Saq dáýirinen bizdiń zamanymyzǵa deıin jetken biregeı eskertkish – Almatynyń soltústik batysynda, 430 gektar aýmaqta ornalasqan «Boraldaı saq qorǵandary» arheologııalyq parki sonyń aıqyn kórinisi dep aıtýǵa bolady.
Bul tarıhı nysan «Rýhanı jańǵyrý» baǵdarlamasynyń aıasynda «Qazaqstannyń kıeli jerleriniń geografııasyna» engen. Kıeli nysandy saqtaý jáne keńinen nasıhattaý maqsatynda, biz «Saq mádenıeti ortalyǵyn» salý boıynsha jumystardy qolǵa aldyq. Onyń eskızdik jobasy jáne jobalyq smetalyq qujattamasy ázirlendi. Ortalyqta ashyq aspan astyndaǵy mýzeı, kópkeshendi zal (konserttik jáne kórme tehnıkasymen jabdyqtalǵan), konferensııa jáne mýltımedııalyq zal, kádesyı men medıateka dúkeni, arheologııa mýzeıi, zamanaýı qurylǵylarmen jabdyqtalǵan restavrasııalyq sheberhana jáne qalamyzdyń týrıstik tartymdylyǵyn arttyratyn taǵy basqa da túrli nysandar salý kózdelgen.
«Qazirdiń ózinde arheologııalyq park aýmaǵynda erte saq taıpasy úıleriniń maketi men qoldanǵan buıymdarynyń kóshirmelerin kórýge bolady. Jyl basynan beri tarıhı nysanmen tanysý jáne tamashalaý ekskýrsııasyna 46 myńnan astam mektep oqýshysy men 14 myńnan astam kolledj stýdenti qatysty.
Qalamyzda jyl saıyn «Uly dala – kóshpendiler álemi» halyqaralyq etnıkalyq festıvalin ótkizý ıgi dástúrge aınalǵan. Festıval umyt bola bastaǵan ulttyq dástúrlerdi, túrki áleminiń sport oıyndaryn nasıhattaýǵa jáne óskeleń urpaqtyń ulttyq ónerge, tarıh pen mádenıetke degen qyzyǵýshylyǵyn arttyrýǵa baǵyttalǵan», – deıdi Almaty qalasynyń ákimi Baqytjan Saǵyntaev BAQ ókilderine bergen subatynda.
Atalmysh festıvalgeelimizdiń ónerpazdarymen qosa, Vengrııa, Mońǵolııa, Ýkraına, О́zbekstan, Qyrǵyzstan, Bashqurtstan, Tyva, Daǵystan, Saha, Altaı, Qalmaqııadan jáne t.b. túrki elderinen kelgen ókilder qatysady. Munda túrki elderiniń dástúrli án men kúıin, salt-dástúrin, jaýyngerlik óneri men ulttyq sportyn tamashalap, as mázirinen dám tatqan kórermender (olardyń sany 30-40 myń adamǵa deıin jetedi) erekshe ásermen qaıtady.
Sol sııaqty, Almaty qalasynyń tarıhı jáne mádenı eskertkishteriniń biregeıi –Raıymbek batyr kesenesi de kıeli nysandar qatarynda. Kesene kelbetiniń saqtalýyn qamtamasyz etý maqsatynda ákimdik tarapynan restavrasııalyq jumystar júrgizildi. Aldaǵy ýaqytta Raıymbek batyr kesenesiniń týrıstik tartymdylyǵyn arttyrý úshin kesene aýmaǵynan «Raıymbek batyr mýzeı-keshenin» (2 túneý jáne namazhana salý) qurý josparlanǵan.
ALMATY
