Bolatbek Beıisbektiń otbasynda segiz adam shyǵarmashylyqpen aınalysady. Bolatbek Bektasuly Beıisbekov, Kúlásh Aıdarbekova, Berik Bolatbekuly Beıisbekov, Mádına Nurlanqyzy Ahmetova, Venera Bolatbekqyzy Beıisbekova, Aqbota Bolatbekqyzy Beıisbekova, Araılym Bolatbekqyzy Beıisbekova jáne Nuraı Berikqyzy Beıisbek. Úlken shyǵaramshylyq áýlette Qazaqstan Sýretshiler odaǵynyń jeti múshesi, Qazaqstan Qolónershiler odaǵynyń bes múshesi bar. Olardyń arǵy ata-babalary qolónerimen aınalysqan, osy kórkem dástúrden bastaý alatyn áýlettiń ónerdegi óz joly, óziniń dara stıli, ózindik qoltańbasy qalyptasqan.
Sharanyń ashylý saltanatynda sóz alǵan Ulttyq mýzeı dırektorynyń orynbasary Almaz Nurazhan: «Qurmetti, óner súıer qaýym! Qazaqstanda áýletpen ortaq jumys isteıtinder sanaýly ǵana. Sonyń biri – Beıisbekovter otbasy. Búgingi kórmege usynylǵan týyndylar dúnıejúzine tanystyrylyp, Túrkııa, Nıderlandy, Germanııa, t.b. elderge kórsetilip, laıyqty baǵasyn alǵan. Urpaqtan-urpaqqa jalǵasqan otbasylyq ónerdiń arqasynda bul azamattar qazaqtyń rýhyn kóterip, ulttyq ónerdi nasıhattap júr. Sizderdi Mádenıet jáne sport mınıstri Aqtoty Raıymqulovanyń, Ulttyq mýzeı dırektory Arystanbek Muhamedıulynyń atynan quttyqtap, zor densaýlyq tileımin. О́sip, óne berińizder», - dedi.
Beısbekov Bolatbek Bektasuly - shyǵarmashylyq jetistikteriniń arqasynda Túrkimenstan, Kazan,Týrsııa, Tashkent, Germanııa, Qytaıda ótken dúnıe júzilik qolóner sheberleriniń 50 jyldyq mereıtoıynda, Indııa, Vetnamda jáne alys-jaqyn shetelderde kórme, sımpozıýmdarǵa qatysyp, qazaq qolónerin nasıhattaýda. Jary Aıdarbekova Kúlásh О́serqyzy da joldasy B. Beısbekovpen qolónerdiń qundylyǵyn qaryshtatyp keledi. О́nerli otbasynda alty balany tárbıelegen altyn qursaqty ana men ardaqty ákeniń tórt balasy qazaq óneriniń janashyrlaryna aınalǵan.
QR mádenıet qaıratkeri, mýzeı isiniń ardageri, QR Qolónershiler odaǵynyń kórme kýratory Rysgúl Bektalıeva: «Ulttyq mýzeı qashanda ult ónerin dáripteıtin, ult ónerin dúnıejúzine pash etetin tanym men tarıh, taǵlym ordasy. Sondyqtan qolóner sheberleriniń, ónerli otbasynyń óziniń Qazaqstandaǵy alǵy jolyn Ulttyq mýzeıden bastaýy zańdylyq. Qazaqtyń oıý-órnegin sóıletse, ol arman-tilekti, batany, baqyt, tolysý, kóbeıýdi bildiredi. Búgingi kórmeden sol ǵajap erekshelikti tamashalaı alasyzdar», - dedi.
Uıada ne kórseń, ushqanda sony ilersiń demekshi, Bolatbek Bektasulynyń otbasylyq óneri ata-babasynan bastaý alǵan. Búginde bul óner urpaqtan-urpaqqa jalǵasyp, januıadaǵy mektep qabyrǵasynda júrgen balalaryna deıin darypty. Bir jaǵadan bas, bir jeńnen qol shyǵaryp, zor eńbekpen júzege asyrǵan ónerli otbasynyń orasan jumysy halyqqa berer úlgi-ónegesi mol, qaıtalanbas týyndylar. Olardyń árqaısysy avtordyń ózgege uqsamas, ózine tán qoltańbalyq sheberlikterin aıqyndaıtyn buıymdar. Onyń nátıjesi buǵan deıin ótkizilgen «Asylmura», «Shańyraq», «Týǵanjerge taǵzym», «Kóktem úni» atty otbasylyq shyǵarmashylyq kórmelerinde kórinis alǵan.
Shara barysynda Aqbota Bolatbekqyzy Beıisbekovanyń avtorlyǵymen qazaq ulttyq kıim úlgileriniń defılesi kórsetildi.
Sonymen qatar Nur-sultan qalasy sýretshiler odaǵynyń tóraǵasy Ismaılov О́miráli otbasy múshelerin úzdik ónerleri úshin marapattap, shyǵarmashylyq tabys tiledi.
