Kórmeni Indýstrııa jáne ınfraqurylymdyq damý vıse-mınıstri Berik Kamalıev ashty. Ol «Qazavtojol - Kaztraffic-2019» kórmesiniń qatysýshylary men qonaqtaryn qarsy ala otyryp, Qazaqstannyń avtomobıl joldary jelisin damytý men jetildirý Indýstrııa jáne ınfraqurylymdyq damý mınıstrliginiń aldyna qoıylǵan basty memlekettik mindetterdiń biri ekendigin atap ótti.
«Qazaqstan avtomobıl joldary salasynyń damýyna erekshe kóńil bóledi. Búgingi tańda bizdiń joldardyń shamamen 600 shaqyrymy aqyly. Biz jańa júıeler men jol kıimi qurylymdaryn, asfalt-betondy qospalardy daıyndaýdyń jańa tehnologııalaryn engizip jatyrmyz. Búgin qazaqstandyq jáne sheteldik kompanııalar kelýshiler nazaryna jańa tehnologııalardy, jańa ıdeıalardy usyndy», dedi Berik Qamalıev.
Ekspozısııaǵa jyl saıynǵy dástúrge sáıkes Qazaqstan Respýblıkasy, Belarýs, Ýkraına, Reseı, AQSh, Germanııa, Túrkııa, Qytaı elderiniń júzden asa jetekshi kompanııalarynyń qazirgi zamanǵa saı ǵylymı jáne tehnıkalyq zerttemeleri men ónimderi qoıyldy. Osylaısha kórmede jol zerthanalaryn, júk tıegishterdi, qar kúregish jabdyq pen basqa da tehnıkany kórýge bolady.
«TMD elderi jolshylarynyń úkimetaralyq keńesiniń basty mindetteriniń biri – avtomobıl joldary salasyna jańa materıaldardy, tehnologııalardy, zerthanalardy engizý. Bul rette bizge «Qazavtojol – Kaztraffic» kórmesi úlken qoldaý kórsetedi. Mundaǵy alańda sala mamandary jyl saıyn túrli problemalyq máselelerdi, olardy sheshý joldaryn talqylaıdy», dep atap ótti TMD elderi jolshylarynyń úkimetaralyq keńesi hatshylyǵynyń basshysy Býrı Karımov.
Shara aıasynda sondaı-aq, «Jol qurylysyndaǵy ınnovasııalyq tásildemeler: perspektıvalar men damý» atty halyqaralyq ǵylymı-tájirıbelik konferensııa uıymdastyryldy. Munda avtomobıl joldary salasyndaǵy ınnovasııalar, joldardyń sapasyna, qaýipsizdigine, avtomobıl joldaryn kútip ustaý jáne damytýǵa qatysty keń aýqymdy máseleler qarastyrylýda. Tyńdaýshylar aldynda AQSh, Germanııa, Fransııa, Reseı jáne Qazaqstandaǵy tanymal kompanııalardyń ókilderi baıandama jasaıdy. Máselen, qazaqstandyq tarap bıyl 60 jyldyq mereıtoıy atalyp ótken otandyq QazjolǴZI jańa jetistikterin, 2019 jyly qurylǵan Ulttyq jol aktıvteri sapasy ortalyǵynyń jumysyn kórsetti. Budan bólek, «QazAvtoJol» UK» AQ sarapshylary avtomobıl joldaryn jobalaý, salý, jóndeý jáne kútip ustaý máselelerin kóteretin bolady.
«Qazavtojol - Kaztraffic-2019» kórmesi elordada 16-shy ret ótkizilip otyr. Ol Qazaqstannyń ǵana emes, basqa da elderdiń jol salasy mamandary úshin tabysty dıalogtyq alańǵa aınaldy.
