Kelesi jyly ótetin Eýropa chempıonatynyń irikteý kezeńi bastalǵanda jerlesterimiz alǵashqy kezdesýinde FIFA reıtınginde TOP-50 quramanyń qatarynda turǵan Shotlandııany 3:0 esebimen jeńip, aıdy aspanǵa bir-aq shyǵarǵan-dy. Keıingi kezdesýlerinde Belgııa jáne Reseı quramalaryna iri eseppen ese jiberse de, jankúıerlerdiń bul jeńiske qabyrǵasy qaıysa qoıǵan joq. О́ıtkeni birinshisi álemdik reıtıngte kósh bastap turǵan qurama bolsa, ekinshisi byltyr ǵana óz jerlerinde fýtboldan álem chempıonatyn uıymdastyryp, jartylaı fınalǵa deıin jetken bolatyn. Sondaı-aq eki qurama da áý basta bizdiń toptyń negizgi favorıtteri edi. 6-týrdan keıin atalǵan eki quramanyń Eýropa chempıonatynyń fınaldyq kezeńine shyqqany belgili boldy.
Qazaqstandyq fýtbol jankúıerleri otandastarymyzdyń buǵan deıingi jeńilisterine keshirimmen qarap, aldaǵy oıyndardan jeńis kútken bolatyn. Alaıda quramanyń elordadaǵy «Astana Arena» stadıonynda Kıprden jeńilgeni jankúıerlerdiń kóńil kúıin túsirdi. Ony áleýmettik jeli qoldanýshylarynyń jazbalarynan-aq anyq baıqaýǵa bolady. Syrt alańda teń oınap kelgen quramamen óz alańymyzda, óz jankúıerlerimizdiń qoldaýymen ótken kezdesýde jeńip turyp, jeńilýi uıat, árıne. Jeńip turǵan oıynda jeńiliske ushyraý, kim-kimge bolsa da ońaı emes.
Matchtyń alǵashqy mınýtynda-aq basymdyqqa ıe bolǵan otandastarymyz qarsylas komandanyń qaqpa mańaıynda birneshe qaýipti shabýyl uıymdastyrdy. Birinshi taımnyń ózinde Islambek Qýattyń gol soǵatyn 100 paıyzdyq eki birdeı múmkindigi boldy. Alaıda ekeýinde de dopty qaqpaǵa engize almady. Sondaı-aq shabýylshy Toqtar Janǵylyshbaı da óz múmkindigin tıimdi paıdalana alǵan joq. Osylaısha jerlesterimiz gol soǵatyn úsh birdeı múmkindikti júzege asyra almady. Abyroı bolǵanda 34-mınýtta qorǵaýshy Temirlan Erlanov esep ashyp, jankúıer kóńilin shat-shadyman qyldy. Ekinshi taımnyń alǵashqy 25-mınýtyn shabýylmen ótkizgen fýtbolshylarymyz 11-mınýttyń ishinde eki gol ótkizip aldy. Jeńip turǵan matchta jeńile salý qazaq jankúıerlerine aýyr tıdi. Álbette, komandanyń jeńilisine birinshi kezekte cheh mamany Mıhal Bılek jaýap beretini anyq. Alaıda matchtan keıin otandyq BAQ ókilderine suhbat bergen Islambek Qýat bul kezdesýdegi bar jaýapkershilikti óz moınyna alatynyn aıtqan.
Klýbtyq deńgeıdegi Eýrododa oıyndarynda Kıprdiń APOEL komandasy Qazaqstanǵa úsh ret keldi. Úsheýinde de elordanyń «Astana» komandasymen kezdesken APOEL fýtbolshylary barlyq matchta jeńilip, óz úılerine upaısyz oralǵan bolatyn. Al Kıpr quramasy elimizge alǵash ret kelse de úsh upaıdy op-ońaı ıelenip, elderine jeńispen oraldy.
Osymen Qazaqstan – Kıpr quramalary tórtinshi ret jasyl alańda jolyqty. Úsh kezdesýde Kıpr fýtbolshylary basym tússe, bir oıyn teń eseppen aıaqtalǵan. Eń alǵash eki komandanyń joly 2004 jylǵy halyqaralyq týrnırde túıisip, Kıprde ótken básekede alań ıeleri 2:1 esebimen jeńiske jetken. Araǵa 13 jyl salyp eki qurama 2017 jyly joldastyq kezdesý ótkizdi. Bul oıynda da Kıpr quramasy 3:1 nátıjesimen basym túsken-di. Al osydan týra bir aı buryn eki qurama Eýropa chempıonatynyń irikteý kezeńinde qaıta jolyǵyp, otandastarymyz alǵash ret qarsylas komandamen teń oınaǵan-dy. Mine, kúni keshe úshinshi ret Kıpr quramasyna jol berdik.
Bul jeńilisten soń Qazaqstan quramasy I tobynda 7 upaımen 4-orynǵa túsip qalsa, Kıpr fýtbolshylary 10 upaımen 3-orynǵa kóterilip aldy.
