Qazir Qaraǵandy aımaǵy óndirisinde kún saıyn bir jańalyq oryn alyp jatyr deýge bolady . Údemeli ındýstrııalyq - ınnovasııalyq damý baǵdarlamasy aıasyndaǵy isterdiń qarqyn alýy osyndaı ózgeristerdi jıilete túsýde . Máselen , Balqash qalasyndaǵy « Nedra Balqash » JShS - nyń granıtti plıtalardy óńdeı bastaýy óńir qurylysshylaryna jaǵymdy jaı bolyp otyr . Tekturmas kenishiniń tabıǵı shıkizatynan jasalatyn qyrly jáne jıektastar ótimdi ónim túrine aınaldy . Buǵan deıin Reseı men Qytaıdan qymbat baǵaǵa satyp alynyp kelgen buıym endi oblys qurylys ındýstrııasyn qamtamasyz etýge jetedi . Kásiporyn tynysy keńeıýi arqasynda 40- tan astam jergilikti turǵyn jumyspen qamtyldy .
Al jańadan iske qosylyp jatqan óndiristik nysandar jaǵynan Temirtaý alda keledi. «Jakko Qaraǵandy» JShS syrtqy kárizderge arnalǵan qubyrlar shyǵarýdy jolǵa qoısa, «KMK Profıl» kásiporny jaıma ılek óndirýdi bastady. Import almastyrýshy bul zattar qurylysshylar qajetin tolyq óteýge tıis. Budan eki jyl buryn jol tabany 1520 mm temirbeton shpaldaryn jasaýdy qolǵa alǵan «NORD Prom NS» kompanııasy endi ekinshi jelini jumys istetý arqyly Jezqazǵan-Beıneý temir joly qurylysyn atalǵan ónimmen tolyqtaı qamtamasyz etý múmkindigin keńeıtti. Sondaı-aq, «AST ETALON CROWN» AQ sýsyndarǵa arnalǵan shyny qutylardyń tyǵynyn shyǵarýdy bastap, bir bóligin Portýgalııaǵa jóneltip te jatyr. Aıta ketý kerek, Indýstrııalandyrý kartasy boıynsha joly jandyrylǵan osy jobalardyń bári eksportqa shyǵarylatyn ónimderdi ulǵaıtýǵa baǵyttalǵan. О́ndirispen birge aýyl sharýashylyǵy salasynda da ónimderdi ártaraptandyrý oıdaǵydaı júrgizilý ústinde. Bıyl arpa egý 25 myń gektarǵa arttyrylyp, 126 myń gektarǵa jetkizildi. Buǵan onyń shetelderge ótimdi ekeni yqpal etti. Mysal úshin Irannan túsken suranys úlken. Sondyqtan ótken kóktemde Qarqaraly aýdany dıqandary osy daqyl egistigi kólemin 7,8 myń gektardan 50 myń gektarǵa ulǵaıtty. Burynǵydaı dolbarlap emes, ekonomıkalyq tıimdiligin dál anyqtap, ishki jáne syrtqy rynokta da suranys mólsherin eseptep , sapalyq jaǵynan kem soqpaýyn eskerip shyǵarý búgingi kúnniń basty talaby sanalyp otyr. О́timdi ónim túrlerin kóbeıtý arqyly aımaqty, elimizdiń ózge óńirlerin de jetkilikti qamtamasyz etý máselesin sheshý negizgi maqsat bolyp tabylady. Aıqyn NESIPBAI, «Egemen Qazaqstan». QARAǴANDY .
