Kúreń kúzdi uzatyp salyp, qys maýsymy bastalar tusta Alataýdan esken salqyn samalmen tynystap, shańǵy tebý úshin Almatyǵa asyǵatyn sheteldikterdiń ishinde Reseı men Qytaıdan keletin týrıster kósh basynda tur. Al kóne shahardyń kórkine kózaıym bolyp, qysqy demalysyn Almatyǵa tańatyndardyń arasynda kórshiles qos memleketten keıin ońtústikkoreıalyqtardyń úles salmaǵy basym kórinedi. Qysy-jazy shyńynan qar ketpeıtin tarıhı demalys orny bul maýsymda jańa tynys alǵan dersiz. Nege deseńiz, mundaǵy barlyq jabdyq tutastaı jańartylyp, taý shańǵysynyń sany úsh myńǵa deıin kóbeıgen. Bul týraly qala ákimi Baqytjan Saǵyntaev óziniń áleýmettik jelidegi paraqshasyna jazdy.
«Shymbulaqta taǵy bir shańǵy maýsymyn ashtyq. Bıyl mundaǵy jalǵa beriletin aımaq eki esege artty. Kúrdeliligi túrli deńgeıdegi 25 shaqyrym trassa daıyndaldy. О́tken jyly munda shamamen 682 myń adam kelgen. Onyń 220 myńy shańǵyshylar. Kelýshilerdiń jyl saıyn 15 paıyzǵa ósýi týrısterge kórsetiletin qyzmet sapasynyń artqanyn ańǵartady. 65 jyldyǵyn atap ótkeli otyrǵan taý kýrorty sheteldik týrıster úshin, ásirese Reseı, Qytaı jáne Ońtústik Koreıa elderine tanymal demalys ornyna aınaldy», delingen qala ákiminiń jazbasynda.
Shymbulaq shatqalyna aıdyndaı taıǵanaq muz joldaryn jany súıetin shańǵyshylar, sheberlikterimen tańǵaldyratyn snoýbordshylar kóptep keledi. Sebebi bul jerde arnaıy otyrǵyshy bar kóterme joldarmen teńiz deńgeıinen 3163 m bıiktiktegi Talǵar asýyna shyǵý múmkindigi bar. Mundaǵy asýdan túsetin jer óte tik bolǵandyqtan, kásibı shańǵyshylar úshin armanǵa qanat bitiretin taptyrmas oryn. Al esh jerde qaıtalanbaıtyn atmosferadan qala turǵyndary erekshe rýhanı kúsh alatynyn aıtady.
