Ult uıasy atanǵan aýdannyń bul toıyna Parlament Senatynyń depýtaty Rysqalı Ábdikerov, Qaraǵandy oblysy ákiminiń orynbasary Abzal Núkenov jáne basqa da qurmetti qonaqtar qatysty.
Merekelik sharanyń ashylý saltanatynda sóz sóılegen senator Rysqalı Ábdikerov kezinde osy aýdandy basqarǵanda ózine qoldaý kórsetken jergilikti azamattarǵa alǵys sezimin jetkizdi.
–Ulytaý búginde kún ótken saıyn kórkeıip, damyp kele jatqan órkendi óńir. Aýmaǵynda munaı shyǵýyna baılanysty on jyldan astam ýaqyttan beri oblystyq bıýdjetti demep otyrǵan birden-bir aýdan. Memleket basshysy Qasym-Jomart Toqaev týrızmdi damytý tóńireginde naqty mindet qoıdy. Aýdan halqyn alda uly is, jasampaz ómir kútip tur, – dep qaıyrdy sózin mártebeli meıman.
«Rýhanı jańǵyrý» baǵdarlamasy aıasynda uıymdastyrylǵan merekelik sharaǵa qatysýshylar aýdan ortalyǵyndaǵy saıabaqqa aǵash egip, ıgilikti is atqardy. Toı qonaqtary aldynda aýdandyq mádenıet úıiniń ártisteri, Jezqazǵan men Sátbaev qalalarynyń shyǵarmashylyq ujymdary óner kórsetip, sharaǵa saltanatty reńk berdi.
Mádenı shara baǵdarlamasyna saı, «Taıjan izimen» dep atalǵan respýblıkalyq án baıqaýy jáne qazaq kúresinen jarys uıymdastyryldy. Ánshiler saıysynda bas júldege laıyqty dep tanylǵan jańaarqalyq Jalyn Syzdyqovqa 1 mıllıon teńgeniń sertıfıkaty tabys etildi. Qyzylordalyq B. Ábdimájıtovke birinshi júlde buıyrsa, onyń jerlesi I. Dáýlethan ekinshi júlde ıegeri atandy. Al úshinshi orynǵa arnalǵan júlde Jezqazǵan qalasynyń ánshisi M. Shoqtaevqa berildi.
Qazaq kúresinen beldesýler eki salmaq dárejesinde ótti. Ulytaýdyń ulany Ernat Tólesh 70 kılo salmaqta qarsylas shaq keltirmese, absolıýttik salmaq dárejesinde Jańaarqanyń jampozy Jylkeldi Qudaıbergen jeńis tuǵyrynyń eń bıik satysyna kóterildi.
Ulytaýdyń baýraıyn dúbirge bólegen merekelik shara el estradasynyń juldyzdary qatysqan gala-konsertpen túıindeldi. Toıshyl qaýym О́mirzaq Aınııazov, Beıbit Kúshqalıev, Sıvı Mahmýdı jáne Nurjan Kermenbaev syndy ánshilerdiń ónerine tánti boldy.
