Sońǵy jyldary ekonomıkasy qarqyndy damyp, halqynyń ál-aýqaty eselep artyp kele jatqan oblystardyń biri Shyǵys Qazaqstan ekeni anyq. Kóptegen ıgi bastamalarǵa sebepker bolyp, serpindi jobalardyń qaı-qaısysyn da ómirge beıimdeı bilýimen ózge aımaqtarǵa úlgi bolyp otyrǵan óńirdiń búgingi áleýeti orasan. Oǵan osy jerge jaqynda jasaǵan jumys saparym kezinde kýá boldym.
Iá, shyraıly Shyǵys qýatty Shyǵysqa aınalyp keledi eken. Parlamenttegi áriptesterim – Nurtaı Sabılıanov jáne Tólegen Ibraevpen birge áýeli oblys ortalyǵyndaǵy medısınalyq dıagnostıka ortalyǵyna bas suqtyq. Mundaǵy mamandardyń biliktiligin, qyzmet sapasynyń joǵarylyǵyn, al baǵasynyń qoljetimdiligin jaqsy biletin ózge óńir turǵyndary men Reseı azamattarynyń jyl on eki aı aǵylyp jatatynyn kóp estıtinbiz. Sol sózdiń shyndyq ekenin kózimizben kórdik.
Munda atqarylǵan qyrýar istiń ishinen, ásirese, kelýshilerdiń kezegin seıiltý turǵysynda qolǵa alynǵan sharalar oń áser qaldyrdy. Atap aıtsaq, ortalyqtan shalǵaıda jatqan aýdandarda dıagnostıka ortalyǵynyń fılıaldaryn ashý, elektrondy talon júıesin engizý syndy joldar qarapaıym halyqtyń turmysyn jeńildete túsken. Al mundaǵy zamanaýı qurylǵylar men qondyrǵylar, olardyń qulaǵyn ustaǵan bilikti mamandar kóptiń kóńilinen shyǵyp, naýqastyń dertin dál anyqtap, daýasyn tabýǵa tikeleı ári tıimdi áser etýde.
Oblysta áleýmettiń áleýetin jaqsartý isine kóp kóńil bólinip jatqany depýtat retinde meni shyn qýantty. Máselen, О́skemenge irgesi tıip jatqan Ulan aýdanynyń ózinde áleýmettik nysandar qatary jyldan jylǵa artyp keledi. Dańqty batyr, áıgili partızan Qasym Qaısenovtiń esimin alǵan aýdan ortalyǵynda halyqty baspanamen qamtý máselesi jan-jaqty oılastyrylǵan eken. «Qoljetimdi baspana-2020» memlekettik baǵdarlamasynyń aıasynda aýdan ortalyǵynda 80 páterli úıdiń qurylysy qyzý júrip jatsa, ekinshi jartyjyldyqta 95 páterli taǵy bir turǵyn úıdiń qurylysy bastalmaq eken. Bul turǵyn úılerge jas otbasylar men bıýdjettik sala qyzmetkerleri, memlekettik qyzmetkerler jáne ardagerler birinshi kezekte qonystanatyny da oryndy oılastyrylǵan.
Qazaq mektebiniń sý jańa ǵımaraty barlyq talaptarǵa saı jasalǵan. Sondaı bıznes nysanynyń biri – «О́skemen qus fabrıkasy» AQ aýdan ortalyǵynda stadıon salyp beripti. Bul stadıon qurylysyna 40 mln. teńge jumsalypty. Salamatty ómir saltyn qalyptastyrý isine úles qosqan aksıonerlik qoǵamnyń isi quptaýǵa turarlyq.
Sózimniń basynda aımaqta qolǵa alynǵan tyń bastamalar jappaı jemis berip jatqanyn atap ótken edim. Sondaı sátti júzege asyp jatqan bastamanyń biri – tirek eldi mekenderdi túletý bastamasy. Osy baǵdarlama aıasynda turmysyn tiktep, tútinin túzegen eldi mekenniń biri – burynǵy aýdan ortalyǵy bolǵan Bozanbaı aýyly. Meni bir qýantqany, burynǵy aýdan ortalyǵynyń qaıta jandanyp, jańa ǵımarattar salynyp, jańa keıipke enip kele jatqany. Aýyldyń negizgi tiregi bolǵan aýrýhana ǵımaratyn aqyl-esinde aýytqý bar jandarǵa laıyqtap, qaıta jaraqtaý arqyly jergilikti bılik qosymsha jumys oryndaryn ashyp otyr.
Mundaı ıgilikti isterge Jarma aýdanyna barǵan kezimizde de kýá boldyq. Aýdan ortalyǵy – Qalbataý aýylyndaǵy Jastar úıiniń jumysymen tanysý barysynda jastardyń bos ýaqytyn ótkizýine atqarýshy bılik tarapynan nendeı qoldaý kórsetilip jatqanyn kórdik. Jýyqta ǵana ashylǵan jańa ortalyq az ýaqyttyń ishinde aıtarlyqtaı aýqymdy ister tyndyryp úlgergen eken. Aýyl jastaryna atalmysh ortalyqta bos ýaqyttaryn mándi ótkizý úshin aıtarlyqtaı jaǵdaı jasalypty. Osy ǵımaratta ornalasqan elektrondyq kitaphana, zamanaýı onlaın ortalyqtyń da aýyl oqyrmandary úshin bereri mol.
Bular – Shyǵys Qazaqstandaǵy biz kórip úlgergen ıgi isterdiń bir parasy ǵana. Al mundaǵy oń bastamalardy ózgelerge taratý, úlgi etý – halyq qalaýlylarynyń mindeti.
Ergen DOShAEV,
Parlament Májilisiniń depýtaty.
