Jalpyulttyq «Egemen Qazaqstan» respýblıkalyq gazeti» AQ tóraǵasynyń orynbasary – bas redaktory Aıbyn Shaǵalaq, kókshelik qalyń oqyrman jáne zııaly qaýym ókilderi qatysqan merekelik sharany oblystyq ardagerler keńesiniń tóraǵasy, jazýshy Ǵosman Tóleǵul ashyp, júrgizip otyrdy.
Aldymen oblys ákiminiń orynbasary Aına Mysyrálimova óńir basshysy Ermek Marjyqpaevtyń quttyqtaýyn jetkizdi.
– Qazaq baspasóziniń qarashańyraǵy bolyp sanalatyn, ózindik óreli tarıhy bar, qalyń oqyrmany qalyptasqan bedeldi basylym – «Egemen Qazaqstan» gazetiniń júz jyldyq mereıtoıy barshamyzǵa ortaq qýanysh, – dedi Aına Mysyrálimova óz sózinde, – qoınaýy tarıhqa tunǵan kórikti Kókshetaý men Qaraótkel jeri ǵasyr toıyn aıryqsha saltanatpen, mol maǵynamen keńinen atap ótýde. Jyl basynan bastaý alǵan dúbirli toı oblystyń barlyq aýdandarynda da jalǵasyn tapty. Oqyrmandarmen, gazet janashyrlarymen jyly júzdi kezdesýler ótkizilip, gazettiń ótken tarıhyna sholýlar jasaldy.
О́tken ǵasyrda «Ushqyn» atty shaǵyn gazet bolyp shyqqan respýblıkalyq basylym búginde ár qazaqtyń tórinen oryn aldy. Gazettiń tizginin ustaǵan Alash arystarynyń bastamasy qazirgi tańda táýelsizdikti tý etken, basqa basylymdar boı túzeıtin, egemendi eldiń basty basylymyna aınaldy. «Egemen Qazaqstan» – áýel bastan ulttyq múddeni, eldik muratymyzdy jáne rýhanı qundylyqtarymyzdy dáripteıtin qazaq baspasózi ekendigi belgili. Júz jasaǵan basylymnyń egemen el bolý jolynda atqarǵan jumysy, qosqan úlesi ushan-teńiz. Bul gazet qarapaıym halyqtyń muń-muqtajyn joqtap, ar-namysyn qorǵaý dástúrin únemi jalǵastyryp keledi. Únparaq betterinen ýaqyt sarynymen úndes, shynaıy da tanymdy dúnıelerdi jıi oqımyz. Aqmola óńiriniń de jetistikteri men jaqsy jańalyqtaryn jurtshylyqqa jedel ári shynaıy túrde jetkizip, oblysymyzdy keńinen nasıhattaýda bul basylymnyń úlesi orasan zor. Bir ǵasyr boıy el gazetiniń betterinde eldiń tarıhy, eldiktiń tarıhy qattalsa, soǵan kıeli Kókshe óńiri azamattarynyń da qatysy bar ekeni biz úshin maqtanysh.
Aına Ermekqyzy saltanatty sharada gazettiń burynǵy jáne qazirgi menshikti tilshileri B.Amalbek pen B.Baıádildi oblys ákiminiń Alǵys hatymen marapattap, arnaıy syılyqtar tapsyrdy.
A. Shaǵalaq óz sózin astanalyq oblystyń basshylyǵy men jurtshylyǵyna basylymnyń ǵasyr toıyna degen qurmet sezimderine alǵys aıtýmen bastady.
– «Egemen» tarıhynyń bastaýynda turǵan «Ushqyn» gazeti shyn máninde Alash ardaqtylarynyń qolymen shyǵarylǵan alǵashqy gazet – «Qazaqtyń» zańdy jalǵasy dep aıtýǵa negiz bar. О́ıtkeni «Ushqyn» sol baspahana qaripterimen, sol ardaqtylardyń qatysýymen jaryq kórdi. Sondyqtan búgingi gazet ujymy 100 jyldyq aıasyndaǵy mereıtoılyq sharalardy qasıetti Semeı jerinen bastap, Qaraǵandy, Qostanaı, Almaty oblystarynda jalǵastyrdy. «Ushqynnyń» Orynbordaǵy ǵımaratyna aldaǵy kúnderi eskertkish taqta ornatylmaq. Gazet tarıhynda Aqmola oblysynyń da orny erekshe. Ýaqyt úrdisiniń jalǵasyn búgingi kezdesýden de baıqap otyrmyz. Elbasy atap kórsetkendeı, jańa turpattaǵy «Egemen Qazaqstan» gazeti bılik pen halyq arasyndaǵy altyn kópir qyzmetin aldaǵy ýaqytta da jalǵastyra beredi, – dedi Aıbyn Baqytuly.
Aqmola oblystyq sotynyń tóraǵasy Dosjan Ámirovtiń sózi tolǵanysqa toly boldy.
– Gazettiń 100 jyldyq tarıhynan Qazaqstannyń tutas tarıhyn kórýge bolady, – dedi ol, – óıtkeni gazet betterinde shejireli jyldardyń barlyq belesteri kórinis tapqan, basty basylym zar zamandardan da aınalyp óte almaǵan. Asharshylyq, zulmat, soǵys jyldary, tyń kóterý máseleleri sol kezeńniń tilimen halyqqa jetti. Qazaqstan egemendigin qalyptastyrý, bolashaqqa baǵyttalǵan «Máńgilik el» úrdisi qazirgi kúni basylymnyń basty taqyryby. Muny biz kún saıyn shańyraǵymyzǵa kelip turǵan «Egemenniń» betinen tamsana oqı beretinimiz sózsiz.
Budan keıin qoǵam qaıratkeri, Kókshetaý qalasynyń Qurmetti azamaty Bolat Janádilov, tanymal ǵalym, Sh.Ýálıhanov atyndaǵy Kókshetaý memlekettik ýnıversıtetiniń dosenti Sábıt Jámbek, Qazaqstan Jýrnalıster odaǵy jergilikti bólimshesiniń tóraǵasy, «Kókshetaý» gazetiniń bas redaktory Serik Jetpisqalıev, «EL.Jastar» teatrynyń art-dırektory Hákim Hasambaı bas basylymǵa degen ystyq yqylastaryn bildirip, gazet ujymyna shyǵarmashylyq tabys tiledi.
Konferensııa barysynda «El gazeti – «Egemen» taqyrybynda kórme uıymdastyryldy.
KО́KShETAÝ
