Bul mezgilde halyq nesibesi, el yrzyǵy ǵana jınalyp qoımaıdy, sondaı-aq onyń osy kezeńde urpaqty eńbekke, otansúıgishtikke baýlý, tabıǵatty taný, Jer ananyń qasıetin bilý jáne basqa da ıgi ister negizinde tárbıeleý isinde orny aıqyndala túsedi.
Máselen, jyl saıyn mol baılyǵyn usynar kúz maýsymy kelgende mektepter, balabaqshalar taqyrypqa sáıkes bezendirilip, osy baǵyttaǵy túrli tanymdyq-merekelik sharalar tárbıelik máni zor quralǵa aınalady. Sózimiz dáleldi bolý úshin aıta keteıik, taıaýda Nur-Sultan qalasyndaǵy №18 «Aıajan» balabaqshasynda «Altyn kúz» sharasy uıymdastyrylyp, jas óskinderdiń tanym-túsinigine oń áserin tıgizetin maǵlumattar berildi, tárbıelenýshiler ózderi jattaǵan taqpaqtaryn aıtyp, kórinister qoıdy. Sonyń ishinde, atalǵan balabaqshanyń «Búldirshin» tobyndaǵy tárbıelenýshiler «Altyn kúz» merekesine tyńǵylyqty daıyndalǵandaryn kórsetti.
«Búldirshin» tobynyń tárbıeshisi, uzaq jyldar bilim berý, jastar tárbıesi salasynda bar qajyr-qaıratyn jumsap eńbek etip kele jatqan tájirıbeli maman Turdygúl Aldamuratqyzy Hojabaevanyń aıtýynsha, №18 «Aıajan» balabaqshasynyń ujymy balalardy jaqsylyqqa úndeý, ıgi isterge baýlý baǵytyndaǵy sharalardy uıymdastyrý barysynda elimiz úshin mańyzy zor ataýly kúnderdiń, túrli merekelerdiń mán-mańyzyn ashyp kórsete otyryp, olardy tıimdi paıdalanýǵa basymdyq beredi.
«Jyl saıyn mamyrajaı jetetin kúz mezgiliniń halyq úshin qashanda mańyzy zor. Onyń artyqshylyqtaryn aıtyp taýysa almaısyz... Biz árbir kúz maýsymy kelgen saıyn balalarǵa onyń mán-mańyzyn, yrzyq-nesibesin túsindirý maqsatynda túrli sharalar uıymdastyramyz. Mundaı sharalar kezinde balalar ózderine unaıtyn jemis-jıdekter, dándi daqyldar, kókónister beınelengen nemese solarǵa uqsastyryla tigilgen kıimder kıip, taqpaqtar aıtyp, qoıylymdar kórsetedi. Bul óz kezeginde jas óskinniń óz týǵan jeriniń qasıetin uǵynýǵa, tabıǵatty súıýdi úırenýge kómektesedi», deıdi T.Hojabaeva.
