Onyń shyǵarmalary qalam ustaǵandardy qyzyqtyrmaı qoımaıdy. Kóp jazǵan, jańasha jazǵan. «Dombyra», «Kókshetaý», «Ekspress», «Qyzyl at», «Albatros» poemalary, «Baqyt jolynda», «Qyzyl suńqarlar» pesalary, «Aısha», «Jemister» povesteri, «Tar jol, taıǵaq keshý» romany, qazaq folklorynyń tarıhyna arnalǵan «Qazaq ádebıeti kitaby» bul onyń keıinge qaldyrǵan murasy, jeke shyǵarmashylyǵy. Onyń ústinde júzdegen pýblısıstıkalyq maqalasy bar. Al «Eńbekshil qazaq» gazetiniń redaktory (qazirgi «Egemen Qazaqstan»), Halyq Aǵartý Komıssarynyń orynbasary, Halyq Komıssarlar Keńesiniń tóraǵasy, Qazaqstan proletar jazýshylary assosıasııasynyń basshysy, Qyzylorda halyq aǵartý ınstıtýtynyń, Tashkenttegi qazaq pedagogıkalyq ınstıtýtynyń dırektory syndy qyzmetterde onyń qaıratkerligi, azamattyq pozısııasy tanyldy. Ǵylymı konferensııany júrgizgen Eýrazııa ulttyq ýnıversıtetiniń rektory Erlan Sydyqov Sáken Seıfýllın ómirbaıanynyń bir parasyn baıandap, onyń jastaı eldiń saıası-áleýmettik ómirine aralasyp, basyn báıgege tikkenin aıtty. «Qazaq jastarynyń, zamandastarynyń bilimdi, zııaly, otanshyl bolýyna sińirgen eńbegi ǵajap. Onyń jyrlary jańa qoǵam qurýshylardy jigerlendirdi. Erekshe rýh berip, ulttyń oıanýyna aıryqsha áser etti. Ásirese 1923 jyly «Eńbekshil qazaqta» jarııalanǵan «Qazaqty qazaq deıik» atty maqalasy buryn birde kırgız, birde kaısak atanyp kelgen halqymyzdyń qazaq atynyń qaıtarylýyna úlken úles qosty. Aıta berse onyń shyǵarmashylyǵy da, ult úshin atqarǵan qyzmeti de ushan-teńiz. Sáken taqyryby – telegeı-teńiz taqyryp», dedi rektor. Jıyndy ashyp, alǵashqy quttyqtaý sóz sóılegen Premer-Mınıstrdiń orynbasary Berdibek Saparbaev Sákenniń 28 jasynda qıyn kezde, ortalyqtandyrylǵan bıliktiń tusynda úlken saıasatqa aralasqanyn, áıtse de óziniń bilimdiligimen, aqyl-parasatymen, otanshyldyǵymen elimizdegi kóptegen máseleniń oń sheshilýine yqpal etkenin tilge tıek etti. «Áleýmettik máselelerdi, sonyń ishinde mádenıet, bilim, baspasóz máselelerin kóterdi. Halyqtyń saýatsyzdyqtan, kedeılikten shyǵý joldaryn Keńes úkimeti basshylarynyń aldyna qoıa bildi. Solaısha memleketimizdiń qalyptasýyna eńbek etti. Qyryq tórt-aq jyl ǵumyr keshti. Biz mundaı azamattardy umytpaýymyz kerek», dedi B.Saparbaev.
Sáken Seıfýllındi bir adamnyń boıynda birneshe qasıettiń jarqyraı kórinýiniń mysaly deýge bolady. Onyń aqyndyǵy, jazýshylyǵy, ánshiligi, qaıratkerligi, syrbazdyǵy, sán-saltanaty talaı eńbekterge júk boldy. Dese de onyń azamattyq pozısııasyna qatysty keıde baspasóz betterinde usaq daýlardyń boı kórsetip qap júrgenin de aıtpaýǵa bolmaıdy. Ol – dańqty tulǵanyń Keńes ókimeti jaǵynda qyzmet etýimen tikeleı baılanysty. Buǵan qatysty óz kózqarasyn Jazýshylar odaǵynyń tóraǵasy, aqyn Ulyqbek Esdáýlet bylaısha jetkizdi: «Alash arystary barrıkadanyń eki jaǵynda tursa da, bir múddege – qazaqtyń múddesine qyzmet etti. Biz muny baǵalaýymyz kerek». U.Esdáýlet óz zamanynda tulǵanyń qazaq tilin qorǵap toǵyz maqala jazǵanyn, solaısha 1924 jyldyń shildesinen bastap keńse qaǵazdary óz ana tilimizde júrgizile bastaýyna zor eńbek sińirgenin basa aıtty.
Konferensııa barysynda fılologııa ǵylymdarynyń doktory, professor Serik Negımov baıandama jasap, Seıfýllın poezııasynyń jańashyldyǵyn ondaǵy san qyrly, san sıpatty hám myń boıaýly, myń áýezdi ıirimdermen túsindirdi. «Sákenniń poezııasy birde naızaǵaı daýylyndaı, birde suńqardyń daýsyndaı, aqqýdyń suńqylyndaı, keıde úırektiń sympylyndaı, qazdyń qańqylyndaı alýan dybystar shyǵarady. Onyń poezııasy jańasha daýys, jańasha ıntonasııa, jańasha ekpinmen órnektelgen», dedi professor. Al Parlament Májilisiniń depýtaty, fılologııa ǵylymdarynyń doktory, professor Saýytbek Abdrahmanov Sáken Seıfýllındi uǵymǵa, sımvolǵa aınalǵan tulǵa retinde qarastyrdy. «Qazaq úshin Sákenniń orny bólek ekenin aıtyp jatýdyń ózi artyq. Basqasyn bylaı qoıǵanda Sáken bataǵa kirgen adam ǵoı. «Sákenniń sánin bersin» dep bata beremiz. Bataǵa kirgen adam qasıetti adam. Bul uǵymǵa, sımvolǵa aınalǵan jan. Sáken – sulýlyqtyń, seriliktiń, tektiliktiń, tazalyqtyń, erliktiń sımvoly», dedi S.Abdrahmanov.
Konferensııada tulǵa týraly eki kitaptyń tanystyrylymy ótti. Alǵashqysy – TÚRKSOI uıymy shyǵarǵan «Úsh arys» atty kitap-albom. Kitap-albom qazaq jáne orys tilderinde Germanııada jaryq kórgen. Onda Sáken, Ilııas, Beıimbet jaıly derekter, zertteýlerge qosa qylqalam sheberleriniń de týyndylaryna oryn berilgen. Jıynda baıandama jasaǵan TÚRKSOI uıymynyń basshysy Dúısen Qaseıinov bir jylda repressııaǵa ushyraǵan qazaq ádebıetiniń úsh báıteregi týraly mazmundy baıandama jasap, jańa turpatty ádebıettiń bastaýynda turǵan tulǵalardyń tek qazaqtyń ǵana emes, ısi túrki jurtynyń maqtanyshy ekenin jetkizdi. Seıfýllın jaıly ekinshi kitap – «Sáken» dep atalady. Repressııaǵa ushyraǵan qazaq zııalylarynyń murasyn zertteıtin «Arys» qoǵamdyq qory shyǵarǵan kitap jaıynda belgili aıtys aqyny Amanjol Áltaı baıandady.
Jıyn sońynda Reseı Federasııasynyń Qazaqstan Respýblıkasyndaǵy elshiliginiń keńesshisi L.P.Vorobev, M.Áýezov atyndaǵy Ádebıet jáne óner ınstıtýtynyń jetekshi ǵylymı qyzmetkeri S.V.Ananeva, Qyrǵyz Respýblıkasy Ulttyq ǵylym akademııasynyń Til jáne ádebıet ınstıtýtynyń dırektory A.Ahmatalıev qatarly ǵalymdar baıandama jasady.
