Jasyratyny joq, qazir salalyq baǵdarlamalardan jańylysatyn boldyq. Bólinip jatqan qarajat orasan, jumsalýynda esep joq. Biraq júzege asýyna, túpki nátıjesine, tıimdiligine kelgende kibirtikteımiz. Onyń bir ushyǵy kabınette otyryp-aq «basqara» beretin laýazym ıeleriniń mańyzdy mindetterdi túsinbeýinde, derbes jaýapkershiliginiń tómendigine kelip tireletin syqyldy. Keı kezde olardyń qaryn ashtyratyn bul áreketteri bıýdjettiń aqshasyn bólýmen ǵana shekteletindeı áser qaldyrady. Kópke topyraq shashýdan aýlaqpyn. Biraq «bir qaryn maıdy bir qumalaq shiritedi» demekshi, Úkimet tapsyrmalarynyń óz deńgeıinde oryndalmaýyn jedeldiliktiń, jaýapkershiliktiń tómendiginen, sóz ben istiń úılesimsizdiginen izdegen jón tárizdi. Memleket basshysy Qasym-Jomart Toqaev halyqqa arnaǵan Joldaýynda «reformany tek reforma úshin júrgizýge» jol berilmeıtindigin qatań eskertýi osyndaı memlekettik qyzmetkerlerge qarata aıtylǵan sııaqty.
Shynynda da Joldaýda atap ótilgendeı, aldaǵy ýaqytta ár mınıstrdiń, ár ákimniń, ár jaýapty tulǵanyń derbes jaýapkershilik ólsheminiń negizgi kórsetkishterin belgilep alsaq, baǵytymyz aıqyndala túspek. Sol sııaqty jergilikti bılik qyzmetiniń tıimdiligin halyqqa baǵalatý jobasyn engizý jónindegi usynys ta ábden quptarlyq. Qyzmettiń maıly jiligin ustaǵandar arasynda adamdardyń aryz-shaǵymdaryna, ótinish-tilekterine bıýrokrattyq, qaǵazbastylyq turǵysynan qaraýy saldarynan birden sheshimin tabatyn máselelerge aptalap, aılap sandaltyp qoıatynyn kórip júrmiz. О́zderin jarty patshadaı sezinetinder tómengi basqarý býyndarynda az kezdespeıdi. «Ákim tátti ómirdi súıse, eldiń kúni qarań», degen eken Balasaǵun babamyz.
«Keı jigitti pysyq dep bolys qoısań, qashan túsip qalǵansha jep bitedi» dep Baıkókshe aqyn jyrlaǵandaı jemqorlyqtyń jegi qurttaı qoǵamymyzda tereń tamyr jaıýynyń bir ushyǵy memlekettik satyp alý úrdisiniń shıkili kúıinde atqarylýynda jatyr. Prezıdenttiń memlekettiń barlyq tıimsiz shyǵyndaryn qysqartý týraly usynysyn da tolyq qoldaımyn. Memlekettik satyp alý rezervindegi 400 mıllıardtaı qarajatty óte ótkir máselelerge jumyldyrýǵa bolady. Byltyr memlekettik satyp alý kólemi 4,4 trıllıon teńgeni quraýy oılantpaı qoımaıdy. Onyń 75 paıyzy básekeden tys amalmen júrgizilgen. «Sheneýnikter men qaıdaǵy bir jabysqandar úshin bul astaýdy jabý kerek» dep áńgimeniń keltesinen qaıyrylýy sybaılas jemqorlyqqa qarsy pármendi sharalar tetigin iske qosýdyń pisip-jetilgenin kórsetedi.
Meniń oıymsha, partııalyq nomenklatýrany qaıtadan engizip, halyqpen jumys istese, til tabysa almaıtyn, saıası uıym atyna kir keltiretin basshylardy qatań jazalap, bılikten alastatýǵa deıin shara qoldaný kerek. Bul ózgelerge ashy sabaq bolyp, qatarymyz ekonomıkalyq bilimi mol, ishki jan dúnıesi rýhanı baı kadrlarmen tolyǵa túser edi.
Jaqsylyq YSQAQOV,
Soltústik Qazaqstan oblysynyń qurmetti azamaty
