Reıdti uıymdastyrýshylar kópshilik kóp júretin «Rahmet» sýpermarketin tekserdi. Onda áleýmettik birinshi surypty nannyń baǵasy 75 teńgeden satylyp jatyr. Odan keıin tekserýshiler toby «Shapaǵat» sýpermarketine at basyn tiredi. Munda da áleýmettik nannyń baǵasy 75 teńgeden satylýda. «Jaýǵashty» bazary janyndaǵy áleýmettik dúkende nan ǵana emes, kartop, sábiz, qaraqumyq baǵasy da bazardan áldeqaıda arzan eken. Oblys ákimdiginiń bastamasymen ashylǵan on tórt áleýmettik dúkenniń segizi qalypty jumys istep tur. Aldaǵy ýaqytta barlyǵy iske qosylmaq. Bul dúkenderde birinshi surypty nan ǵana emes, áleýmettik suranysqa ıe 19 túrli azyq-túlik baǵasy bazardaǵy baǵadan tómen. Turaqtandyrý qory men tıisti mekemeler Qostanaı oblysymen kelisip, bıdaıdy tómen baǵamen satyp alyp, qaladaǵy nan óndiretin naýbaıhanalarmen baǵany turaqty ustap turýǵa ýaǵdalasqan kórinedi.
Túrkistan oblystyq turaqtandyrý qorynyń dırektory Maral Marasılovtyń aıtýynsha, qalanyń 80 paıyzyn nan ónimderimen qamtamasyz etetin «Aqjol» JShS-men kelisip, táýligine eki myń bólke nandy arzan etip eldiń dastarqanyna jetkizýde. Bul jumys barlyq aýdanda júrgizilýde.
Túrkistan qalasynyń 80 paıyzyn otyz túrli nan ónimimen qamtamasyz etetin «Aqjol» JShS-niń óndiris dırektory Násıba Ataeva áleýmettik nan baǵasyn túsirýge Turaqtandyrý qorymen kelisimshart kelesi jyly jańa bıdaı jınalǵanǵa deıin jasalǵanyn alǵa tartady.
Aldaǵy ýaqytta basqa da áleýmettik mańyzy bar azyq-túlik ónimderiniń baǵasyn turaqtandyrý maqsatynda Túrkistan oblysynyń azyq-túlik dúkenderine, sonymen qatar áleýmettik nan ónimderin shyǵaratyn qaıta óńdeý kásiporyndaryna dıirmender, naýbaıhanalarǵa nesıe berý máselesi qarastyrylýda.
Buǵan Túrkistan oblysy ákiminiń orynbasary Meıirjan Myrzalıev basqaratyn komıssııa jaýap beredi. Komıssııanyń birneshe otyrysy ótkizilip, qalada azyq-túlik baǵasyn turaqtandyrý boıynsha tıisti mekeme basshylaryna naqty tapsyrma berildi. Nátıjesinde Turaqtandyrý qorynyń janynan qajetti azyq-túlik qory jasaqtaldy. Oǵan kúrish, qaraqumyq, maı, tuz, et ónimderi kirdi. Kópshilik suranysyna oraı halyq kóp shoǵyrlanǵan aýdandarda kásipkerlermen birlesip taǵy da áleýmettik dúkender qataryn kóbeıtý josparlanyp otyr. Deldaldar men alypsatarlyqqa jol bermeý úshin ári ónim sapasyna qoǵamdyq baqylaý júrgizý maqsatynda áleýmettik dúkenderge de onlaın kassa apparattary ornatylady.
Eskendir ERTAI,
jýrnalıst
TÚRKISTAN
