Foto: Aqorda
Prezıdent, eń aldymen, saltanatty is-sharaǵa qatysýshylardy Mádenıet jáne óner qyzmetkerleri kúnimen quttyqtady.
«Bul – elimiz úshin mán-mańyzy aıryqsha mereke. Mádenıet – halqymyzdyń ulttyq bolmysy men rýhanı derbestiginiń arqaýy ekenin bárimiz jaqsy bilemiz. Mádenı jáne rýhanı dúnıesin saqtaı bilgen eldiń mártebesi bıik, mereıi ústem bolary aıqyn. Sizder osy ıgi maqsat jolynda tabandy jumys istep kelesizder. Qoǵamymyz bul eńbekti joǵary baǵalaıdy. Búgin men kásibı mereke kúni elimizdegi barsha mádenıet jáne óner salasy mamandaryna shynaıy alǵysymdy bildiremin! Qazaq – ónerdiń kıesin uǵatyn, ónerpazdyń qadirin biletin jurt. Biz erekshe daryn ıelerine árdaıym laıyqty qurmet kórsetemiz. Jurtymyz «О́nerdiń órisi keń» dep sizderdi qashanda qadirlegen. Mine, búgingi jıyn da sonyń bir kórinisi. Shyn máninde, rýhanııaty baı eldiń oıy ozyq, bolashaǵy jarqyn bolady», dedi Qasym-Jomart Toqaev.
Memleket basshysy qazir Qazaqstanda aýqymdy ózgerister bolyp jatqanyn aıtty.
«Bul jaı ǵana ózgerister emes: elimizdiń bolashaǵyna tikeleı qatysy bar, maǵynasy aýqymdy, tereń, keshendi, júıeli reformalar jasalýda. Maqsatymyz – Otanymyzdy kúshti, ozyq memleket retinde damytý, sondaı-aq, daryndy, otanshyl, jigerli jáne kózi ashyq, kókiregi oıaý jastardyń ómir jolyn ashyp berý. Naýryz aıynda bárimiz bir el, bir halyq bolyp konstıtýsııalyq reformaǵa biraýyzdan qoldaý kórsettik. Ortaq iske mádenıet salasynyń mamandary men óner qaıratkerleri de belsene atsalysty. Saıası naýqan kezinde halqymyz elimizdiń jarqyn bolashaǵyna úlken senimmen qarap, tarıhı tańdaýyn jasady. Osylaısha, jańa Konstıtýsııamyz tuǵyryna qondy. Rasynda, bul Qazaqstannyń keleshegin aıqyndaıtyn mańyzdy sheshim bolǵany anyq. Ata zań – el táýelsizdigi men memlekettiginiń myzǵymas kepili, halqymyz júrip kele jatqan joldyń basty temirqazyǵy. Konstıtýsııada ultymyzdyń múddesi, maqsat-muraty men arman-tilegi aıqyn kórinis tapty. Ata zańǵa sáıkes elimizdiń egemendigin, jerimizdiń tutastyǵyn, azamattardyń quqyǵy men bostandyǵyn qorǵaý buljymas qaǵıdat sanalady»dedi Prezıdent.
