Oblystyq máslıhattyń kezekti on tórtinshi sessııasynda oblys ákimi Arhımed Muhambetovtiń ózine júktelgen fýnksııalar men mindetterdiń oryndalýy týraly esebi tyńdaldy. Ol oblystyq máslıhat depýtattarynyń aldynda ústimizdegi jylǵy alǵashqy jartyjyldyqta atqarylǵan jumystardyń tinin tarqata baıandady.
О́ńir basshysy Elbasy Nursultan Nazarbaevtyń «Qazaqstan-2050» Strategııasy – qalyptasqan memlekettiń jańa saıası baǵyty» atty Joldaýynan týyndaıtyn mindetterdi júzege asyrýda óńirde ilgerileýshilik bar ekenine toqtala kelip, birinshi jartyjyldyqta ekonomıkanyń bazalyq sektorynda oń nátıjelerge qol jetkizilgenin atap kórsetti. Onyń aıtýynsha, Údemeli ındýstrııalyq-ınnovasııalyq damý memlekettik baǵdarlamasynyń tıimdi júzege asyrylýy ónerkásip óniminiń artýyna septigin tıgizip otyr, oblystyń ónerkásip óniminiń jalpy kóleminiń 18 paıyzy – ındýstrııalandyrý kartasyna engizilgen jańa óndiristerdiń úlesine tıesili. Birinshi jartyjyldyqta jalpy somasy 1,1 mıllıard teńge bolatyn 3 jańa nysan iske qosylyp, 150 jańa jumys orny ashylǵan. Al jyldyń aıaǵyna deıin 1 myńnan astam jumys ornyn ashatyn, jalpy somasy 120,1 mlrd. teńge bolatyn 10 jańa jobany júzege asyrý josparlanyp otyr.
Oblys ákimi jyl basynan beri belsendi shaǵyn jáne orta bıznes sýbektileriniń sany 1,5 paıyzǵa artyp, 32,9 myńǵa jetkenin málimdedi. Atalǵan salada qazir 118,4 myń adam jumys isteıdi, bul byltyrǵy kórsetkishpen salystyrǵanda, 7 paıyzǵa kóp degen sóz. Jergilikti bıýdjet túsimderiniń úshten birin qamtamasyz etip otyrǵan kásipkerlerdiń belsendi jumys jasaýyna «Jol kartasy-2020» baǵdarlamasy oń yqpal etýde. Bul baǵdarlama boıynsha oblysta 784 kásipker memlekettik qoldaýǵa ıe bolǵan. Bıyl respýblıkalyq bıýdjetten «Jol kartasy-2020»-nyń júzege asyrylýyna 3187,6 mıllıon teńge bólinipti.
Jyl basynan bergi alty aıda aýyl sharýashylyǵy jalpy óniminiń kólemi 38,5 mıllıard teńgeni qurapty. Oblys basshysy saladaǵy kórsetkishterdiń tómendeýi, eń aldymen, mal basy men aýyl sharýashylyǵy ónimderiniń azaıýyna baılanysty bolyp otyrǵanyn jasyrmady. Sondyqtan mal sharýashylyǵyn damytýǵa aıryqsha kóńil bólý qajet, dedi A.Muhambetov. Jalpy, birinshi jartyjyldyqta aýyl sharýashylyǵy óndirisin damytýǵa 3,2 mıllıard teńge qarjy jumsalǵan, jyl aıaǵyna deıin 4,0 mıllıard teńge ıgerý kózdelýde. Salyqtar men basqa da tólemder kólemi arta túsip otyr, aımaq ekonomıkasynyń qarqyndy damýy nátıjesinde turǵyndardyń ál-aýqaty jaqsaryp keledi, ortasha aılyq jalaqy 7 paıyzǵa ósip, kedeıshilik deńgeıinen tómen ómir súrip jatqan azamattar sany 31 paıyzǵa tómendegen.
О́ńir basshysy oblysta «Qoljetimdi turǵyn úı-2020» baǵdarlamasynyń barlyq 9 baǵyty birdeı júzege asyrylyp jatqanynan habardar etti.
Sondaı-aq, qazirgi ýaqytta oblysta gazben qamtý boıynsha somasy 3,6 mıllıard teńge bolatyn 18 joba júzege asyrylyp jatqanyn atap kórsetti. 2014 jyly respýblıkalyq bıýdjetten oblystaǵy eldi mekenderdi gazdandyrý úshin 7,8 mıllıard teńge bólý qarastyrylǵan, munyń ózi 2015 jylǵa qaraı oblys halqynyń 90 paıyzyn gazben qamtýǵa múmkindik beredi, dedi ol.
Eldi mekenderdi sýmen qamtamasyz etýde ilgerileýshilik bar. Jyl aıaǵyna deıin toǵyz aýdandaǵy 16 eldi mekende, kelesi jyly 22 aýylda, 2015 jyly taǵy 31 eldi mekende jer asty sý qoryn zertteý jumystary júrgiziledi dep kútilýde. 2015 jylǵa qaraı oblys turǵyndarynyń 90,5 paıyzy ortalyqtandyrylǵan aýyz sýmen qamtamasyz etiletin bolady.
Oblys ákimi budan basqa jylý berý maýsymyna daıyndyq, avtokólik joldaryn jóndeý, densaýlyq saqtaý men bilim berý salalaryna qatysty birqatar máselelerge aıryqsha toqtalyp, jańa áleýmettik nysandar salý, «Balapan» baǵdarlamasyn júzege asyrý, sportty damytý baǵyttaryndaǵy jumystardy júıeleı áńgimeledi. Ol depýtattardyń qoıǵan saýaldaryna tolyqqandy jaýap berip, tolǵaqty máselelerdiń qalaı sheshiletini týraly oı-paıymdarymen bólisti.
Satybaldy SÁÝIRBAI,
«Egemendi Qazaqstan».
Aqtóbe oblysy.
