Kórmeniń joǵary deńgeıde ótýine Shvesııadaǵy Qazaqstan Respýblıkasynyń Elshiligi de qoldaý bildirip otyr.
Dızaıner retinde ábden kemeline kelgen Asanova osydan birneshe jyl buryn Máskeý merııasy, Joǵary moda men pret-a-porte Qaýymdastyǵy qoldaýymen ótken «Volvo Fashion Week» sán aptalyǵynda álemniń eń tanymal degen dızaınerlerimen ıyq tirestirip, júldeli oryndardan kóringen bolatyn.
Qazaq dızaıneriniń qoltańbasyn biletinder Balnurdyń ártúrli stılge urynbaıtynyn biledi. Moda álemin tańqaldyramyn dep ersi eksperımenterge baryp jatqanyn da kórmeısiń. Ulttyq boıaýynan eshbir ajyramaǵan Balnurdyń jumystaryna qazir shetelde de suranys bar. Máselen, kópshiligimiz Asanovanyń áıgili amerıkandyq Must Industries kompanııasynyń dıstansııalyq dızaıneri ekenin jáne Victoria secrets, White and Black jáne Chico’s saýda markalaryna jumys istegenin bile bermeımiz.
Qazaqstandyq fashion-ındýstrııanyń bastaýynda turǵan Balnur elimizdiń memlekettik baıraǵynyń etalony men QR Tuńǵysh Prezıdenti shtandartyn daıyndaǵanyn udaıy maqtan tutady.
Sondaı-aq, Balnur Asanova «Almaty» ýnıversıtetiniń halyqaralyq yntymaqtastyq jáne shyǵarmashylyq jónindegi prorektory, QR eńbek sińirgen óner qaıratkeri jáne Halyqaralyq Eýrazııalyq júldeniń «Dızaın» nomınasııasy boıynsha altyn laýreaty.
Maıly boıaýmen jumys isteıtin jáne dızaınerlikti qosa alyp júrgen sýretshi Balnur Asanova Máskeý, Dýbaı, Vashıngtonda jyl saıyn ótetin Sán aptalyqtarynyń turaqty qatysýshysy ári mártebeli qonaǵy.
Máskeýde turaqty ótetetin «Joǵary moda» halyqaralyq baıqaýynda «Ulttyq kostıým» júldesin talaı ret jeńip alǵan jerlesimiz bul kúnderi qaıtalanbas qazaqy naqyshtarǵa toly ulttyq kıim úlgilerimen Stokgolm sánqoılary men turǵyndarynyń shynaıy qoshemetine bólenip otyr.
Al kórmede sýretshiniń sán úlgilerimen qosa, kartınalary, gobelenderi men kestelengen ǵalamat ulttyq kıimderi de qoıyldy.
Bıyl 75 jyldyǵyn atap ótetin «Symbat» sán akademııasy osy ýaqytqa deıin osy zamannyń sánimen úılestirilgen, kózdiń jaýyn alatyn qazaqsha órnekter kestelengen 100 myńdaǵan kıim úlgilerin tikken.
ALMATY
