Ol nebári 13 jasynda stýdent atanyp, 17 jasynda magıstrant bolyp, 18 jasynda magıstrlik dıssertasııasyn qorǵap, ónertaný ǵylymynyń doktoranty atandy. Ol – «Daryn» memlekettik syılyǵynyń eń jas ıegeri. Táýelsiz Qazaqstan tarıhyndaǵy 17 jasynda TMD Parlamentaralyq Assambleıasynyń «Mádenıet pen ónerdi damytýdaǵy eren eńbegi úshin» qurmet belgisimen marapattalǵan eń jas jáne jalǵyz mádenıet qaıratkeri. Ol – Bah, Mosart, Gaıdnnan bastap, qazirgi klassıkterge deıingi álemdik klassıkalyq shedevrlerdi jınaıtyn Ońtústik Illınoıs ýnıversıtetiniń (AQSh) «Discography» orkestrimen fortepıanoǵa arnalǵan týyndylardy oryndaıtyn álemdik qordyń qorjynyna týyndylary engen Qazaqstandaǵy eń jas ári jalǵyz kompozıtor. Ol – zamanaýı mýzykalardy oryndaýshylar men kompozıtorlardyń halyqaralyq akademııasynyń eń jas qatysýshysy.
Qarapaıym otbasynan shyǵyp, qaraqurym halyqty aýzyna qaratqan erekshe talant ıesiniń esimi – Ábdisaǵın Rahat-Bı Tólegenuly. Jas kompozıtor, pıanıst, halyqaralyq konkýrstardyń laýreaty Rahat-Bıdi elimiz túgili álem jurtshylyǵy da tanyp úlgerdi. Bizdiń keıipkerimizdiń shyǵarmalaryn Eýropa, Azııa jáne Amerıkanyń sımfonııalyq orkestrleri men kameraly ansamblderi, ataqty solıster oryndaıdy. Onyń mýzykasy Azııa men Eýropa elderiniń belgili konserttik zaldarynda jıi qoıylady. Shyǵarmalarynyń álemdik premerasy Praga, London, Vena, Parıj, Berlın, Seýl, Ankara, Ystanbul, Máskeý, Rogashke-Slatıne, Bergamo, Arkeıe, Alıkante, Almaty jáne Nur-Sultan qalalarynda ótti. Sheteldik synshylar Rahat-Bıge «qazaqtyń naǵyz ǵajaıyp qubylysy, minezinde ambısııasy, qolynda erekshe kúshi bar asqan sheber pıanıst» degen baǵa bergen. Ol – matematıkany zertteýge qyzyqqan, jan-jaqty ıntellektýal. 14 jasynda «Matematıka jáne qazirgi zamanǵy mýzyka» (Almaty, 2013) jáne «Mathematics and Contemporary Music» (Almaty, 2013) ǵylymı eńbekterin jarııalady. «Garmonııanyń shetteri» atty shyǵarmashylyq jumystar jınaǵynyń avtory.
Jaqynda Italııanyń Mılan qalasynda Rahat-Bı Ábdisaǵınniń «Sezilmeıtin juldyzdar serenadasy» týyndysynyń álemdik tusaýkeseri ótti degen súıinshi habar jetken bolatyn. Eske sala ketsek, Rahat-Bı Italııanyń úsh birdeı ataqty joǵary oqý ornyna doktorantýraǵa qabyldanǵan bolatyn. Olar – Djýzeppe Verdı atyndaǵy Mılan konservatorııasyna Master di II Livello (kompozısııa), Chezare Pollını atyndaǵy Padýıa konservatorııasyna Master di II Livello (fortepıano) jáne Rım qalasyndaǵy Santa-Chechılııa akademııasyna Corso di Perfezionamento (kompozısııa). Osy jyly ol atalǵan oqý oryndaryn nebári 20 jasynda támamdady.
О́ner jolynda ózindik qoltańbasyn qaldyryp úlgergen jas daryndy barlyǵy «Qazaqtyń Mosarty» dep ataıdy. On eki jasynan mýzyka jaza bastaǵan ol kóptegen bedeldi halyqaralyq jarystardyń laýreaty atandy. 100-den astam mýzykalyq shyǵarmanyń avtory, sonyń ishinde keń aýqymdy sımfonııalyq jáne ártúrli kameralyq shyǵarmalardyń avtory. Rahat-Bı osydan eki jyl buryn naýryz aıynda P.I.Chaıkovskıı atyndaǵy MMK-den bir aılyq tájirıbeden ótken bolatyn. Máskeý qalasyndaǵy aty ańyzǵa aınalǵan «Kompozıtor» baspa úıinen Rahat-Bı Ábdisaǵınniń «God’s dwelling» («Jılıshe Boga») men «Over the vault of depth» («Nad svodom glýbıny») atty sımfonııalyq kartınalarynyń partıtýralary shyqty. Dál qazirgi ýaqytta Rahat-Bı Ábdisaǵın ár jyl saıyn 24 elden 200-ge jýyq álemge áıgili mýzykanttar men pedagogtar qatysatyn P.I.Chaıkovskıı atyndaǵy jasóspirimder konkýrsynyń ádilqazylar múshesi bolyp tabylady.
Sonymen birge R.Ábdisaǵın – «Qazaqstannyń 100 jańa esimi» baıqaýynyń jeńimpazy.
