«Búgin Almatyda elimizdiń barlyq qarjygerleri naryq jáne ekonomıkanyń naqtyly sektorynyń ózekti máselelerin talqylaýda. Ulttyq valıýta teńge jáne kapıtalmen jumys isteıtinderdiń kásibı merekesi kúni dástúrli kezdesý ótti. Qarjylyq turaqtylyq pen kásibı tabys tileımin!», dep jazdy qala ákimi twitter paraqshasynda.
Osydan 26 jyl buryn 1993 jyldyń 12 qarashasynda Qazaqstannyń Tuńǵysh Prezıdenti Nursultan Nazarbaev ulttyq valıýta engizý týraly jarlyqqa qol qoıdy. Araǵa úsh kún salyp, Qazaqstannyń ulttyq valıýtasy - teńge aınalymǵa endi. 1992 jyldyń 27 tamyzynda Ulttyq bank teńge kýpıýrasynyń úlgilerin bekitti. Ertesine ulttyq valıýtany ázirleýge kirisken Tımýr Súleımenov, Meńdibaı Alın, Aǵymsaly Dúzelhanov, Qaırolla Ábjálelovter Anglııaǵa attandy. Alǵashqy tól teńgemiz Ulybrıtanııanyń áıgili «Harrıson jáne uldary» fabrıkasynda basylyp shyqty.
Osylaısha, Qazaq dalasynyń uly tulǵalary Ál-Farabı, Abylaı, Abaı, Jambyl, Súıinbaı, Shoqandardy beınelegen alǵashqy teńgeler jaryqqa shyqty. Olardyń aınalymǵa túskeni shyn táýelsizdiktiń kórinisi boldy.
2006 jyly 15 qarasha kúni ulttyq valıýtamyzdyń jańa dızaınmen árlengen 200, 500, 1000, 2000, 5000 jáne 10000 teńgelik banknottary aınalymǵa endi. Dızaın memlekettik rámizderdi, elimizdiń sáýlet nysandary men tabıǵı landshaftaryn beıneleı otyryp, Qazaqstannyń osy zamanǵy beınesin beredi. 2007 jyldyń mamyr aıynda Taılandta ótken valıýta konferensııasynda 10 myńdyq teńgemiz «Úzdik jańa banknot» atalymy boıynsha birinshi orynǵa ıe boldy.
Al teńgeniń 20 jyldyǵyna 20 myńdyq banknottar jasaldy.
