«Babadan qalǵan qazynam» atty qazaq halyq aspaptarynyń aımaqtyq festıvaliniń maqsaty mádenı muramyzdy damytý, aımaqtar arasynda mádenı baılanysty nyǵaıtý men halyq aspaptarynda oınaý dástúrin dáripteý boldy. Festıvaldiń birinshi kezeńinde ansamblder óner kórsetti. Qazaq halyq aspaptary asataıaq, shańqobyz, shyldyrmaq kóne aspaptarmen tolyqtyrylyp, klassıkalyq áýender men halyq sazdaryn naqyshyna keltire oryndady. Ásirese, Qarasý aýdany óner mektebinen kelgen «Dala áýeni», Altynsarın aýdanynan «Ata mura», Qostanaı aýdanynyń «Kók bóri» etnoansambli, Áýlıekól aýdany óner mektebiniń «Qazyna» etnoansambli shyǵarmalardy náshine keltire oryndady.
Ekinshi kezeńde osy aımaqtardan kelgen ólkeniń óner sańlaqtary topqa túsip, ózderiniń ónerin kórsetti. Onda Qarasý aýdanynan «Ilegaı» kvartetiniń, Altynsarın aýdanynan Sahabeden Aıbektiń, Qostanaı aýdanynan Murat Tileýǵabylotyń, Ybyraı Esjanovtyń, Naýryzym aýdanynan kelgen Balmeken Shákibaevanyń, Qamysty aýdanynan kelgen Madı Baızaqovtyń, Áýlıekól aýdandyq mádenıet úıiniń mýzykalyq jetekshisi Almaz Hamıtbekovtyń ónerine kórermender tánti boldy.
Áýlıekól mádenıet jáne tilderdi damytý bóliminiń basshysy Jibek Kákimjanqyzy is-sharaǵa qatysqan barlyq ónerpazdarǵa alǵysyn aıtyp, qazaq halqynyń ǵasyrlar boıy jınaqtalǵan ulttyq qundylyǵy, rýhanı mádenıetimizdi jańǵyrtýda bul is-sharanyń mańyzdylyǵyn atap ótti.
Qostanaı oblysy,
Áýlıekól aýdany
