Á. Maǵaýov atap ótkendeı, 2019 jylǵy qańtar-qarashada aldyn ala óndirý 82,5 mln tonnany qurady. Bul rette respýblıka boıynsha 2019 jyly munaı óndirý jospary 89 mln tonnany quraıdy. 2019 jyldyń sońyna deıin munaı óndirý josparyn birshama asyra oryndaý kútilýde, ıaǵnı 90,5 mln tonna.
«Negizgi óndiris úsh iri jobanyń úlesinde. Munaı óndirýdiń 60%-yn Teńiz, Qarashyǵanaq jáne Qashaǵan ken oryndary qamtamasyz etedi. 2019 jyly 3 iri jobada jóndeý jumystary júrgizildi. Jalpy, óndirý turaqty», — dedi Á. Maǵaýov.
Kúrdeli jóndeý aıaqtalǵan soń Qashaǵan ken ornynda munaı óndirý táýligine 370 myń barrelge jetti.
Teńiz ken oryndaryn keleshekte keńeıtý jáne Qashaǵan ken ornynda gazdy keri aıdaý qýattaryn keńeıtý jobalary esebinen 2023 jyldan bastap óndirý kólemin 100 mln tonnaǵa arttyrý boljanýda. Qalǵan kompanııalar boıynsha munaı óndirýdiń tabıǵı tómendeýi boljanýda. Negizgi ken oryndarynda óndiristiń kesheýildeýine baılanysty Qyzylorda oblysynyń ken oryndarynda munaı óndirýdiń tómendeýi kútiledi.
«Jalpy aldaǵy 2-3 jylda biz munaı óndirý kólemin jylyna 90 mln tonna deńgeıinde ustap turatyn bolamyz», dedi Á. Maǵaýov.
Vıse-mınıstr mańyzdy uńǵyma saǵasynyń qysymyn basqarý, Qarashyǵanaqty keńeıtý jáne Qashaǵan ken ornynyń Shyǵys bóligin odan ári ıgerý syndy ınvestısııalyq jobalar qurylysy qarqyndy júrip jatqanyn atap ótti.
Uńǵyma saǵasynyń qysymyn keńeıtý/basqarý jobasynyń jalpy quny $36,8 mlrd kóleminde baǵalanyp otyr. Jalpy oryndaý jospary boıynsha ilgerileý qazirdiń ózinde 72% quraıdy. $28,5 mlrd-qa jýyq qarjy ıgerildi. Jobany keste boıynsha aıaqtaý josparlanǵan.
Sonymen qatar qazirgi óndirý kólemin Qashaǵan ken ornynda $11,5 mln tonna deńgeıinde ustaý boıynsha aýqymdy jobany iske asyrý josparlanǵan. Jalpy salymdar $3 mlrd mólsherinde baǵalanyp otyr.
Qashaǵan ken ornyn odan ári keńeıtý boıynsha seriktester ken ornynyń Shyǵys bóligin tolyqqandy ıgerý tujyrymdamasyn ázirleýde. 2020 jyly Energetıka mınıstrliginde ken ornynyń osy bóligin ıgerý boıynsha alǵashqy tujyrymdama usynylady dep kútilýde.
