-Kezekshilikten shyqqan soń qyzymdy teatrǵa, bı saıysyna alyp bardym. Tús kezinde úıge qaraı shyqqanbyz. Kóligimde anam men qyzym boldy. Shaǵan kópirinen ótip bara jatqanda boıjetken qyzdyń janynan ótip kettim. Birneshe sekýndtan keıin aınadan qarasam, boıjetken bir aıaǵyn kópirdiń qorshaý kermesine salyp tur eken. Oqys oqıǵa bolatynyn birden sezdim. Kópirden shyǵa bere toqtap, keıin júgirgenimde, kópir ústinde eshkim joq edi. Qyz sekirip ketken eken, - deıdi Erkebulan.
Uzyn boıly, qaıyńqaptal, at jaqty, qabaqty kelgen otyz jasar jigittiń tula boıynda bir túıir artyq et joq. Batys Qazaqstan oblystyq Polısııa departamentiniń arnaıy bólim qyzmetkeri bolǵandyqtan batyr azamatty fotoǵa túsirýge de, aty-jónin tolyq jazýǵa da bolmaıdy eken. Biraq Erkebulan bolǵan oqıǵany egjeı-tegjeıli aıtyp, suraqtarymyzǵa tolyq jaýap berdi.
...Júgirip kele jatyp sheshingen Erkebulan sý jaǵasyna jetkende jaǵada úrpıisip turǵan birneshe balyqshyny kóredi. Oılanbastan sýǵa sekirip, ózenniń ortasyna, qyz qulaǵan jerge júzip jetkende, boıjetkenniń denesi sý betinde qalqyp tur eken. Shashy jaıylyp, eki qoly eki jaǵyna ketken. Tirshilik belgisi bilinbeıdi. Qyzdy shashynan ustap jaqyn jerdegi kópirdiń tirek ustynyna qaraı júzdi. Sý tereń eken, aıaǵy tımedi. Beton taqtaǵa jaqyndap kelip, bir qolymen tyrmysyp, ózi shyqty. Sosyn qyzdy da tartyp, sol sement alańshaǵa shyǵaryp aldy. Birden jasandy demaldyrýǵa, alǵashqy medısınalyq kómek kórsetýge kiristi.
-Jaǵadaǵy balyqshylarǵa dáriger men polısııa shaqyryńdar dep aıqaıladym. Olar oǵan deıin de habarlap qoıǵan eken. Qyz edáýir sý jutypty, keýdesin basyp, tynys joldaryn tazaladym. Esin jınap, alaqtaǵan boıjetken «Men qaıdamyn? Men óldim be?!» dep sandyraqtaı berdi, - deıdi Erkebulan.
Keshikpeı qutqarýshylar jasaǵy da, jedel járdem de jetken. Boıjetkendi arnaıy keýdeshe kıgizip, qaıyqpen sýdan shyǵaryp aldy. Endi onyń ómirine tóngen qaýip joq edi.
-Erkebulan bul oqıǵa kezinde kásibı turǵydan óte durys áreket etti. Biz arnaýly bólimshe jaýyngerlerin túrli jaǵdaıǵa daıyndaımyz, sonyń ishinde sýdan qutqarý, sý ishinde áreket etý ádisteri bar. Erkebulan oqý-jattyǵý sabaǵyn durys meńgergenin kórsetti. Eń aldymen qutqarýǵa júgirgende kıimin sheship úlgergen. Áıtpese, sýǵa ketip bara jatqan adam ózin qutqarýshynyń kıimine jarmasyp, túrli qaıǵyly oqıǵalar jıi bolady. Ekinshiden, qyzǵa jetken soń birden jaǵaǵa súıremeı, eń jaqyn jerdegi qurylyqqa jetkizýi de óte durys bolǵan. О́ıtkeni, qyz jaǵaǵa jetkenshe ólip ketýi de múmkin edi. Oǵan qosa, sý óte salqyn, 8-9 gradýs, Erkebulannyń ózi de sińiri tartylyp, jaǵaǵa jete almaı qalý qaýpi boldy. Sondyqtan bolǵan oqıǵada óte jedel ári kásibı turǵyda eń durys sheshim qabyldap, adam ómirin qutqarǵan jaýyngerim úshin maqtanyp turmyn, - deıdi aranýly jasaq bóliminiń komandıri, podpolkovnık J.Qazmaǵambetov.
«О́z áreketimdi erekshe erlik dep oılamaımyn. Meniń ornymda bolǵan kez kelgen polısııa qyzmetkeri osylaı jasar edi» deıdi Erkebulan.
BQO Polısııa departamenti baspasóz qyzmetiniń jetekshisi polkovnık Bolatbek Belgibekovtiń aıtýynsha, 2019 jyldyń basynan beri Batys Qazaqstan oblysynda 130 sýısıd oqıǵasy tirkelse, 47 adam ózine ózi qol salyp qaza tapqan.
