymyzdy keńeıtýge múddelimiz. Kásipkerlerdiń quqyqtaryn qorǵaý jónindegi jumysta odan ári tıimdi jáne jemisti yntymaqtastyq ornatamyz degen úmittemiz. Grýzııa men Qazaqstannyń bıznes-ombýdsmenderi arasyndaǵy yntymaqtastyq iskerlik jáne ekonomıkalyq baılanystardy damytýǵa, Grýzııa men Qazaqstanda bıznes júrgizý úshin qolaıly jaǵdaı jasaýǵa yqpal etetinine senimdimin», – dep atap ótti Bolat Palymbetov.
О́z kezeginde, Iraklı Lıkvınadze taraptardyń qarym-qatynasyndaǵy tyń serpindi atap ótti.
«Qazaqstan men Grýzııa arasyndaǵy ekonomıkalyq qatynastar serpindi, qazaqstandyq bıznes Grýzııada belsendi, tıisinshe Qazaqstandaǵy grýzııalyq bıznes te barynsha belsendi júrip jatyr. Grýzııa men Qazaqstannyń bıznes-ombýdsmenderi arasyndaǵy belsendi memorandým jáne belsendi kommýnıkasııa eki memleket arasyndaǵy iskerlik pozısııany odan ári nyǵaıta túsedi», degen pikirde Grýzııa aýmaǵynda kásipkerlerdiń quqyqtaryn qorǵaý jónindegi ýákil.
Esterińizge sala keteıik, Qazaqstannyń bıznes-ombýdsmeni Reseı men О́zbekstannyń bıznes-ombýdsmenderimen О́zara kómek jáne yntymaqtastyq týraly kelisimge qol qoıǵan bolatyn. Úsh eldiń birlesken kúsh-jigerimen qazaqstandyq, reseılik jáne ózbekstandyq birneshe kásipkerlik sýbektileriniń quqyqtary qorǵaldy.
