Vıse-mınıstr atap ótkendeı, eger azamattar qandaı da bir elektrondy prosedýradan tabys tabatyn bolsa, oǵan da salyq salynýǵa tıis. Ol salyqtyń mólsheri de ártúrli bolýy kerek. Aıtalyq, jeke kásipker elektrondy qarjy aýdarymynan tabys tapsa – jeke tabys salyǵy salynady. Zańdy tulǵa bolsa, tıisinshe korporatıvtik tabys salyǵy, qosymsha qun salyǵy jáne taǵy basqalary tólenýge tıis.
– Máselen, eger siz kommýnaldyq esepshotty tóledińiz delik. Ony tekserýge bolady. Atalǵan qarjyny alýshy bar, oǵan Salyq komıteti monıtorıng júrgizedi. Al túrli jeke tulǵalardan tólem túsetin bolsa, onda ol adam kenetten tabys taba bastady ma degen saýal týyndaıdy. Árıne siz ákeńizge aqsha jiberseńiz, onyń kiris emes ekeni de túsinikti, – deıdi B.Sholpanqulov.
Vıse-mınıstr halyqtyń bireýge kómektesý úshin qaıyrymdylyq maqsatta jasalatyn qarajat aýdarymyna da toqtaldy. B.Sholpanqulovtyń aıtýynsha, onyń bárin salyq qyzmeti tekserip otyrady.
– Ondaı tólemderdiń túrin aıqyndap alý kerek. Aıtalyq aqsha aýdarymy taýarǵa nemese qaıyrymdylyqqa aýdaryldy degen sııaqty saralaý júrgizilip, barlyq tólemder belgilenip otyrýy kerek, – dedi vıse-mınıstr.
Qarjy mınıstrligi Kaspi.kz-pen birlesip qolma-qol esep aıyrysýdyń jańa zańdy jolyn jasaýdy qolǵa alyp jatqanyn da aıta keteıik. Taıaýda mınıstrlik ókilderiniń brıfınginde Qarjy vıse-mınıstri Rýslan Eńsebaev elimizdegi iri bankterdiń biriniń klıentteri qolma-qol aqshasyz esep aıyrysýdy komıssııasyz júrgizetinine toqtaldy.
– Kaspi Gold qazir óte tanymal qural. Tólem júıeleri týraly zań turǵysynan kelsek, barlyq talaptarǵa saı. Biraq Salyq kodeksi men fıskaldandyrý turǵysynan kelsek, talapqa saı kelmeıtin tustary bar. Biz oǵan tyıym salýdy oılastyrǵanbyz, biraq onda ekonomıkaǵa keri áser etýi múmkin. Mundaı ońaı qural birinshi kezekte tutynýshylar úshin yńǵaıly. Ekinshiden, qolma-qol aqshasyz tólemderdiń úlesin aıtarlyqtaı kóbeıtti, – dedi ol. Sol sebepti qazirgi tańda Qarjy mınıstrligi men Kaspi.kz birlesip jumys isteıtin baǵdarlama ázirleýde.
