Taraptar áńgime barysynda ekijaqty qarym-qatynastardy damytý, saýda-ekonomıkalyq yntymaqtastyqty keńeıtý, mádenı-gýmanıtarlyq saladaǵy ózara is-qımyl máselelerine toqtaldy.
Darıǵa Nazarbaeva ózara saýda kólemin ulǵaıtý, taýar aınalymy men alýandyǵy qurylymyn keńeıtý qajettigin atap ótti. 2018 jyldyń qorytyndysy boıynsha Qazaqstan men Armenııa arasyndaǵy syrtqy saýda aınalymy 33,9 paıyzǵa artqan bolatyn.
«Bul keleshekte taýar aınalymynyń ulǵaıatynyn kórsetedi, bolashaqta ózara saýda kólemin arttyrýǵa mańyzdy úles qosady. Qazaqstan ónimderin eksporttaýda Armenııa naryǵy zor yqylas týǵyzady. Biz mashına jasaý, metallýrgııa, tamaq ónerkásibi, qurylys materıaldary jáne hımııalyq ónimder sııaqty salalarda eksport kólemin ulǵaıtýǵa daıynbyz», - dedi ol.
Nıkolaı Pashınıan óz kezeginde Armenııanyń Qazaqstanmen ekonomıkalyq baılanystary týraly aıta kelip, olardy damytýdyń zor áleýeti men paıda túsetin túrli sıpatta iske asýy yqtımaldyǵyn atap ótti.
