Kezdesýde taraptar eki el arasyndaǵy yntymaqtastyqty keńeıtýge erekshe mán beriletinin atap ótti.
Darıǵa Nazarbaeva óz sózinde О́zbekstan Qazaqstannyń Ortalyq Azııadaǵy mańyzdy strategııalyq áriptesi ekenin atap ótti. «Búginde Qazaqstan men О́zbekstan qarym-qatynastaryndaǵy barlyq salalarda damýdyń joǵary qarqyny kórinis taýyp otyr. Oǵan Qazaqstannyń Tuńǵysh Prezıdenti – Elbasy N.Á.Nazarbaevtyń jáne О́zbekstan Prezıdenti Sh.M.Mırzıeevtiń sińirgen eńbegi zor», - dedi Senat Tóraǵasy.
Senat basshysy elimizdiń Prezıdenti Q.K.Toqaev óziniń Memleket basshysy retinde shetelge barǵan ekinshi saparynda О́zbekstanda bolǵanyn atap ótti jáne ol ózara túsinistik pen tatý kórshilik turǵysyndaǵy qarym-qatynastardy odan ári nyǵaıtý nıetin pash etetinin aıtty.
Qazaqstan Senatynyń Tóraǵasy О́zbekstannyń aımaqtaǵy basty saýda áriptesi ekenin atap ótti. 2018 jyly eki el arasyndaǵy taýar aınalymy 25 paıyzǵa ósip, 2,5 mlrd dollarǵa jetken bolatyn. «Alǵa qoıǵan ortaq maqsatqa jetý úshin osy baǵyttaǵy jumysty jalǵastyra otyryp, ózara saýdany 5 mlrd dollar kólemine jetkizý kerek», - dedi joǵarǵy palata basshysy.
Darıǵa Nazarbaevanyń aıtýynsha, eki eldiń ınvestısııa, energetıka, týrızm, aımaqtyq jáne shekara mańyndaǵy yntymaqtastyq, tranzıttik-kólik salalaryndaǵy ózara is-qımyldy odan ári tereńdetýdiń keleshegi zor.
О́zbekstan Olıı Májilisi Senatynyń basshysy óz kezeginde Qazaqstan –О́zbekstannyń adal ári senimdi áriptesi ekenin jetkizdi. «Bizdiń halyqtarymyzdy ortaq tarıh jáne mádenı tamyrlastyq baılanystyrady. Damýdyń kóptegen salalary boıynsha uqsastyqtar bar. О́zbekstan Qazaqstanmen dostyq qarym-qatynasqa zor mańyz beredi», - dep atap ótti Tanzıla Narbaeva.
Taraptar keıingi kezde Qazaqstan men О́zbekstannyń parlamentaralyq únqatysýlary qarqyndy bola túskenin, endi ony júıeli túrde jalǵastyrý qajettigin aıtty. Ol parlamentaralyq yntymaqtastyqtyń birlesken komıssııasyn qurý arqyly júzege asqany jón.
Talqylaý barysynda reformalardy quqyqtyq qamtamasyz etý jáne áleýmettik-ekonomıkalyq damý salasynda tájirıbe almasý baǵdarlamalaryn júzege asyrý, sondaı-aq ekijaqty sharttar men kelisimderdi qabyldaý jáne ratıfıkasııalaý prosesterin jedeldetý máseleleri qozǵaldy.
Kezdesý sońynda Qazaqstan Respýblıkasy Parlamenti Senaty men О́zbekstan Respýblıkasy Olıı Májilisi Senaty arasyndaǵy 2019-2020 jyldarǵa arnalǵan yntymaqtastyqty damytý jónindegi birlesken Jol kartasyna qol qoıyldy.
