Baýyrlas elmen baılanystyń jańa belesi – Qazaqstan Prezıdenti Q.Toqaevtyń Qyrǵyzstanǵa alǵashqy memlekettik sapary tabysty qorytyndylandy

Arnur ASQAR,

«Egemen Qazaqstan» – Bishkekten (Qyrǵyzstan)

Qazaqstan Prezıdenti Qasym-Jomart Toqaev Prezıdent Sooronbaı Jeenbekovpen birge Bishkektegi «Ata beıit» Ulttyq tarıhı-memorıaldyq keshenine bardy. Memleket basshylary 1916 jylǵy qaıǵyly oqıǵa kezinde qaza bolǵandarǵa ornatylǵan eskertkishke gúl shoǵyn qoıdy. Sondaı-aq eki el prezıdentteri kórnekti qyrǵyz jazýshysy Shyńǵys Aıtmatovtyń qabirine baryp, rýhyna taǵzym etti.

Odan keıin prezıdentter Ala Archa rezıdensııasynyń «Aqsaqaldar» zalynda shaǵyn qurammen kezdesý ótkizdi. Kezdesýge elimizdiń delegasııasy sapynan Syrtqy ister mınıstri Muhtar Tileýberdi, Úkimet basshysynyń birinshi orynbasary – Qarjy mınıstri Álıhan Smaıylov, Prezıdenttiń kómekshisi Murat Nurtileýov, Qazaqstan Respýblıkasynyń Qyrǵyz Respýblıkasyndaǵy elshisi Qaırat Nurpeıisov, Ekologııa, geologııa jáne tabıǵı resýrstar mınıstri Maǵzum Myrzaǵalıev qatysty. Eki memlekettiń basshylary Qazaqstan men Qyrǵyzstan arasyndaǵy strategııalyq seriktestiktiń qazirgi ahýaly men perspektıvalaryn talqylady.

Shaǵyn quramdaǵy kezdesýdiń ná­tı­jesi týraly Sooronbaı Jeenbekov:

– Bizdiń kelissózimiz dástúrli baýyrlastyq jáne ózara túsinistik rýhynda ótti. Ekijaqty áriptestikke baılanysty mańyzdy máselelerdi talqyladyq. О́zara is-qımylǵa qatysty sheshýshi máseleler boıynsha ýaǵdalasyp, ony sheshýdiń tetikterin anyqtadyq. Bizdiń kelissózimiz Qyrǵyzstan men Qazaqstan arasyndaǵy qatynastardy damýdyń jańa sapaly deńgeıine kóteretinine senim bildiremin. Qyrǵyzstan-Qazaqstan strategııalyq áriptestigi men odaqtyq qatynastar aldaǵy ýaqytta da bizdiń halyqtarymyzdyń ıgiligine qyzmet etedi, – dedi. Ol Qazaqstan Prezıdentine óziniń shaqyrtýyn qabyl alyp, qyrǵyz eline memlekettik saparmen kelgenine alǵysyn bildirdi.

Eki el delegasııasynyń shaǵyn qu­ram­daǵy otyrysynyń nátıjesine Qazaqstan Prezıdenti Qasym-Jomart Toqaev ta joǵary baǵa berdi.

– Qurmetti Sooronbaı Sháripuly! Eń aldymen baýyrlas qyrǵyz elinde ys­tyq yqylaspen qarsy alyp, jyly qo­naqjaılyq kórsetkenderińiz úshin alǵys bildiremin. Sizdiń qyrǵyz eline memlekettik saparmen kelýge shaqy­rýyńyzdy zor rızashylyqpen qabyl aldym. Bul sońǵy jartyjyldyqtaǵy bizdiń úshinshi kelissózimiz. Osyndaı tyǵyz jumystyń nátıjesinde, keń aýqymdy baǵyttar boıynsha ekijaqty baılanystar elderimizdiń jaqyndasýyna jáne halyqtarymyzdyń ál-aýqatyn jaqsartýǵa oń yqpal eterine kámil senemin! Osyǵan deıin shaǵyn quramda mańyzdy máselelerdi talqyladyq. Birqatar kelisimderge qol jetkizdik. Qazir ótetin Joǵary Memleketaralyq keńesti memleketterimizdiń arasyndaǵy stra­tegııalyq áriptestikti odan ári nyǵaı­týdyń taǵy bir tamasha múmkindigi dep bilemin, – dedi Qasym-Jomart Toqaev.

Memleket basshysy óz sózinde osyn­daı formattaǵy otyrystyń 2014 jy­ly Qazaqstan astanasynda ótkenine toq­taldy.

– Keńes jumysynyń biraz ýaqyt kidirip qalǵanyna qaramastan, atalǵan jıyn ekijaqty qatynastardyń barlyq baǵyt­tary boıynsha mańyzdy saıası sheshim­der qabyldaýǵa septigin tıgizetin ynty­maqtastyqtyń joǵary organy bolyp qala beredi, – dedi Qasym-Jomart Toqaev.

Prezıdenttiń aıtýynsha, Qyrǵyzstan Qazaqstan úshin tatý kórshi, odaqtas jáne baýyrlas memleket. 

– Bizdi myńdaǵan jyldardan beri jalǵasyp kele jatqan dostyqtyń berik arqaýy biriktiredi. Ata-babalarymyz ǵasyr­lar boıy beıbitshilik pen kelisim­de ómir súrdi, qıly kezeńderde bir-birine qoldaý kórsetti. Osyndaı dos­tyq baılanystardyń negizinde biz qazirgi kezeńde de ózara qarym-qatynas­ta­rymyzdy tabysty jolǵa qoıa bildik, – dedi Qasym-Jomart Toqaev.

Qazaqstan Prezıdenti mańyzdy jetis­tik retinde osyǵan deıin jasalǵan 180-ge jýyq kelisimniń sharttyq-quqyqtyq bazasyna nazar aýdardy.

– Qazaqstan men Qyrǵyzstan turaqty aımaqtyq jáne jahandyq áriptestikke súbeli úles qosyp keledi. Bizdiń halyq­aralyq saıasattyń kún tártibindegi kóp­tegen ózekti máselelerge qatysty kózqarasymyz uqsas, – dedi Qazaqstan Prezıdenti

Sondaı-aq Q.Toqaev eki eldiń 180-ge tarta kelisim men ýaǵdalastyqtan turatyn salmaqty kelisimdi-quqyqtyq baza qalyptastyrǵanyn atap kórsetti. Qazaqstan men Qyrǵyzstannyń múddesine saı keletin kóptegen máselege qatysty syndarly talqylaý ótkizip, tıimdi sheshimge kelýge kómektesetin basqa da mańyzdy ınstıtýttar bar. Qazaqstannyń ekijaqty qatynastarynyń mundaı jan-jaqty ınstıtýsıonaldyǵy ózge eshbir memleketpen jasalmaǵan.

Memleket basshysy kólik-tranzıttik ınfraqurylymy qalyptasqan ortaq shekaranyń bolýy, Eýrazııalyq ekono­mıkalyq odaq aıasyndaǵy seriktestigi – eki eldiń ekonomıkalyq baılanystarynyń basymdyǵy dep atap ótti. Osynyń arqasynda Qazaqstan Qyrǵyzstannyń jetekshi saýda seriktesteriniń birine aınalyp, kórshi eldiń syrtqy saýda aınalymynda úshinshi orynǵa berik ornyqty.

– Bizdiń saýda aınalymdarymyzdyń kórsetkishi úshinshi jyl qatarynan óskeni baıqalady. 2015-2018 jyldar aralyǵynda ózara saýda-sattyq kólemi 30 paıyzǵa artyp, 900 mıllıon dollarǵa jetti. Qazaqstan qyrǵyz ekonomıkasyna 1 mıllıard dollardan astam qarjy quıǵan iri ınvestorlardyń biri boldy, – dedi Qazaqstan Prezıdenti.

Qazaqstan Respýblıkasy men Qyrǵyz Respýblıkasy Joǵary memleketaralyq keńesiniń 5-otyrysy boldy. Kelissózder barysynda saıası, saýda-ekonomıkalyq, ınvestısııalyq jáne mádenı-gýma­nı­tarlyq saladaǵy ekijaqty is-qımyldar máselesi talqylandy.

Memleketter basshylary Qazaqstan men Qyrǵyzstan arasyndaǵy baılanys­tardy qalyptastyrý jáne damytý isindegi Qazaqstannyń Tuńǵysh Pre­zı­denti – Elbasy Nursultan Nazarbaevtyń eńbegin atap ótti.

Kelissózder barysynda qyrǵyz tara­py 2020 jyly Bishkekte Abaı Qunan­baıulyna eskertkish ornatylatyny týraly sheshim qabyldanǵanyn aıtty.

Kelissózder qorytyndysy boıynsha kelesi qujattarǵa qol qoıyldy:

- Qazaqstan Respýblıkasy Pre­zı­denti men Qyrǵyz Respýblıkasy Pre­zıdentiniń birlesken deklarasııasy;

- «Qazaqstan Respýblıkasy men Qyr­ǵyz Respýblıkasy arasyndaǵy ynty­maq­tastyqtyń 2020-2022 jyldarǵa arnalǵan keshendi baǵdarlamasy»;

- Joǵary memleketaralyq keńestiń sheshimder jıyntyǵy;

- Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy kóshi-qon sala­syn­daǵy yntymaqtastyq týraly kelisim;

- Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qazaqstan Respýb­lıkasynyń «Qarasý – avtojol» jáne Qyrǵyz Res­pýb­lıkasynyń «Aq tilek – avtojol» ótkizý pýnktteri arasynda jańa kópir salý jáne qazirgi kópirdi qaıta jóndeý jónindegi birlesken is-qımyl týraly kelisim;

- Qazaqstan Respýblıkasynyń Qarjy mınıstrligi men Qyrǵyz Respýblıkasy Ekonomıkalyq qylmystarǵa qarsy kúres jónindegi memlekettik qyzmeti (qarjy polısııasy) arasyndaǵy ekonomıkalyq jáne qarjylyq qylmystarǵa qarsy kúres salasyndaǵy yntymaqtastyq týraly kelisim;

- Qazaqstan Respýblıkasynyń Qor­ǵa­nys mınıstrligi men Qyrǵyz Respýb­lı­kasynyń Qarýly Kúshteriniń Bas shtaby arasyndaǵy Qazaqstan Respýb­lı­kasynyń Qarýly Kúshteri men Qyrǵyz Respýblıkasynyń Qarýly kúshteriniń áskerı aerodromdarynda áskerı áýe kemelerin qabyldaý, aerodromdyq-teh­nıkalyq qamtamasyz etý jáne kúzetý týraly kelisim;

- Qazaqstan Respýblıkasynyń Den­saýlyq saqtaý mınıstrligi men Qyrǵyz Respýblıkasynyń Densaýlyq saqtaý mınıstrligi arasyndaǵy densaýlyq saqtaý salasyndaǵy yntymaqtastyq týraly kelisim;

- Qazaqstan Respýblıkasynyń Saýda jáne ıntegrasııa mınıstrligi men Qyrǵyz Respýblıkasynyń Úkimeti janyndaǵy Ekologııalyq jáne tehnıkalyq qaýip­sizdik jónindegi memlekettik ınspeksııasy arasyndaǵy yntymaqtastyq pen ózara túsinistik týraly memorandým;

- Qazaqstan Respýblıkasy men Qyr­ǵyz Respýblıkasynyń aýmaǵynda ınves­tısııalyq jobalardy ilgeriletý jáne iske asyrý jónindegi birlesken qyzmet týraly kelisim.

Qazaqstan men Qyrǵyzstan dele­ga­sııa­larynyń arasynda ótken kelissózder qorytyndysy boıynsha Qasym-Jomart Toqaev pen Sooronbaı Jeenbekov buqa­ralyq aqparat quraldary úshin birlesken málimdeme jasady.

– Qurmetti Qasym-Jomart Kemel­uly! Sizdiń memlekettik saparyńyz qazaq-qyrǵyz qatynastaryna odan ári oń yq­palyn tıgizedi dep senemiz. Búgin biz memle­ket­aralyq is-qımyldyń negizgi baǵyttaryn talqyladyq. Qyrǵyz-qazaq elderi­niń múddesin qam­tyǵan mazmundy jáne nátıjeli kezde­sýler ótkizdik. Keli­s­sózder ózara senim men túsinistik rýhynda ótkenin atap ótemin. Bizdiń baýyrlas elderimizdiń ortasynda jańa strategııa­lyq qatynastardy tereńdete túsýdiń joldaryn talqyladyq. Sońǵy 5 jyl­dyń ishinde uıymdastyrylmaı kelgen Joǵary memleketaralyq keńes oty­rysy tabysty ótti. Saýda-ekono­mı­kalyq, mádenı-gýmanıtarlyq, sý-energetıkalyq jáne kólik baǵytyndaǵy ózara áre­ket­terge kóńil bóldik. Odan basqa baǵyt­tarda da baılanysty keńeı­tý týraly aqyldastyq. Tarıhy, tili, dini, salt-dás­túri uqsas eki eldiń máde­nı salasyna kóńil bóldik. Atalǵan sala­daǵy baılanystardy qazirgiden de jandandyra túsý kerek degen ortaq sheshimge keldik. Eýrazııa ekonomıkalyq odaǵynyń aıasyndaǵy birlesken is-qımyl­dar máselesin tal­qy­ladyq. El­aralyq ózekti máseleler tóńireginde ózara pikir almastyq. Kóp tarapty qyzmet­testiktiń formatynda atqarylýǵa tıis bir­lesken áreketterdi aı­qyndadyq. Bizdiń úkimetterimiz ara­syn­daǵy ózara saýda-sattyq kólemin qanat­tandy­rý joldaryn belgiledik. Byl­tyrǵy jyl­men salystyrǵanda saýda-sattyq kóle­mi bıyl 10 paıyzǵa joǵa­rylady. Qyr­ǵyzstandaǵy qazaq-qyrǵyz birlesken kásip­oryndarynyń sany 1900-ge jetke­ni ekonomıkalyq baǵyttardaǵy jumys­tar­dyń qarqyn alǵanyn bildiredi. Búgingi kelissózderdiń qorytyndysy boıynsha birqatar mańyzdy qujatqa qol qoıyldy. Negizgi qujattardyń biri «Qazaqstan Respýblıkasy men Qyrǵyz Respýblıkasy arasyndaǵy 2020-2022 jyldarǵa arnalǵan yntymaqtastyqtyń keshendi baǵdarlamasy. Atalǵan baǵ­­dar­­lama eki taraptyń qarym-qatyna­syn­yń barlyq salasyn qamtıdy. Qyr­ǵyz tarapy osy kelissózderdiń qory­tyn­dysyna razy ekenin jáne búgingi jumys­tarymyzdyń jemisti bolǵanyn erekshe atap ótkim keledi. Búgingi tal­qy­laýlar saıası-ekonomıkalyq, mádenı-gýma­nıtarlyq salalarda baılanys­tardy kúsheıtýge yqpal etedi. Qazaq­stan Res­pýblıkasynyń Prezıdenti – qur­met­ti Qasym-Jomart Toqaevtyń Qyr­ǵyz Res­pýb­lıkasyna memlekettik sapa­rynyń qorytyndysy eki eldiń yntymaǵyn, baýyrlastyǵyn arttyra túsedi, – dedi Sooronbaı Jeenbekov.

О́z kezeginde Qazaqstan basshysy qyr­­ǵyzstandyq áriptesine jáne barsha qyrǵyz halqyna ystyq yqylaspen qarsy alǵany úshin taǵy da alǵys bildirdi. Baýyrlas Qyrǵyzstanǵa memlekettik saparynyń mán-maǵynasy erekshe ekenine toqtaldy.

– Onyń sebebi barshańyzǵa aıqyn. Ejelden bizdiń elderimizdi yntymaq, dostyq baılanystyrady. Ata-baba­myz­dan mıras bolyp qal­ǵan osy berik arqaý­dyń negizinde eki el arasyndaǵy odaq­tas­tyq jáne stra­te­gııalyq yntymaq­tastyq tabysty damyp keledi. Osy qundylyqtardy eselep, qazaq-qyrǵyz qatynastaryn jańa satyǵa kóterý úshin kúsh-jigerimizdi biriktirip, jumylyp jumys isteımiz dep senemin, – dedi Qasym-Jomart Toqaev. 

Prezıdent atap ótkendeı, Qyrǵyz­stan – Qazaqstan úshin odaqtas memleket, qaıyrymdy kórshi, baýyrlas el. Qashanda bizdiń halyqtardyń arasyn­daǵy tereńnen tamyr tartatyn tyǵyz ba­ýyrlastyq qatynastar tatý kórshiliktiń myzǵymas negizi bolyp keledi. Baba­la­rymyz árqashan bir-birine qolushyn berip, qoldaý kórsetti. Tarıhtyń trage­dııalyq paraqtarynda da ekeýi qıyn­dyqty birge kórdi. Táýelsizdiktiń al­ǵash­qy kúnderinen bastap eki memleket jańa zamanaýı, geosaıası ahýalda ózara qarym-qatynasty tabysty qalyptastyrdy.

– Qyrǵyzstan men Qazaqstan arasyndaǵy osy qarym-qatynastar odaq­tastyq pen strategııalyq áriptestik deń­geıine kóterildi. Eki el arasyndaǵy qatynastardy qalyptastyrýǵa jáne damytýǵa Qazaqstannyń Tuńǵysh Prezıdenti – Elbasy Nursultan Ábish­uly Nazarbaev baǵa jetpes úles qosty. Elbasy qazaq pen qyrǵyz ha­lyqtaryn tarıhtyń ózi tyǵyz baıla­nys­tyrǵanyn birneshe ret atap kórset­ken bolatyn. Qurmetti Sooronbaı Shárip­uly Jeenbekovtiń Qyrǵyz memleke­tiniń basshylyǵyna kelýimen bizdiń el­derimizdiń arasyndaǵy yntymaqtastyq jańasha serpin alǵanyn da atap ótý kerek. Nursultan Nazarbaev pen Sooronbaı Jeenbekov 2017 jyly saıa­sı erik-jiger tanytyp, eki el úshin asa mańyzdy bolyp tabylatyn memlekettik shekaranyń quqyqtyq mártebesin aıqyndaý jumysyn márege jetkizdi. Sóı­tip barsha álemdik qoǵamdastyqqa Qazaqstan men Qyrǵyzstannyń rýhanı turǵyda berik baılanysty ekenin kórsetti. Qazaqstan Prezıdenti retinde men Qazaqstan men Qyrǵyzstannyń jan-jaqty ózara is-qımylyn odan ári jalǵastyrýǵa nıettimin. Búgin biz qol qoıǵan Birlesken deklarasııa osynyń dáleli, – dedi Qazaqstan basshysy.

Qasym-Jomart Toqaev atap ótkendeı, shaǵyn quramdaǵy kelissózge jáne  Joǵary memleketaralyq keńes otyrysyna qatysqan eki memleket dele­gasııalarynyń quramy joǵary deńgeı­li laýazymdy tulǵalardan jasaqtal­ǵan. Kelissózder barysynda saýda-eko­nomıkalyq baı­lanystarǵa erekshe kóńil bólindi.

– 2015-2018 jyldary ekijaqty taýar aınalymy 30 paıyzǵa artyp, 900 mıl­lıon dollarǵa jýyqtady. Sonyń nátı­jesinde elimiz Qyrǵyzstannyń jetekshi saýda seriktesine aınaldy jáne Reseı men Qytaıdan keıingi úshinshi oryndy berik ıelenip otyr. О́z kezeginde Ortalyq Azııa elderi ishinde Qyrǵyzstan – Qazaqstannyń ekinshi saýda seriktesi. Bizdiń taıaý bolashaqtaǵy josparymyz taýar aınalymyn 1 mlrd dollarǵa deıin kóterý. Osyǵan oraı ekijaqty saý­da nomenklatýrasyn keńeıtip, jańa naryq­tyq baǵyttardy izdeýge tapsyrma berildi. Bul máselede kásipkerlerge yńǵaıly jaǵdaı jasaýdyń erekshe mańyzy bar. Soǵan baılanysty saýda kedergilerin azaıtýǵa ýaǵdalastyq, bıznes kooperasııalardyń jumysyn keńeı­týdi qarastyrdyq. Búginde Qazaqstanda Qyrǵyzstan kapıtaly bar 1 100-den astam kásiporyn jumys isteýde. Al Qyrǵyzstandaǵy qazaqstandyq kapıtal salynǵan kásiporyndardyń sany 2 myńǵa jýyqtaıdy. Bul kórsetkish ósip kele jatqanyn atap ótken jón, – dedi Qasym-Jomart Toqaev.

Prezıdentter eki eldiń arasynda iskerlik baılanystardy qoldaý úshin kásipkerlerdiń ózara tikeleı baılanys ornatýyna múmkindik týdyratyn alań qurýǵa ýaǵdalasty.

Prezıdenttiń memlekettik sapary­nyń kún tártibinde qaralǵan basty máselelerdiń biri ınvestısııa salýǵa qatysty boldy. Qazaqstan basshysy atap ótkendeı, bizdiń elimiz Qyr­ǵyz­standaǵy eń iri ınvestorlardyń biri bolyp tabylady. Táýelsizdik jyldarynda salynǵan 1 mıllıard dollardan astam qarajat osynyń bir kóri­nisi. Osyǵan oraı Prezıdent Qazaq­stan men Qyrǵyzstan aýmaǵynda kásip­ker­ler men ınvestorlarǵa qolaıly jaǵ­daı týǵyzýdyń mańyzdylyǵyna kezek­ti márte toqtalyp ótti. Shekara boıyn­daǵy máseleler boıynsha birlesken is-qımyldar da birtindep damyp kele­di. Qazaqstan Prezıdenti ózara saý­da-sat­tyqtyń shamamen 50 paıyzyn quraı­tyn shekara mańy yntymaq­tasty­ǵy­nyń qarqyndy damyp kele jatqanyn kól­deneń tartty. Bul jaqsy kórset­kish. Shekara boıyndaǵy baılanysty odan ári jaqsarta túsý úshin eki el aza­mat­tarynyń qatynaýyn jaqsartý, sol ar­qyly saýda aǵynyn ulǵaıtý sha­ralary qolǵa alyndy. Atap aıtqanda, Sary­tóbe, Toqmaq, Aýqatty, Keńbulyń ótý beket­teriniń mártebesin ózgertý ju­mys­tary aıaqtalady. Kegen, Qordaı, Qa­ra­sý, Aqtilek jáne basqa da ótý be­ket­te­riniń jumysyn jedeldetý qaras­ty­ryl­ǵan. Eksporttyq jáne ımporttyq ope­ra­sııa­lardy damytý úshin taýarlardy rá­simdeý logıstıkalyq ortalyǵy qury­lýy múmkin. Bul joba ákimshilik prose­dýra­lardy jáne el aýmaǵynda taýar tasy­maldaýdy aıtarlyqtaı jeńildetýge tıis.

Kelissózder barysyndaǵy ózekti taqyryptardyń biri sý-energetıkalyq saladaǵy birlesken is-qımyl boldy.

– Ortalyq Azııanyń transshekaralyq ózenderiniń sý resýrstary ortaq qun­dylyq bolyp tabylady. Ony tıimdi paıdalanýǵa ondaǵan mıllıon adamnyń taǵdyry, búkil aımaqtyń turaqtylyǵy men ıgiligi táýeldi. Shý men Talas ózenderi basseıni boıynsha Qazaqstan men Qyrǵyzstannyń ózara is-qımyly búginde álemniń kóptegen eli úshin jaqsy mysal bola alady. Sý sharýashylyǵy memleketaralyq nysandaryn paıdalaný jónindegi birlesken komıssııa bar. Qazaqstan jyl saıyn osy nysandardy paıdalaný men jóndeý jumystaryn úlestik qarjylandyrýǵa qatysady. Osy maqsattarǵa  bizdiń tarapymyzdan 2000 jyldan beri 1 mıllıard teńgeden astam qarjy bólindi, qarjylandyrý aldaǵy ýaqytta da jalǵasa beredi. Biz búgin ekijaqty formatta jáne aımaqtaǵy bas­qa da áriptesterimizben tyǵyz jumys isteýdi jalǵastyrý týraly ýaǵdalastyq, – dedi Qazaqstan Prezıdenti.

Memleket basshysy jyl sanap eki mem­­leket arasyndaǵy mádenı-gýma­­­nı­­tarlyq baılanystar da qanat jaıyp kele jatqanyn atap ótti. Bul sala ǵasyrlar boıy baýyrlas elder­­diń ja­­qyn­­dasýynda sheshýshi ról atqar­­ǵany málim. Qazaqstanda qyrǵyz ıntel­­lı­gen­sııa­­synyń qatysýymen kóp­tegen mádenı sha­ralar júıeli túrde ótkiziledi. Aı­talyq, ótken jyly Shyń­ǵys Aıtmatov­tyń 90 jyldyǵy Qazaq­stan­da keń kólemde atap ótildi. Astana­da­ǵy kóshelerdiń birine uly jazýshynyń esi­­mi berildi, basqa da kóptegen sharalar ótti. Prezıdent osy saladaǵy ózara is-qı­­myl­dyń qarqynyn báseńdetpeý ke­rek­­tigin jetkizdi. Taıaý bolashaqta ózara má­de­nıet kúnderin uıymdastyrý usy­nyldy.

– Eki el arasynda 180-ge tarta kelisim men ýaǵdalastyqtan turatyn salmaqty kelisimdi-quqyqtyq baza qalyptasty. Búgin de ekijaqty kelisimderdiń iri paketine qol qoıyldy. Sol qujattardyń ishinde «Qazaqstan Respýblıkasy men Qyrǵyz Respýblıkasy arasyndaǵy yntymaqtastyqtyń 2020-2022 jyldarǵa arnalǵan keshendi baǵdarlamasyn erekshe atap ótkim keledi. Bul keshendi baǵ­darlama bizdiń áriptestigimizge jańasha serpin berýi kerek, – dedi Qazaqstan Prezıdenti. Sóziniń sońynda Qazaqstan basshysy qyrǵyzstandyq áriptesine kelissózderdiń nátıjesine kóńili tolatynyn jetkizdi. Qonaqjaı peıiline jáne kezdesýdi keremet uıymdastyrǵany úshin alǵys bildirdi.

Bul sapar Qasym-Jomart Toqaevtyń Qazaqstan Prezıdenti retinde kórshi elge jasaǵan alǵashqy memlekettik sapary ekenin aıta keteıik.

Kelissózderden keıin Qazaqstan basshysy Qyrǵyzstanǵa jasaǵan memle­kettik saparynyń mádenı is-sharalar baǵdarlamasy aıasynda Prezıdent Sooronbaı Jeenbekovpen birge qyrǵyz halqynyń kórnekti jazýshysy Shyńǵys Aıtmatovtyń Mýzeı-úıine bardy. Qazaq­stan Prezıdenti qalamgerdiń 22 jyl boıy turǵan úıinde ashylǵan mýzeı­degi jádigerlermen tanysty. Jazý­shynyń zaıybymen jáne balasymen áńgimelesý barysynda Qazaqstan Pre­zıdenti Q.Toqaev Sh.Aıtmatovpen 1989 jyly Beıjińde tanysqan sátin eske aldy. Memleket basshysyna Bishkek qala­synda Sh.Aıtmatov atyndaǵy máde­nı ortalyq ashylatyny týraly aıtyldy. Ekskýrsııa sońynda Qazaqstan bas­shysy Qurmetti qonaqtar kitabyna estelik qoltańbasyn qaldyrdy.

Búgin Qasym-Jomart Toqaev Bishkek qalasynda ótetin Ujymdyq qaýipsizdik týraly shart uıymy Joǵary qaýipsizdik keńesiniń sessııasyna qatysady. Sessııa aıasynda UQShU qyzmetiniń 2018 jylǵy basym baǵyttarynyń júzege asyrylýy qorytyndylanyp, bolashaq josparlary jasalady. Uıym jumysynyń barlyq sheshýshi baǵyttary boıynsha keń aýqymdy máseleler talqylanbaq.