DAF avtokóliginiń júrgizýshisiniń jáne júktiń qujattaryn tekserý barysynda tartylǵan et Reseıdiń Samara qalasyndaǵy «Mıasnoı Mır» JShQ-nyń júgi ekeni anyqtaldy. Júk Oral qalasyndaǵy «Prod-Interservıs» JShS-na jetkizilýge tıis delingen qujatta. Alaıda aqparattyq júıelerdegi derekterge sáıkes, atalǵan kompanııa 2010 jyldyń 15 sáýirinde jumysyn toqtatqan, ıaǵnı taýar ımporttaýmen aınalyspaıdy. Osylaısha taýar-kólik júk qujatynda júk alýshy týraly derek burmalanǵany belgili boldy. Memlekettik kirister departamentiniń habarlaýynsha, ustalǵan kólik júkti naqty alýshynyń kim ekeni anyqtalǵanǵa deıin arnaıy turaqqa qamaldy.
Keıinirek júrgizýshiniń memlekettik kiris organdaryna tabystaǵan ótinishine sáıkes, zańsyz taýar tıisti organdarǵa jeke kásipker retinde tirkelmegen azamatqa jetkizilýi kerek bolǵany anyqtaldy. Ol azamattyń ústinen ákimshilik quqyq buzǵany úshin is qozǵalyp, Oral qalalyq ákimshilik sotyna jiberildi. Ákimshilik sot oǵan kásipkerlik qyzmetti tirkeýsiz jáne ımporttalatyn taýarlarǵa QQS tólemeı júzege asyrǵany úshin aıyppul saldy. Zańsyz kásipkerlikpen aınalysqan azamat 1,3 mln teńge qosymsha qun salyǵyn tólep, jeke kásipker retinde tirkeý esebine qoıý týraly ótinish berdi.
