Álemde aınaldyrǵan on bes jyl ishinde tórtkúl dúnıe tańǵalatyn astana turǵyzǵan el joq desek qatelespespiz. Áridegi Aqmola, kúni keshegi Selınogradtyń qandaı qala bolǵanyn halyq biledi. Mine, osyndaı júdeý qala ornyna ajarly Astananyń boı kóterýi Elbasy Nursultan Nazarbaevtyń sarabdal saıasaty men kósemdik kóregendiginiń jemisi ekeni sózsiz. Bul – aıqyn aqıqat, tarıhı shyndyq.
Sáýletti de kórikti ǵımarattar salýmen birge, Astanany rýhanı damýdyń ortalyǵyna aınaldyrýdaǵy qadamdar arqyly ilgerileýshiliktiń de irgetastary osy elordada qalanyp jatqany shyndyq. Jalpy, Astana qaı jaǵynan óńirlerge ónege ordasy bolyp otyr. Elordadaǵy kórki kóz tartatyn mádenı jáne áleýmettik ǵımarattar qatary jyl sanap tolyǵa túsýde. Basqasyn bylaı qoıǵanda, jaqynda ǵana paıdalanýǵa berilgen 3000 oryndyq «Astana Opera» opera jáne balet teatrynyń ózi nege turady.
Batys pen Shyǵystyń ozyq sáýlet ónerin boıyna jınaǵan Arqadaǵy arý qalanyń keleshegi kemel ekenine qazirdiń ózinde kóz jetip, kóńil qýanady. Ár barǵan saıyn ajary aıshyqtala túsetin elordanyń búgingi damý qarqyny óńirlerdi de izinen ilestirýde deý oryndy bolmaq. О́ńirler Astanaǵa qarap boı túzeıdi, úlgi alady. Elorda tek sáýletimen ǵana emes, elimizdiń ınnovasııalyq júregine aınalýymen de ónege bolýda. Ǵylym men bilimniń ıgi bastamalary da osynan arna tartýda. Astanadaǵy Nazarbaev Ýnıversıteti, Nazarbaev zııatkerlik mektebi ǵylymı izdenisterge izashar jasap otyrǵan irgeli oqý orny retinde qalyptasqany belgili. Oblystyń ortalyǵynda Nazarbaev zııatkerlik mektebi ashylyp jumys isteýde. Bul jastardyń tereń bilim alyp, elimizdiń ekonomıkalyq damý múmkindikterin jańa satyǵa kóterýge qyzmet etetin bolady.
Tuńǵysh Prezıdentimiz N.Á.Nazarbaevtyń «Astana – Qazaqstannyń uly dáýiri jáne strategııalyq vektory» atty maqalasynda álemde ǵylym men bilim básekelestigi alǵy kezekke shyqqan qazirgi kezde ınnovasııalyq damýdyń qajettigi atap ótilýi tegin emes. Osy baǵyttaǵy Astanadaǵy ıgi qadamdar óńirlerge úlgi-ónege bolady. Bizdiń Marat Ospanov atyndaǵy memlekettik medısına ýnıversıteti astanalyq áriptesterimen qoıan-qoltyq jumys isteıdi. Sonyń nátıjesinde oqý ornyna qarasty emdeý oryndarynda osy zamanǵy medısınalyq qondyrǵylar ornatylyp, kúrdeli operasııalar jasaýǵa qol jetkizilip otyr. Buryndary Astanada ǵana jasalatyn eń bir kúrdeli operasııalardy ózimizde jasaýǵa Astana ǵalymdarynyń da qoldaý-kómegi bolǵanyn aıtý oryndy. Bolashaq dárigerlerge sapaly bilim, sanaly tárbıe berýdiń zamanaýı tásilderin engizip, qoldanýǵa baǵyt ustaýdamyz
Qazir bizdiń ýnıversıtette eńbek etetin 450-den astam ustazdyń 40-tan astamy medısına ǵylymdarynyń doktory, 180-nen astamy ǵylym kandıdattary bolyp tabylady. Bıyl alǵashqy túlekterin ushyrǵanyna 50 jyl tolatyn joǵary oqý ornynda 5 myńnan astam bolashaq dáriger oqıdy. Sońǵy jyldary ýnıversıtet túlekteri aýyldyq jerlerge baryp, halyqtyń densaýlyǵyn saqtaýǵa úles qosýǵa yqylasty bola túsýde.
Qazaqstan qoǵamynyń birligin nyǵaıtýda, barlyq etnostar men konfessııalar arasyndaǵy dostyqty ornyqtyrýda Astana óńirlerge sáýle shashady, nuryn tógedi. Ony ózim eńbek etetin joǵary oqý ornyndaǵy izdenisti qadamdardan, oblystaǵy júzege asyrylyp jatqan iri jobalardan kóremin. Mine, bul Astanadan arna tartatyn irgeli isterdiń, mádenı damýdyń óńirlerde jalǵasyn tabatynyna sendire túsedi. Elordany ónege ordasy deýim de sondyqtan.
Súıesh JARMAǴAMBETOV,
Marat Ospanov atyndaǵy memlekettik
medısına ýnıversıtetiniń dosenti, medısına ǵylymdarynyń kandıdaty.
Aqtóbe.
