Keshe Memleket basshysy Nursultan Nazarbaev Premer-Mınıstr Serik Ahmetovti qabyldady, dep habarlady Prezıdenttiń baspasóz qyzmeti.
Kezdesý barysynda Premer-Mınıstr elimizdiń birinshi jartyjyldyqtaǵy áleýmettik-ekonomıkalyq damýynyń qorytyndylary týraly baıandap, taıaý kezeńdegi josparlar jóninde aıtyp berdi.
S.Ahmetov Úkimettiń sońǵy otyrysynda elimizdiń bıylǵy alty aıdaǵy áleýmettik-ekonomıkalyq damý qorytyndysy qaralyp, ekinshi jartyjyldyqqa birqatar mindetter qoıylǵanyna toqtaldy.
– Bizdiń negizgi eksporttyq seriktesterimizge daǵdarystyń yqpal etýine qaramastan, jyl qorytyndysy boıynsha biz ishki jalpy ónimniń 6 paıyzǵa artýyn kútýdemiz. О́sim ekonomıkanyń is júzinde barlyq salasynda baıqalýda, negizgi kapıtalǵa ınvestısııa arttyrylýda. О́z kezeginde ınflıasııa deńgeıi 2,7 paıyzdy qurady, bul el halqynyń kirisi artýyna oń yqpal etedi, – dedi Qazaqstan Premer-Mınıstri.
Nursultan Nazarbaev álemdik ekonomıkanyń turaqsyzdyǵy jaǵdaıyndaǵy ekonomıkanyń ósimi jaqsy kórsetkish bolyp sanalatynyn jáne búginde ony odan ári arttyrýǵa qajetti rezervterdiń bar ekenin atap ótti.
– Qarajatty ıgere almaý sebebinen turǵyn úıdi salýdyń jáne birqatar ınfraqurylymdyq jobalar kórsetkishteriniń tómendeýi oryn alyp otyr. Osy baǵyttaǵy jumysty jandandyrǵan jón. Bul, tutastaı alǵanda, ishki jalpy ónimniń arta túsýine edáýir septigin tıgizedi. El ekonomıkasynyń ósimi jónindegi boljam jyl qorytyndysy boıynsha 6 paıyzǵa tolyq iske asady deýge negiz bar, – dedi Memleket basshysy.
Prezıdent ekinshi jartyjyldyqta, ásirese, óńirlerde belsendi jumysty jalǵastyrý qajettigine nazar aýdardy.
– Indýstrııalyq-ınnovasııalyq baǵdarlama aıasynda júzege asyrylyp jatqan nysandardy jobalyq qýatyna jetkizýdi qamtamasyz etý mańyzdy. О́ńdeý ónerkásibi men mashına jasaý salasyndaǵy ósim – jaqsy jetistik. Qarjy sektorynda da damýdyń oń qarqyny bar. Qazaqstan taýarlarynyń eksporttyq tutynymy tómendeýine baılanysty «Qazaqmys» JShS, «Arselor Mıttal Temirtaý» AQ sııaqty otandyq kompanııalar birqatar qıyndyqtardy bastan keshýde, meniń tapsyrmam boıynsha olarǵa qajetti qoldaý jasalýda. Sonymen birge, eksporttyq áleýettiń kólemi azaıǵanyna qaramastan, «Arselor Mıttal Temirtaý» kompanııasy basshylyǵy óndiristiń jyl saıynǵy kólemin 3,5 mln. tonna mólsherinde saqtaýǵa ýáde berdi, – dedi Nursultan Nazarbaev.
Memleket basshysy jıyn-terin naýqanyna daıyndyqty ýaqytyly júrgizýdi jáne aýylsharýashylyq ónimin ótkizýdiń ishki naryqtaryn keńeıtýdi tapsyrdy.
Kezdesý qorytyndysynda Prezıdent qaralǵan máseleler boıynsha birqatar naqty tapsyrmalar berdi.
