17 qazan men 1 qarasha aralyǵynda Prezıdent janyndaǵy Joǵary attestattaý komıssııasy ótkizgen attestattaýǵa Prezıdent Ákimshiliginiń Basshysy tóraǵalyq etti. Sondaı-aq komıssııa quramyna Qaýipsizdik Keńes Hatshysy, Prezıdent Ákimshiligi Basshysynyń quqyqtyq máseleler jónindegi orynbasary jáne Quqyq qorǵaý jáne arnaıy organdarynyń basshylary kirdi.
Mundaǵy maqsat – polısııa qyzmetkerleriniń servıstik modelge kóshý jaǵdaıynda organ basshylarynyń kásibı daıyndyq deńgeıin, quqyqtyq mádenıetin jáne halyqpen jumys isteý qabiletin anyqtaý. Sondaı-aq basshylar quramyn jańartý jáne kadr rezervin qalyptastyrý máselesi de nazardan tys qalmady.
– Kezekten tys attestattaýǵa komıtetter (ákimshilik polısııa jáne kóshi-qon qyzmeti), ortalyq apparat jáne óńirler departamentteriniń, IIM joǵary oqý oryndarynyń basshylary laýazymdaryn atqaratyn qyzmetkerler jáne olardyń orynbasarlary qatystyryldy. О́zderińiz biletindeı, kezekten tys attestattaý merzimi sáýir aıynan qazan aıyna aýystyrylǵan edi. Alaıda, júrgizilip jatqan kadr jáne sybaılas jemqorlyqqa qarsy saıasat sheńberinde biz basshylyq quramdy aıtarlyqtaı jańarttyq, – dedi Erlan Turǵymbaev.
Mınıstrdiń aıtýynsha, bul jumys jurtshylyqty kadrlyq ózgerister týraly aqparattandyra otyryp, ashyq júrgizildi. Nátıjesinde, birinshi basshylardyń 60%-y (21 organ basshysy) jańartyldy. Onyń ishinde, IIM ortalyq apparatynyń (ákimshilik polısııa, shtab, krımınaldyq polısııa, tergeý, ekstremızmge, esirtki qylmysyna qarsy is-qımyl, ózindik qaýipsizdik, kadr saıasaty, ishki aýdıt, jedel-krımınalıstıkalyq jáne 2 jedel departamentterdiń) basshylary bar. Budan bólek, aýmaqtyq polısııa departamentteriniń 9 bastyǵy aýystyryldy. Olardyń qatarynda Nur-sultan qalasy, Aqmola, Aqtóbe, Atyraý, Qaraǵandy, Qyzylorda, Pavlodar, Soltústik Qazaqstan oblystarynyń jáne kóliktegi polısııa departamenti basshylar bar.
Sondaı-aq ortalyq apparatta 15 bastyqtyń orynbasarlary men aýmaqtyq polısııa departamentteriniń 35 orynbasary jańartyldy. Bul rette, joǵary oqý oryn basshylarynyń 40%-y aýysqanyn alǵa tartamyz. Barlyǵy 4 birinshi basshy men 6 orynbasar (Qaraǵandy akademııasynda – 3, Almatyda – 2 jáne Qostanaıda – 1) aýysty.
О́z kezeginde, áńgimelesý qorytyndysy boıynsha 19 basshy joǵary laýazymǵa usynyldy.
Raýan QABIDOLDA,
«Egemen Qazaqstan»
