Ol negizgi keıipkerleri – dana qart, er jigit, ıbaly kelinshek, perishte sábı, júırik at, qyran búrkit, mańǵaz túıe nemese qara shańyraq, jas otaý syndy uǵymdar, sondaı-aq sal-serilik, saıatshylyq dástúrleri arqyly kóshpendi ómirdiń tylsymǵa toly bolmysyn beıneleıdi. Árbir keıipkerge ne árbir uǵymǵa daralyq darytqysy keledi. Bul oraıda grafıkamen de, maıly boıaýmen de jumys isteıtin sýretshi dástúrli realızmnen tys sýret ónerinde «týyndy ishindegi týyndy» prınsıpin basshylyqqa alatyn postmodernızmdi de jatsynbaıtyny kórinip tur. Onyń Oqýshylar saraıynda ashylǵan «Atameken» atty kórmesine sońǵy jyldardyń bederinde dúnıege kelgen týyndylary qoıyldy.
«Atameken» kórmesiniń ashylýy – zeınetkerlik jasqa jetken sýretshiniń elge esep berýi, shyǵarmashylyǵyndaǵy jańalyqtardy kórsetýi. Jańalyq demekshi, 100-den asa jumystardyń ishinde ótken ǵasyrdaǵy qazaq úshin eń aýyr saıası zobalańdar men alapat ashtyq oqıǵasy oryn alǵan – 1916, 1932, 1937, 1986 jyldar Oro tehnıkasymen salynǵan. Bul tehnıkamen, ıaǵnı mataǵa sýret salýmen sýretshi sońǵy jyldary ǵana aınalysa bastapty. Kórmede sóz alǵan Oqýshylar saraıynyń dırektory Erbol Irgebaı sýretshi shyǵarmashylyǵyn rýhanı jańǵyrýǵa qosylyp jatqan úlken eńbek retinde baǵalap, ásirese Oro tehnıkasymen bederlengen tarıhı oqıǵalardyń jas urpaqqa oı salatyn maǵynaly shyǵarmalar ekenine toqtaldy.
Jazýshy Joltaı-Jumat Álmashuly kórme ıesiniń jas jigitter syndy izdengishtigine tántiligin aıtty. – О́mirbek alpysqa kelse de jas jigitter sııaqty izdenedi. Búgingi kórmesi sonyń aıǵaǵy. Onyń ózgeshe mánermen salǵan sýretterine rıza bolyp turmyn. Ol qandaı janrda eńbektense de, ózeginde ulttyq negiz jatady. Taqyrypty keń aýqymda alady, – dedi jazýshy. Al kórmege qonaq retinde qatysqan Astana qalasy Jas sýretshiler birlestiginiń tóraǵasy О́miráli Ismaılov aldaǵy jyly Soltústik Kıprde Túrki elderi sýretshileriniń murajaıy ashylatynyn, oǵan elimiz atynan Tileýlıevtiń de kartınalary qoıylatynyn atap ótti.
О́mirbek Tileýlıev tek sýretshi emes. Ol sýret ónerine ǵashyq jasóspirimderdiń ustazy da. Nur-Sultan qalasyndaǵy Oqýshylar saraıynda ustazdyq qyzmet atqaryp júrgen sýretshiniń jeke kórmesine oqýshylardyń jıylýy da tegin emes. О́nerli balalar kórmeniń ashylýynda án shyrqap, bı bılep sharanyń qyzyqty ótýine bir kisideı atsalysty.
Oqýshylar saraıynda Tileýlıev týyndylary qoıylǵan kórme kórermenderin kútedi.
Aıgúl SEIIL,
«Egemen Qazaqstan»
