Iskerlik baılanysty qalyptastyrý máseleleri jaıly jan-jaqty pikir almasýǵa Soltústik Eýropadaǵy qazaq dıasporasynyń kóshbasshylary men belsendileri, sonymen qatar Qazaqstannyń Shvesııadaǵy elshisi Qaırat Ábdirahmanov, Dúnıejúzi qazaqtarynyń qaýymdastyǵy Tóraǵasynyń orynbasary Arǵyn Ospanov, «Otandastar» qorynyń jaýapty qyzmetkerleri, Shvesııanyń Qazaqstandaǵy tuńǵysh elshisi Manne Venborg, Qazaqstannyń Danııa, Fınlıandııa, Shvesııadaǵy qurmetti konsýldary qatysty.
Iskerlik jıynǵa, sondaı-aq atalǵan elderdiń kompanııalarynda jumys isteıtin qazaqstandyqtar men jún óńdeý, aýyl sharýashylyǵy, agrotýrızm jáne basqa da jobalarmen aınalysatyn Túrkistan jáne Qaraǵandy oblystarynyń bıznesmenderi keldi.
Dúnıejúzi qazaqtary qaýymdastyǵy men qor ókilderi qyzmetteriniń negizgi baǵyttary, onyń ishinde shetelderdegi qandastarmen mádenı-gýmanıtarlyq jáne iskerlik baılanysty keńeıtý ári nyǵaıtýdy kózdegen «Otandastar» qorynyń negizgi jobalarynyń biri – «Qazaq úıi» qazaq mádenı-iskerlik úıiniń quramyna kiretin iskerlik úıleri men mádenı ortalyqtardyń álem boıynsha jelisin qurý josparymen tanystyrdy.Forýmǵa qatysýshylarǵa Qazaqstannyń ınvestısııalyq áleýeti men óńirlerde bıznesti damytý úshin jasalǵan jaǵdaılar jaıynda aqparat berildi. Shvesııadaǵy qazaqstandyq jastar qaýymdastyǵynyń tóraıymy Aıdana Bekbergen forýmǵa qatysýshylar aldynda tuńǵysh ret otandastardyń jas býynǵa úndeýi jazylǵan elektrondy formattaǵy ýaqyt kapsýlasyn saldy. Ol tek 2025 jyly ashylatyn bolady.
Jıynǵa qatysýshylar delegasııa quramyndaǵy kásipkerlerdiń usynystaryna aıtarlyqtaı qyzyǵýshylyq tanytty. «Shymkent Kashemır» jún óńdeý fabrıkasynyń quryltaıshysy ári basshysy Sh.Qanjarbaıuly Skandınavııa elderine ónimderin ótkizýdi jolǵa qoıý jaıyn qozǵasa, «Toksumak» biregeı eko-agro-aýyl avtory O.Omarov aýyl turǵyndarynyń áleýmettik ahýalyn nyǵaıtatyn, elge oralǵan qandastarǵa berik baza bolatyn jobalarǵa ınvestısııa tartý týraly oıyn ortaǵa saldy.
Bıyl altynshy ret uıymdastyrylyp otyrǵan is-shara álemdegi qazaq dıasporasy men qazaqstandyqtardyń tarıhı Otan tóńireginde birigýiniń jemisti úlgisi bolǵandaı.
